Веруна Олеяр Ґрабельшек
| Веруна Олеяр Ґрабельшек | |
|---|---|
 | |
| Датум народзеня | 26. юния 1933. |
| Датум упокоєня | 12. априла 2016 (83) |
| Державянство | югославянске, сербске |
| Язик творох | сербски, руски |
| Школа | Музична школa, Нови Сад |
| Универзитет | Музична академия, Беоґрад |
| Период твореня | 1955- |
| Жанри | шпиванє, компонованє, |
| Похована | у Беоґрадзе |
Веруна Олеяр Ґрабельшек (*26. юний 1933-†12. април 2016), музична редакторка Радио Беоґрада, шпивачка.
Биоґрафия
[ушориц | ушор жридло]Веруна Олеяр народзена 26. юния 1933. року у Дюрдьове. Оцец Яков и мац Ирина родз.Венчельовски. Верунка мала ище два шестри, Меланку и Любку.
Фамелия Олеяр ше преселєла до Нового Саду дзе Верунка закончела основну школу. Яков Олеяр, Верунков оцец, робел на пошти алє вчас умар и мац Ирина остала ґдовица зоз трома дзивками. Верунка Олеяр ше 1947. року уписала до трецей ґенерациї школярох Нїзшей мишаней ґимназиї у Руским Керестуре. Медзитим, нєодлуга ше преписала до Учительскей школи у Сримских Карловцох дзе закончела два класи (1949. року) и потим ше уписала до Музичней школи у Новим Садзе хтору закончела 1951. року. Як школярка Музичней школи Верунка робела и як професийни член хору Опери Сербского народного театру од октобра 1949. по юлий 1952. року. Источасно, Верунка през лєто вечарами шпивала з єдним оркестром у готелу Войводина, на тот способ помагала мацери и назберала средства же би пошла на студиї до Беоґраду. Верунка Олеяр ше 1952. року уписала на Музичну академию у Беоґрадзе як порядни студент.
Штредком 1950-их рокох Радио Беоґрад глєдал з Музичней академиї музичних сотруднїкох хтори були потребни за витворенє преширеней програми. Медзи вибранима була и Верунка Олеяр хтора тоту роботу робела барз пошвецено цали свой роботни вик у званю музичней редакторки. Верунка робела спочатку як музични сотруднїк за потреби Дзецинскей радио емисиї. Робота ю инспировала же би компоновала композициї за дзеци на сербским и руским язику.
Спрам даєдних жридлох мож тримац же Верунка Олеяр була, вєдно зоз Ирину Давосир Матанович, єдна з перших Рускиньох хтори закончели Музичну академию.
За Нови Сад, дзе часто пребувала у нащиви фамилиї, Верунка Олеяр була сентиментално вязана. Понеже крашнє шпивала, мала красни алт, вона була поволана же би за потреби Радио Нового Саду зняла даскельо руски народни шпиванки. Два шпиванки у виводзеня Верунки Олеяр були видати на ґрамофонскей плочи у едициї Войводина шпива, EP 11217.
Тиж так, кед бул у виробку перши учебнїк на руским язику за потреби музичного образованя и воспитня Верунка Олеяр у тей роботи була анґажована як консултанткиня.
Веруна Олеяр ше одала за Тому Ґрабельшека. У малженстве мали дзивче Иринку.
Веруна Олеяр Ґрабельшек умарла 12. априла 2016. року у Беоґрадзе дзе є и похована.
| На Ютюб поставени тоти шпиванки
у интерпретациї Веруни Олеяр | ||
|---|---|---|
| Пред нашима дзверми | народна | |
| Шири явор конариска | народна | |
| Пойдзем, мамо, пойдзем | Ириней Тимко | |
| Ей, одала ме уж матка | народна | |
| Ходила я по садочку | українска | |
| За Червене пупче Веруна Олеяр
написала тоти композициї | ||
| 1970. | Идзе яр | текст и музика |
| (?) | Нови рок | музика |
Вонкашнї вязи
[ушориц | ушор жридло]- Мирон Жирош, Школованє власней рускей интелиґенциї (II), Керестурска руска ґимназия, Треца ґенерация, чис. 33. Вебсайт Руснаци у Панониї, rdsa.tripod.com
- Vremeplov (za 12. april). vebsajt www.rts.rs
- ЧЕРВЕНE ПУПЧЕ – Том III, НОВА МУЗИЧНА ТВОРЧОСЦ ЗА ДЗЕЦИ композициї В. Олеяр (Идзе яр, Нови рок), бок 29. 559.