Владимир Рогаль
| Владимир Рогаль | |
|---|---|
| Народзени | 20. юния 1925. |
| Умар | 31. октобра 1984. (59) |
| Державянство | югославянске |
| Язик творох | руски |
| Школа | Учительска школа, Зомбор |
| Период твореня | 1946—1976. |
| Жанри | просвита, информованє |
| Поховани | на варошским теметове у Шидзе |
| Припознаня | Орден заслугох за народ III шора,
Награда 6. децембер општини Шид |
Владимир Рогаль (*20. юний 1925—†31 октобер 1984), учитель, єден з перших редакторох часопису за руски дзеци Пионирска заградка, дружтвено-политични дїяч.
Биоґрафия
[ушориц | ушор жридло]Владимир Рогаль ше народзел 20. юния 1925. року у Соту (при Шиду), у селянскей фамилиї. Оцец Штефан и мац Анка. Владов оцец Штефан бул спочатку тишлїр, а вец ше пошвецел землєдїлству. Окремну увагу пошвецовал винїцарству и пчоларству. Владов дїдо Янко Рогаль, приселєл ше зоз Лукова (Бардейовски срез у Словацкей) до околїска Лежимиру у Сриме, а потим до Привиней Глави. Ту ше му народзели 11-ецеро дзеци, спомедзи хторих пецеро умарли. Владо закончел штири класи основней школи у своїм родним месце, а гражданску школу у Шидзе. Три класи учительскей школи Владимир Рогаль закончел пред войну у Сримских Карловцох, а матуровал у учительскей школи у Зомборе 1946. року.
Уж од 1941. року, як шеснацрочни леґинь, прежил велї войново страхоти. За презвиско Рогальовей фамелиї вязани и познати фрушкогорски Рогаль-бази под час НОВ. Владимир Рогаль, як учаснїк у Народноошлєбодительней войни (НОВ), бул на першей паради у ошлєбодзеним Беоґрадзе 1944. року, одкаль шицки борци рушели до борби за конєчне ошлєбодзенє жеми.
По ошлєбодзеню, як визначному дружтвено-политичному роботнїкови, були му зверени одвичательни длужносци на планє образованя и култури у Бачкей, дзе службовал од 1946. по 1954. рок. У тим периодзе, як млади просвитни роботнїк, розпоредзени є на службу до Сентянского Ґунарошу (познєйше Нове Орахово), дзе ше праве приселєли, як колонисти, Руснаци з Руского Керестура, як перши учитель у новооснованей основней школи за руски дзеци.
Медзитим, уж о рок бул премесцени до Руского Керестура за управителя основней школи, а вец знова о рок бул послати до Беоґраду на курс за новинара. По врацаню з Беоґраду 1949. року бул меновани за главного и одвичательного редактора часопису за руски дзеци Пионирска заградка. У периодзе кед Владими Рогаль бул редактор Пионирскей заградки видруковани 17 числа того дзециского часопису, зоз хторих шейсц були двочисла. Владо вельо зробел на звекшаню тиражу, як и на преширйованю сотруднїцтва.
Од 1951. по 1954. рок робел як други секретар Секциї за Руснацох при Союзу културно-просвитних дружтвох АП Войводини, дзе у исти час окончовал и значни дружтвено-политични функциї.
Владимир Рогаль ше 1951. року оженєл зоз учительку Єлисавету Славку Будински з Руского Керестура. У малженстве мали сина Владимира и дзивку Надежду.
У 1954. року ше, по власней дзеки, преселєл до Бикич Долу, дзе як учитель робел у Бикичу, Соту и Беркасове, вєдно зоз свою супругу Славку.
У Бикичу Владимир орґанизовал велї успишни роботни акциї: вибудов базену за купанє валала (Бикич бул теду преглашени за найушоренши валал у шидске општини), снованє добродзечного огньогасного дружтва, уводзенє електричного ошвиценя (перша електрична грушочка у валалє зашвицела 1. юлия 1960. року) итд. Вєдно зоз супругу Славку робел и у рамикох Културно-просвитного дружтва Иван Котляревски.
У 1962. року Владимир Рогаль прешол на роботу до Скупштини општини Шид, дзе водзел образованє и културу.
За свою дружтвену и просвитну роботу Владимир Рогаль достал вецей дипломи и плакети, бул одликовани з Орденом заслугох за народ III шора, а бул и добитнїк награди 6. децембер општини Шид.
Пензионовани є 1976. року кед бул на роботним месце помоцнїка директора Основней школи Бранко Радичевич у Шидзе.
Владимир Рогаль умар 31. октобра 1984. року у Шидзе. Поховани є на варошским теметове.
Литература
[ушориц | ушор жридло]- Янко Рац, Владимир Рогаль (1925-1984); Руски календар 1985, Руске слово, Нови Сад, 1983, боки 69-71.
- Василь Мудри, З нагоди означованя 70-рочнїци народзеня Владимира Рогаля (1925-1984-1995), Studia Ruthenica, Дружтво за руски язик, литературу и културу, ч. 5, 1996-1997, б. 121-123.'