Епитрахиль
Епитрахиль або нашийнїк, то риза хтора ма форму велькей пантлїки, з ризового платна є, широка коло 15 центи, а длугока коло 300 центи. То пантлїка хторей два поли скапчани з украснима ґомбичками, або зошити, обшити з ґалонами.
Епитрахиль ма на себе ушити седем крижики, кладзе ше го на шию (прето ше вола и нашийнїк) и вец з предку виши спод лїстох.
Нашийнїк або епитрахиль знак тройнїстей священїческей власци:
- власци священодїйствовац (служиц Службу, служиц други богослуженя, окончовац пошвецаня, благословиц, молитвословиц),
- власци наказовац (казань, виронаука, писане слово) и
- власци управяц з Народом Божим (глашиц у рижних дїялносцох у парохиялней заєднїци, иницировац духовни подняца, нащивйовац парохиянох з рижних нагодох, окреме з богоявлєнским пошвецаньом домох).
Кед священїк облєка епитрахиль, поблагослови го на горнїм крижику, побочка го и модлї одредзену молитву, и аж теди може окончовац одредзени дїйства почитуюци найглїбшу традицию и правни норми.
При облєканю владики до епитрахилю, молитву модлї диякон и кадзи епитрахиль.
Нєшка, кед владика пошвеца диякона за священїка, вец му знїма орар з плєца и место нього му надзива епитрахиль. Медзитим, скорей було иншак: єдну задню часц (зоз лївого боку хрибта) орару ше преруцовало прейґ правого плєца напредок, та ше зоз орару формовал епитрахиль хторому штредня часц лєжала на шиї а конци вишели прейґ обидвох першох аж до пол лїстох, а по штредку були закапчани зоз „ушками” або ґомбичками.
Литература
[ушориц | ушор жридло]- Дзвони, християнски часопис, май 2003, Протоєрей ставрофор Йоаким Холошняй