Наталия Колєсар


Наталия Колєсар

Народзена	21. марца 1941.
Державянство	мадярске, югославянске, сербске
Язик творох	руски
Школа	Штредня школа за воспитачох, Нови Сад
Период твореня	1961—1996.
Жанри	воспитанє, драмски аматеризем, шпиванє
Припознаня

Наталия Колєсар, 21. марец 1941, воспитачка, радио шпивачка, драмска аматерка

Биоґрафия

Наталия Колбас народзена 21. марца 1941. року у Руским Керестуре. Оцец Янко Колбас и мац Мелания родз. Паланчаї. Наталия мала ище двох братох Янка и Владимира, и два шестри, Марию и Геленку.

Основну школу Наталия закончела у родзеним валалє а далєй школованє предлужела у Штреднєй школи за воспитачох у Новим Садзе. По законченю штреднєй школи Наталия Колбас робела рок и пол у Основней школи Петро Кузмяк у Руским Керестуре, потим прешла на роботу до администрациї ЗЗ Перши май а концом 1965. року почала робиц як воспитачка у предшколскей установи (оводи) у Руским Керестуре и ту остала по пензию у септембре 1996. року.

Наталия Колбас ше одала за Єфрема Колєсара, ґдовца зоз двома синами, винчали ше 26. новембра 1963. року а у малженстве мали два дзичата, Даниєлу и Андрею.

Уж сам факт же ше Наталия школовала за воспитачку потвердзує же єй тота робота булo животне жаданє. Вона була у подполносци пошвецена тей роботи и окончовала ю з любову. Вецей раз була наградзована зоз плакетами и значками за найуспишнєйшого роботнїка. У колективе керестурскей оводи є запаметана як вредна, строга и совисна воспитачка зоз иновативнима идеями у воспитней роботи. У явносци и медзи родичами була позната по окремней хореоґрафиї, слово о рускей свадзби з дзецми у оводи хтора почала як бависко, алє ше дзецом так попачела же вона з помоцу других вихователькох розробела бависко як праву свадзбу, зоз свашками, старостами, паноцец “повинчал” млодятох, ресторан подаровал свадзебним полудзенок... За тоту нагоду були ушити пасово сукнї дзивчатом и одвитуюци шмати хлапцом, направени бул стародавни венчик, та потим вецей ґенерациї керестурских дзецох у оводи правели праву руску свадзбу кажди рок.

Наталия Колєсар любела и рисовац, мальовац. У єй класи у оводи мури були вше подполно закрити з паноами цо вона мальовала, виштриговала, лїпкала, и ровно було нове, за кажде швето, кажду рочну часц, пейзажи (раз шицки мури представяли лєс зоз дзивима животинями, раз двор з домашнїма животинями, вец роботи на полю, потим шнїг и жимски радосци - цо учели з дзецми по плану, таки илустрациї мальовала).

Активносц у културним живоце валала

Наталия Колєсар од младосци писала писньочки на рижни теми а за потреби виховного процесу. Замерковала же за дзеци на предшколским уровню було барз мало одвитуюцей поетскей литератури хтору ше могло хасновац у процесу вихованя. Єден час вона аж и модлєла теди активних руских поетох же би писали за мали дзеци у оводи. Потим, кус по кус, вона почала складац власни писньочки за теми хтори були у планє роботи у оводи, о єшенї, птичкох, о жими, за державни швета... Кед 1976. року вишол приручнїк за виховательки Ластовичка, у нїм були и єй даскельо писньочки за дзеци, а єден длугши час воспитачки ушорйовали два боки у Пионирскей заградки праве же би так створели достаточни фонд поезиї за наймладших.

Обласц музичножго вихованя предшколских дзецох тиж квалитетно унапрямовала и зоз любову ґу музики, шпиваню и танцу. Од малючка усадзовала любов ґу шпиваню поготов руских писнюох за дзеци та и народних. Часто и сама креировала и викомпоновала даяку мелодию прилагодзену возросту дзецох. Єй писньочки ше нашли у записох кнїжки Черевена ружа - Червене пупче, писнї за дзеци.

Йозефина Будински, Наталия Колєсар и Златка Гарди — Йозефина Будински, Наталия Колєсар и Злата Олексова Гарди у фалаце Женїдба

Познате же воспитачка Наталия Колєсар дзепоєдни популарни сербски дзецински писнї, хтори були познати и интересантни прекладала на наш руски язик и учела оводарцох шпивац. Барз часто знаюци же дзеци любя рухи, ритмични крочаї, красну мелодию зоз шпиванку учела дзеци танцовац.

Такой по законченю основней школи, дзекуюци свойому гласу, Наталия постала член Дома култури, як соло шпивачка и членїца ґрупи Ракоджуки. Як цо теди бул оркестер Сивґамуриз - Сивч, Ґаднянски, Мученски, Ризнич - так бул и квартет шпивачкох Ракоджуки - Рац (Ганча), Колбас (Наталия), Джуня ( ), Кирда ( ). Источасно, вона була и член танєчней секциї Дома култури.

Наталия була член Клуба студентох и штредньошколцох у Руским Керестуре хтори од початку 1962. року почал витворйовац идею о єдней манифестациї младих под роботну назву Червена ружа. Наступела як шпивачка на першей Червеней ружи и достала награду за найкрасши дзивоцки глас, кошарку зоз червенима ружами. Так остала запаметана у аналох фестивала як перша шпивачка хтора достала припознанє за найкрасши глас фестивала.

До швета ґлуми Наталия ступелa участвуюци у театралних фалатох у штреднєй школи, потим у драмских сличкох хтори ше приказовали на другим вечаре першей Червеней ружи (дзе шицки помагали як у орґанизациї, так и у виробку костимох, у ґлуми итд.), а у своєй остатнєй представи, у Ґоґольовей Женїдби, за главну улогу (Агафия Тихоновна), Наталия Колєсар достала барз добри критики после наступох у жеми, а у ЧССР, дзе керестурски ансамбл госцовал зоз Женїдбу, вона досталa правдиви овациї на отвореней сцени.

Фаховци з Радио Нового Саду замерковали єй красни глас та була на вецей заводи поволована же би порихтала шпиванки хтори, потим, були зняти у студию РНС як архивски знїмки. И тераз з часу на час мож чуц даєдну з єй дзешец знятих шпиванкох у програми на руским язику РНС. За потреби Рускей редакциї ТВ Нови Сад (нєшка то ТВ Войводина) Наталия зняла 3- 4 видео споти наших народних шпиванкох.

Окрем шпиваня, ище од дзецинских рокох полюбела шицки файти ручней роботи - вишивала, штрикала, геклала, шила, правела бависка. Любела вишивац ґоблени, то дзечнє робела и як пензионерка.

Од 2010. року замеркована у рускей явносци окремна активносц Наталиї Колєсар и єй сушеди Йозефини Еделински. Слово о виробку крижмох хтори ше трима за традицийни симбол чистоти дзецка на його кресцинох. Вони два по 2025. рок виробели прейґ 200 крижми хтори од нїх поручовали Руснаци зоз скоро шицких наших валалох алє и зоз иножемства. Гваря же їх крижми сцигли на шицки континенти на швеце и украшели шветочносц кресценя.

У фонотеки Радио Нового Саду єст евидентовани 10 архивски авдио знїмки Наталиї Колєсар.


Число	Наслов		Автор аранжмана
1.	Ей, нєщасна годзина	народна
2.	А кед панї млода	народна	И. Тимко
3.	Шедла мушка на конарик	народна	И. Тимко
4.	Загучали гори	народна	И. Тимко
5.	Зашвицело слунко	народна	И. Тимко
6.	Була єдна паньска лучка	народна	И. Тимко
7.	Пила бим	народна	Сава Вукосавлєв
8.	Загучали гори	народна	О. Тимко и С. Вукосавлєв
9.	Сама я рожу садила	українска	Сава Вукосавлєв
10.	Ой, лопнув обруч	українска	Сава Вукосавлєв

Наталия Колєсар, стихи за композициї
Рок	Наслов писнї	Композитор
1973	Ядловец	Витомир Бодянєц
2006	Новорочни шнїг	Звонко Сабадош

Ґалерия

Ирина Олеяр, Настя Бережна, шминкерка зоз ПУЛС и Наталия Колєсар, пририхтованє за наступ (1969)
Єдна часц ансамбла театралного фалата Женїдба, 1969. рок: верхнї шор: Янко Павлович, Янко Ґ. Рац, (Аноним), Ана Рац, Наталия Колєсар, Злата Гарди, Владимир Дудаш, Михал Ковач, (Аноним), Ганча Дудаш. Други шор, стоя: Йозефина Будински, Гафка Рамач, Витомир Бодянєц, Ирина Олеяр. Куча: Ярослава Кочиш, Владимир Гайдук, Єфрем Колєсар и Микола Скубан.

Литература

Ґрупа авторох, „Вокални солисти на фестивалу Червена ружа '62-'90ˮ, 30 Червни ружи, НИУ Руске слово, Нови Сад, 1991, бок 90.
Оленка Живкович, Любов на перши погляд, а за цали живот, новини Руске слово, 22. януар 2021. бок 24-25.

Вонкашнї вязи

Червена ружа – жридлова, найстарша и найзначнєйша манифестация Фестивалa. Тирваци плоди „Червеней ружи“, ЧЕРВЕНА РУЖА 1962-2011, том I Завод за културу войводянских Руснацох, Нови Сад , 2011, бок 19.

Авторе музики и текста, ЧЕРВЕНА РУЖА 1962-2011, том II. Завод за културу войводянских Руснацох, Нови Сад, 2014, бок 471.

Червене пупче 1973, ЧЕРВЕНE ПУПЧЕ, 1969-2012, том III. Завод за културу войводянских Руснацох, Нови Сад, 2013. бок 85.

Крижма - символ чистоти дзецка на кресценю, Маковчань. Ютюб, www.youtube.com, 28. май 2017.