ប្រាសាទព្រះធាតុរកា

ប្រាសាទព្រះធាតុរកាដែលប្រជាជន និងអ្នកប្រាជ្ញាបារាំងមូយចំនួនច្រើននិយមហៅថាតាមរូបភាពជាក់ស្តែងថា ប្រាសាទទ្រេង ព្រោះប្រាសាទនេះមានរាងទ្រេតទៅទិសខាងលិច។ ប្រាសាទនេះមានទីតាំងស្ថិតនៅក្នុងបរិវេណសាលាបឋមសិក្សារកា មានចម្ងាយផ្លូវចូលប្រមាណ ៥គីឡូម៉ែត្រពីផ្លូវជាតិលេខ៦។ ប្រសិនបើយើងធ្វើដំណើរតាមផ្លូវជាតិលេខ៦ មានចម្ងាយប្រមាណ ៩៣គីឡូម៉ែត្រនៅខាងឆ្វេងដៃមកដល់ក្លោងទ្វារមួយ ដែលលំអដោយរូបចម្លាក់ព្រះកេសព្រហ្មមុខបួនមានសណ្ឋានជាប្រាសាទកំពូលប្រាំ ដែលព្រះកេសកណ្តាលខ្ពស់ជាងគេ។ប្រាសាទព្រះធាតិរកាកសាងអំពីថ្មភក់ ដែលខ្លោងទ្វារបញ្ឆោតខាងត្បូងមានផ្តែរមួយ ដែលមានសណ្ឋានទ្រង់ទ្រាយស្រដៀងគ្នានិងផ្តែរទ្វារក្នុងរចនាបថសំបូរព្រៃគក់ ដែលលំអដោយអង្កត់ធ្នូ៤។

នៅក្នុងឯកសារមុនៗដែលសិក្សាដោយអ្នកស្រាវជ្រាវជនជាតិបារាំង គេច្រើនហៅប្រាសាទនេះថា “គោករកា” ប៉ុន្តែឈ្មោះនេះសព្វថ្ងៃពុំមានអ្នកស្រុកណាម្នាក់ស្គាល់ឡើយ ព្រោះអ្នកស្រុកហៅតៗគ្នាថា “ព្រះធាតុ” ឬ “ព្រះធាតុរកា”។ ពាក្យ “ព្រះធាតុ” ច្រើនតែជាពាក្យដែលគេហៅសំណង់ប្រាសាទប្រៀបប្រដូចទៅនឹងចេតិយ។ ព្រះធាតុរកា មានទីតាំងស្ថិតនៅភូមិរកា សង្កាត់ស្រយូវ ក្រុងស្ទឹងសែន ខេត្តកំពង់ធំ និងមានចម្ងាយ៥០០ម៉ែត្រ ខាងត្បូងទួលដំរីស។ កន្លងមក ប្រាសាទនេះបានទាក់ទាញអ្នកស្រាវជ្រាវជាតិ និងបរទេសមកសិក្សាច្រើនណាស់ ចាប់តាំងពីដើមស.វ.ទី២០មក ដែលអ្នកស្រាវជ្រាវទាំងនោះមានដូចជា លោក Goerge Groslier ឆ្នាំ១៩២៤ លោក Henri Parmentier ឆ្នាំ១៩៣៥ លោក Goerge Coedès ឆ្នាំ១៩៥៣ លោក​ស្រី Mireille Bénisti ឆ្នាំ១៩៧៤, ១៩៧៧ លោក ម៉ក់ ភឿន ឆ្នាំ១៩៩៥ លោក បេ តៃសែ ឆ្នាំ២០០៣ និងលោក ភុំ រតនៈពិសិដ្ឋ ឆ្នាំ២០១៤។