សំនៀងខ្សែដៀវ

ខ្សែដៀវផ្ទាត់ឮរន្ទឺឆ្លងភូមិ

ប្រលែងប្រលោមអន្ទងអារម្មណ៍

សំនៀងទឹកដមពិរោះរងំ

គ្រប់គ្នាសំងំស្តាប់សៀងខ្សែដៀវ។

ផ្លិកផ្លក់ភ្លិងភ្លង់អោយលង់ទ័យា

តន្ត្រីរមនាផ្ទាត់សារច្រៀងនាវ

ហាកចម្រៀងទុំស្មូត្រផ្ញើស្រីទាវ

សំនៀងខ្សែដៀវនាវចិត្តលង់ស្នេហ៍។

សព្ទសៀងស្រទន់សណ្តំកាមា

ពិរោះសោតាឧិរាល្ហើយល្ហែ

អនិច្ចាថ្ងៃថ្មីខេមរាយើងប្រែ

បោះខ្សែដៀវបែរឆក់ភ្លេងបរទេស។

ជាតិគេរក្សាអត្តសញ្ញាណ

ខ្មែរយើងវឹងថ្កានប្រាណលង់ទ្រនេស(១)

សម្បត្តិដូនតាអាត្មាបែរធ្វេស

តន្ត្រីបរទេសទើបមានតម្លៃ។

ខ្សែដៀវអាណិតធាតុពិតខេមរា

ធ្លាប់មានសក្តាអស្ចារ្យស្កឹមស្កៃ

ហេតុអីបុត្រខ្មែរបង្អាប់ស្មើដី

រួចផ្តល់តម្លៃបរទេសស្មើមេឃ?

ខ្សែដៀវនាវចិត្តអស់បុត្រខេមរា

ឧិ!បុត្រធិតាគប្បីត្រងត្រេក

រក្សាសម្បត្តិជាតិយើងល្អឯក

ទោះបរទេសប្លែក សូមកុំជាន់ខ្លួនឯង!!!

ពន្យល់ពាក្យ៖

លង់ទ្រនេស៖ លង់ + ទ្រនេស

ទ្រនេស មកពីពាក្យ ទ្រនេសធ្វំ ទ្រនំធ្វេស

លង់ទ្រនេស មានន័យថា ដេកលង់ក្នុងក្តីធ្វេសប្រហែស

អ្នកស្រី កែវ ច័ន្ទបូរណ៍