五秒法則

士多啤梨跌落地。五秒法則話，五秒執返，安全食用唔使洗。

五秒法則、三秒法則之類，都市傳說一則，講笑一則，講食物衞生，話啲嘢食跌落地五秒之執返，仍然可以食，過咗就污染唔食得。三秒五秒定其他秒，法則、規則、定律，都講同一樣嘢，總之幾秒內食得。唔止食物，餐具都用得返，唔使洗。呢則傳說經已好耐，但大概萬維網傳閱而流行。

科學並不贊同法則 ，由接觸嗰吓經已傳咗大量微生物。確然掉落地，微生物量會隨住時間增加，而地板乾淨就少病原體。一般睇法，祇要跌咗落地，就有可能掂到病原體，認為唔安全。不過，大部份微生物都唔會致病，而人胃酸非常之強，會擋到好多病原體，但身體免疫力一弱，食咗胃藥，就唔係咁講。科學上又有相反睇法，諗為泥土微生物有益健康，改善免疫力，皮膚微生物多樣，腸道微生物多樣。另外地下唔一定特別多病原體，例如手就可能多過佢。

法則來源唔清楚。有推測話來自成吉思汗傳說，大汗畀嘢食跌幾耐就幾耐，仍然好食。五秒法則，至少一九八〇年已登上雜誌，話五秒法則廢話。 廣東話都類似講笑，大菌食細菌、細菌當補品。

史

成吉思汗裁定，食物掉落地，大汗話食得就食得。

五秒法則點來唔清楚，但唔係新嘢。老人家傳說，上溯到十三世紀蒙古成吉思汗。傳說講，成吉思汗為啲將軍準備宴會時，嘢食物跌落地，成吉思汗畀食就食得。嘢食有資格畀成吉思汗準備，就算跌落地幾耐，都有資格畀人食。

五秒法則，至少要到微生物致病論之後，先至有意思。喺之前，祇要睇落唔污糟，就可以食用。至於五秒，就可能抄自籃球，籃球唔能持波五秒，亦即五秒之內可以，但亦有話無關。

一九八〇年發現雜誌，就咁講，所謂五秒法則，無啲咁嘢。嘢食一跌落地，細菌根本唔需要時間，即刻就污染咗。

二千年打後，五秒法則傳說流行，就得學術關注，有公共衛生建議，有社會學效應。

牛津英文字典就歸佢入搞笑類，話佢假想法則，限時之內，嘢食跌咗，可以執返來食。舉一九九五年二十秒法則，可以食得。又舉二〇〇二年十秒法則，安全食用

世界類似語句

世界各地都有啲慣用句，形容食到污糟嘢就咁講。

• 粵語。大菌食細菌，細菌當補品。
• 漢語。不乾不淨，吃了沒病。
• 台語。垃圾食，垃圾肥。

• 葡萄牙語。O que não mata, engorda.。殺你唔死，搞到你肥。
• 西班牙語。Lo que no mata, engorda.。殺你唔死，搞到你肥。
• 西班牙語。Chancho limpio nunca engorda.。豬乾淨永遠唔肥。
• 南方德語。Dreck macht Speck.。雙重意思，污糟會變煙內、污糟會變肥膏。
• 德語。Dreck reinigt den Magen.。污糟整乾淨個胃。
• 德語。Was Dich nicht umbringt, macht Dich stärker.。殺你唔死，就更強壯。
• 瑞典語。Lite skit rensar magen.。少少污糟幫你整乾淨胃。
• 荷蘭語。Zand schuurt de maag.。砂幫你擦乾淨個胃。
• 英語。You'll eat a peck of dirt before you die.。你死之前，會食到成一大堆塵。指九公升。
• 英語。God made dirt, dirt don't hurt.。上帝造塵土，塵土無害。
• 俄語。Зараза к заразе не пристанет.。污糟嘢傷唔到污糟人。
• 丹麥語。Man skal have syv pund skidt om året.。人一年要食七磅污糟嘢。