伊朗门事件

伊朗门事件（英语：Iran-Contra Affair），也叫军售伊朗丑闻，是1980年代中期美国罗纳德·里根政府偷偷叫卖军火拨伊朗，後首底拨曝出来而引起个一场老大个政治丑闻。

事体经过

1983年开始，有十多名美国公民拨黎巴嫩真主党绑票。美国中央情报局（CIA）局长威廉·卡西从以色列得着消息，讲伊朗正勒搭伊拉克打仗，急要军火，特别是美国飞机零件搭导弹。伊朗搭真主党关系好，如果卖军火拨伊朗，好叫伊拉帮忙放人，顺便改善美伊关系。箇隻计划拨国家安全事务助理麦克法兰看中，取名“麦克法兰计划”，里根总统大概率是晓得箇桩事体个、也同意个。

因为美国国会禁止卖武器拨伊朗，所以全部交易侪是秘密通过第三方做个。1985年9月份，奥利弗·诺斯中校通过以色列拿美式装备运到伊朗。9月15号，人质就开始陆陆续续放出来哉。美国人还想办法拿卖军火赚来个钞票，偷偷叫转移一部分去支援尼加拉瓜个隻搞恐怖活动个反政府武装康特拉——箇也是违反美国国会法案个。

1986年11月份，黎巴嫩一家杂志曝出箇桩事体，伊朗方面也有人证实，“伊朗门”彻底穿帮。美国国会成立调查委员会查箇隻案子，必过交关文件已经烧脱哉，关键人物也弗肯话。诺斯搭後任国家安全事务助理彭德克斯特侪讲里根弗晓得资金转移个事体，拿责任侪推勒自家身浪。调查认为里根虽然呒没直接指挥，也要负领导责任。多個当事人吃仔官司，必过上诉成功判无罪。里根本人因为已经出现老年痴呆个情况，也朆出庭作证。