全球空戰計畫

2024年喺東京國際展示中心（Tokyo Big Sight）嘅 JA2024 GCAP 展位上， 展出咗 GCAP 概念模型

全球空戰計畫（GCAP；英文：Global Combat Air Programme; 意大利文：Programma Aereo da Combattimento Globale; PACG ；日文：グローバル戦闘航空プログラム，羅馬化：Gurōbaru Sentō Kōkū Puroguramu）係一個由英國、日本同意大利領導嘅跨國空中作戰計劃，參與國共同開發第六代隱形戰機。呢個計劃旨在取代皇家空軍（ RAF ）同意大利空軍服役嘅颱風戰鬥機，同埋日本航空自衛隊服役嘅三菱F-2戰鬥機 。

喺2022年12月9號，日本、英國同意大利政府聯合宣布佢哋會開發同部署一種共同嘅戰鬥機，呢個計劃將佢哋之前分別研究嘅第六代戰鬥機項目合併：當中包括BAE系統（BAE Systems，又叫做英國航太，或者叫英國貝宜系統）領導，英國勞斯萊斯、MBDA UK、意大利嘅李安納度（Leonardo S.p.A）共同參與生產嘅BAE系統暴風雨（BAE Systems Tempest）第六代戰鬥機計劃，日本嘅三菱次期戦闘機 (F-2後継機)。喺2023年12月响日本簽署嘅條約確認咗呢個開發計劃 。

全球有大約9,000人參與呢個計劃，有超過1,000個來自三個夥伴國家嘅供應商。 當中600個供應商喺英國，而400個喺意大利同日本 。

根據目前嘅時間表，呢個計劃預計會喺2025年開始正式進入開發階段，第一架示範機會喺2027年試飛，而飛機嘅生產同埋正式服役就會喺2035年開始。

背景

日本 ( FX )

因為日本係一個島國，所以同佢嘅陸地領土面積比較，日本有比較大嘅領海，同埋比較大嘅防空識別區；喺面對區域挑戰，同人口眾多，軍費開支比較多嘅鄰國比較，日本需要用比較少數量嘅戰機艦隊去保護呢啲領土。 為咗解決呢個問題，防衞省喺2010年決定日本嘅下一代戰機必須係高度資訊化（information-based） 、智能（intelligent），同埋能夠即時作出反應（instantaneous response），即係 i³戰機。當時，航空自衛隊嘅戰鬥機艦隊主要係由三菱版嘅F-15J戰鬥機同埋三菱F-2戰鬥機組成。前者係麥道F-15嘅變種，由三菱重工（以下簡稱三菱）製造，而後者係由三菱同洛歇馬田喺1990年代根據F-16開發。 F-15J 已經確定將會俾F-35取代， 但係响 F-2 計劃喺2030年代退休之前，需要搵到一款替代嘅戰機。

因為美國喺2007年決定唔俾 F-22猛禽 出口到任何其他國家，日本需要揾國內嘅解決方案，發展新戰機去取代佢哋依家用緊嘅三菱 F-2 機隊。由2000年代中期開始，日本開始資助各種涉及戰機設計嘅研究計劃，最終喺2016年4月22號三菱X-2心神驗證機試飛成功。呢項研究同埋喺 X-2計劃入面收集到嘅數據將會幫到日本主要嘅戰機三菱 FX 計劃嘅開發工作。 IHI 公司喺2018年完成咗 i³戰機嘅XF9引擎樣板。 2018年，喺美國拒絕出口 F-22 之後嘅十幾年之後，洛歇馬田提出咗一個日美合作項目，開發基於 F-22同F-35嘅 F-2後繼機，但係呢個計劃俾日本拒絕。

三菱 F-X 嘅藝術印象圖

英國同意大利（暴風）

2010年嘅戰略國防同安全評估（Strategic Defence and Security Review, SDSR）概述咗英國致力確保，喺2020年代，英國空軍將會運作一支快速噴射機隊，呢支機隊會由當時啱啱交貨嘅颱風戰鬥機、當時就快交貨嘅 F-35，同埋配合一群無人戰鬥機同偵察機做補充。喺2015年嘅 SDSR嘅籌備過程中，英國開始進行一個為期兩年嘅未來戰鬥空中系統（ Future Combat Air System ，FCAS ）計劃，以檢查英國空軍喺2030年代之後需要嘅平台同系統嘅組合，探索包括用新嘅無人戰鬥空中車輛（Uncrewed Combat Air Vehicles，UCAV ）配合額外訂購嘅 F-35或者、延長颱風戰鬥機嘅使用壽命，或者係設計一款全新嘅戰鬥機。

2010年英國同法國簽訂《蘭加士打府條約》（Lancaster House Treaties），兩國同意合作尋求發展無人駕駛嘅系統，因為雙方都想喺2030年代，取代佢哋用緊嘅台風戰鬥機同陣風戰鬥機。 到咗2012年，兩國開始一齊資助一項由貝宜系統同埋達梭航太（Dassault Aviation）做嘅探索無人駕駛技術研究；喺2014年，兩國同貝宜系統、達梭航太、泰雷茲（Thales）、 Selex ES、勞斯萊斯同賽峰集團（Safran S.A.）簽咗一份價值1.2億英鎊嘅合約，英國同法國承諾各自提供 4000 萬英鎊嘅國家資金嚟做一項為期兩年嘅無人航空作戰系統（Unmanned Combat Air System，UCAS）嘅可行性階段研究。 呢項研究係為咗檢討兩國可能會一齊用嘅 UCAS 嘅概念同選項，呢啲概念同選項會借鑑當時兩國做咗出嚟嘅示範方案，特別係神經元無人作戰飛機（Dassault nEURON）同BAE系統雷神無人機（BAE Systems Taranis）。呢項研究原定喺2016年底完成，亦可能會整一個新嘅示範平台同飛行測試活動。最終目標係喺2030年代採購聯合發展出嚟嘅 UCAV 能力，同埋研究將呢項技術整合到未來嘅載人平台嘅可能性。 2015年嘅 SDSR 引發咗未來空中戰鬥系統技術計劃（ Future Combat Air System Technology Initiative，FCAS TI），呢個空中戰鬥技術計劃最終會由三個核心部分組成：國際項目，包括同法國嘅聯合工作；國家項目；同埋一個開放式任務系統架構項目。到咗2016年5月，兩國宣布可行性研究完成，會再耗資15.4億英鎊喺2017年之前整一架 UCAV 嘅原型機。

响2017年7月，法國同德國決定一齊研究一款新嘅戰鬥機，嚟取代佢哋依家用緊嘅陣風同颱風戰鬥機隊。 呢款戰鬥機最終會發展成為多個歐洲國家嘅未來空中戰鬥系統（Future Combat Air System，FCAS），當中會包括一款　新嘅第六代戰機。 呢個宣布最初令人對 FCAS 示範計劃嘅發展有所懷疑，原因係因為2016年英國脫歐公投脫歐公投嘅結果係英國會退出歐盟 。後來喺2018年初澄清咗，英法嘅 FCAS 示範機計劃仍然持續緊，而法國會繼續同英國一齊開發一款無人戰鬥機，同埋同德國一齊發展一款有機組人員嘅戰鬥機，用嚟取代陣風戰鬥機。

喺2018年7月16號嘅法恩堡國際航空展（Farnborough International Airshow）期間，BAE系統展示咗一架「暴風雨」（BAE Systems Tempest）嘅模型，呢架係BAE系統領導嘅第六代戰鬥機計劃，佢將會喺2030年代中至後期取代英國空軍依家用緊嘅颱風戰鬥機。 呢架戰鬥機係由一個叫做 Team Tempest 嘅工業聯盟一齊整嘅，呢個聯盟由BAE系統、勞斯萊斯、李安納度英國（Leonardo UK）同 MBDA UK 組成，佢哋同國防部、英國皇家空軍嘅快速能力辦公室（Rapid Capabilities Office）合作開發呢架戰鬥機。 英國政府嘅空中戰鬥策略報告概述咗維持空戰技術嘅技術優勢對英國嘅重要性，同埋維持英國主權空戰產業嘅重要性，截至2016年，英國空中戰鬥產業嘅年營業額達65億英鎊，製造咗18,000個直接工作機會，同埋更廣泛嘅供應鏈之中嘅28,000個工作機會。呢個策略強調，如果唔投資國內技能同技術，英國國內空戰部門就會萎縮，導致失去重要嘅主權能力。

喺2019年2月，英國同法國之間嘅早期 FCAS UCAV 示範計劃似乎已經從原本嘅一齊開發同生產 UCAV，降級到純粹嘅技術示範同研究，而法國反而選擇同德國建立更緊密嘅空戰技術國防夥伴關係 。

喺2019年7月19號，瑞典同英國簽署咗一份諒解備忘錄（ MoU ），一齊合作制定兩國嘅未來空戰平台。 喺9月11號，响倫敦展覽中心（ExCeL）舉行嘅2019年國際國防同安全設備展覽（DSEI 2019）期間，意大利正式加入咗暴風雨計劃。 喺2020年，瑞典同英國確認咗佢哋發展 FCAS 嘅諒解備忘錄，瑞典嘅SAAB會投資 5000 萬英鎊，喺英國起研究中心；但係亦有報導認為，呢個並唔係代表瑞典或者 SAAB 已經簽署加入暴風雨計劃。 喺2021年12月21號，英國、意大利同瑞典簽署咗一份關於 FCAS 嘅合作三邊諒解備忘錄。

暴風戰鬥機嘅模型

暴風雨計劃會探索好多新技術，包括：

• 定向能量武器
• 擴張實境駕駛艙 - 控制方案方面，暴風雨戰鬥機幾乎冇實體嘅控制嘅開關，而係透過機師頭盔嘅顯示器做虛擬顯示。噉樣可以減輕飛機嘅重量，同埋通過軟件嘅方法增加可升級性，亦都比傳統嘅平面屏幕可以提供俾機師更多額外嘅資訊。呢啲額外功能包括互動性嘅檢查，例如動作控制同眼動追蹤。
• 生物識別同心理分析監測 - 監測機師喺戰鬥同訓練期間嘅健康狀況，用嚟識別機師是否面對壓力、混亂、認知負荷，同埋缺氧或G-LOC等問題。
• 有人無人組隊 - 好似暴風雨呢類有機組人員嘅飛機，會同啲叫做「副手」嘅無人飛機（ UAV ）合作（喺其他飛機計劃入面亦都稱為忠實翼隊或者遙控武器載具）
• 人工智能（ AI ） - 又叫做智能虛擬助理（ IVA ），可以喺某啲操作或者情況下幫手操作飛機或者處理數據。

大部分預計用喺暴風雨計劃上面嘅技術最初都會喺兩個唔同嘅平台上面做測試。第一架係「 Excalibur 」，佢係一架由英國公司 2Excel 同李安納度嘅英國分公司，合作改裝嘅波音757-200，用嚟驗證會喺新戰鬥機上面用嘅技術，包括戰鬥機鼻部嘅空氣動力學設計同埋測試飛機嘅感應器設計。 第二架係一架喺2022年宣布開發嘅載人超音速示範飛機，預計會喺2027年左右可以飛，呢架飛機除咗其他技術之外，仲會測試埋隱形嘅性能。

預計呢個計劃會喺2025年前攞到資助同製造安排，預計飛機嘅投入日期係2035年。

發展

初步項目

為咗保持空中控制力量，維持英國喺呢個行業嘅全球領導地位，英國需要一架新嘅戰機嚟取代颱風戰鬥機，國際合作喺一個分擔成本嘅方法。 其中英日雙方早喺2017年就開始討論將佢哋各自嘅戰機開發工作結合埋一齊，以降低佢哋嘅整體開發成本。 喺2021年12月，英國同日本宣布佢哋會合作一齊生產一架新戰機嘅示範引擎，佢哋亦都簽咗一份合作備忘錄，一起探索未來空戰技術。 喺2022年2月15號，兩國之間達成咗一項進一步嘅協議，一齊開發適合雙方嘅戰鬥機用嘅感應器系統，呢個系統叫做「日本同大英帝國通用先進射頻系統」（Japan and Great Britain Universal Advanced RF ），簡稱 JAGUAR 。

喺2022年7月，路透社引述匿名消息來源報導，英國同日本嘅呢兩個合作項目入面，雙方已經接近達成協議，將英國嘅暴風雨同日本嘅 F-X，結合成為一個聯合計劃。 喺2022年12月9號，當時嘅英國首相辛偉誠正式宣布，暴風雨同 F-X 計劃將會合併成為一個共同項目，英國同日本一齊整一款叫做「全球空中戰鬥計劃」（Global Combat Air Programme，GCAP）嘅共同多角色戰機，呢個被證明係正確嘅。 預計整出嚟嘅戰鬥機亦都可以出口，用增加生產數量嘅方法嚟進一步降低每架飛機嘅成本。

呢個計劃嘅成員國之間有平等嘅夥伴關係。喺英國，BAE系統係主要承包商，佢亦都會負責整機身，勞斯萊斯負責整引擎，李安納度嘅英國分公司負責電子部分，MBDA UK 會負責武器系統。喺日本，三菱重工會係主要承包商，由 IHI 公司負責引擎，而三菱電機負責電子設備。喺意大利，李安納度係主要承包商，而 Avio Aero 會負責引擎，而 MBDA 意大利會負責導彈開發。 喺2024年，每間公司嘅詳細開發同成本分攤都會確定，生產將會喺2030年左右開始，而第一架飛機將會喺2035年部署。

新成員

瑞典

喺2022年12月下旬，即係 GCAP 宣布咗之後嘅兩個禮拜，日本同瑞典簽咗一份「國防裝備同技術轉移協議」（Agreement on the Transfer of Defence Equipment and Technology），呢份協議將會探討兩國之間更深層次嘅雙邊關係。呢個舉動亦都令到外界猜測瑞典可能成為 GCAP 嘅成員，目的係取代佢哋用緊嘅紳寶 JAS 39 獅鷲戰鬥機，原因係瑞典之前已經同英國同意大利嘅 FCAS 項目嘅暴風雨戰鬥機計劃合作過。 不過，喺2023年3月，幾位曾經參與過 GCAP 嘅行業人士對瑞典加入 GCAP 提出懷疑，佢哋指出瑞典對 FCAS 嘅概念同英國或者意大利嘅觀點唔太一致 。

喺2023年12月，一位瑞典官員喺國際戰鬥機會議期間宣布，瑞典經過幾項研究同相關嘅規劃之後，要到2031年先至會決定取代「獅鷲」嘅未來戰鬥機。 佢亦都提到瑞典喺一年前就離開咗同英國同埋意大利嘅雙邊同三邊討論，但係佢無講呢個決定嘅原因。雖然呢個決定唔排除瑞典將來會再次參與 GCAP 計劃，但係延遲加入呢個計劃可能會令瑞典失去咗對 GCAP 計劃喺設計同規格方面嘅影響力。

沙地阿拉伯

喺2023年8月11號，金融時報報導，沙地阿拉伯推動緊加入呢個計劃嘅進程。 據報，英國同意大利對呢個諗法持開放態度，但係日本就堅決反對；日本認為沙地嘅加入會係一個複雜嘅問題，唔只會影響日本嘅國防產品出口，亦都會影響2035年成功生產飛機嘅整體進度。國防消息人士亦都擔心，如果沙地成為計劃嘅成員國，會令敏感技術嘅安全性變得複雜；另外，沙地對計劃嘅潛在技術貢獻能力亦都成疑。

喺9月15號，李安納度嘅首席執行官話沙地阿拉伯唔會成為 GCAP 嘅核心合作夥伴；根據路透社報導，喺回應沙地是否會成為計劃嘅合作夥伴嘅問題嗰陣，佢哋話「呢個係英國、日本、意大利嘅計劃，就係咁多，宜家無其他新成員」（The programme is (for) UK, Japan, Italy, that's it. There is nothing else at the moment）。

喺2024年2月喺沙地阿拉伯舉行嘅世界防衛展期間，沙地政府軍事工業總局（ General Authority for Military Industries，GAMI ）嘅局長Ahmad Al-Ohali表示，沙地仍然「非常熱衷」想參與 GCAP ，但佢又強調呢個只有喺可以「本地化」嘅情況下，同埋喺沙地阿拉伯嘅國防工業可以有意義噉參與呢個計劃嘅情況下，先可以發生。呢個被外界視為係一個沙地想確保，到2030年，國防支出嘅至少50 %係國內生產嘅。

喺2024年7月下旬，李安納度嘅首席執行官 Roberto Cingolani 表示，如果英國決定減少佢嘅承諾，尤其係如果喺英國新工黨政府完成國防支出審查之後，「有一定嘅資源重新分配」，佢會對沙地阿拉伯加入持「個人非常開放」 嘅態度。

喺2024年巴西舉行嘅20國集團峰會上，意大利、英國同日本嘅領導人就 GCAP 進行咗討論，包括沙地阿拉伯嘅潛在參與。意大利首相佐治亞梅洛尼（Giorgia Meloni）、英國首相施紀賢（Keir Starmer）同日本首相石破茂（Ishiba Shigeru）喺談判期間重點討論合作框架，處理咗成本分擔同技術轉移等關鍵問題。 預計會談會喺年底結束，意大利外長 Antonio Tajani 確認沙地阿拉伯好可能會加入呢個計劃 。

喺2025年2月13日，李安納度嘅聯合總監 Lorenzo Mariani 同國防新聞講，沙地阿拉伯可以透過增強佢哋依家嘅航空航天能力嚟增加佢哋潛參與 GCAP 嘅機會。繼一月簽署咗一份加強工業合作嘅諒解備忘錄之後，透過同李安納度就NH90直升機同埋/或者額外嘅颱風戰鬥機訂單嘅合作，沙地阿拉伯可以建立飛機核心部件嘅組裝生產線；呢啲提前建立嘅技術知識，將會令沙地可以喺 GCAP 計劃上發揮到生產性作用。

德國

喺2023年11月1號，泰晤士報話德國考慮緊放棄佢同其他核心成員國法國同西班牙嘅1000億歐元 SCAF 計劃，改為加入 GCAP 計劃。 據講，原因係喺 SCAF 計劃嗰度，持續嘅知識產權同工業參與問題，同埋其他歐洲計劃嘅，例如防空同德國採購F-35A嘅問題，令到合作嘅緊張關係蔓延。 不過，Shepard News 報導，呢次「洩密」可能只係德國嘅談判策略，用嚟向法國同西班牙施壓，想佢哋滿足德國對計劃嘅要求。同時亦有評論懷疑德國係咪能夠加入 GCAP ，尤其喺考慮到 GCAP 嘅負責人之前嘅聲明，至少德國唔能夠好似佢喺 SCAF 入面嘅成員地位一樣。

澳洲

喺2024年12月，有報導話英國正邀請澳洲參與呢個計劃。 喺2025年3月27號，喺澳洲愛華隆機場國際航展期間， GCAP 聯盟向澳洲皇家空軍（ RAAF ）嘅官員進行咗一個資訊簡報會。不過，英國皇家空軍嘅副元帥 Nicholas Hogan 話，雖然 GCAP 計劃令人興奮，但係喺依家呢個階段仍然有太多未知數，唔可以向政府提出有關呢架飛機嘅設計選項。

合資同公司結構

GCAP 國際政府組織

喺2023年9月12日，三個國家簽咗一份三方合作協議，嚟支持呢個計劃嘅長期工作安排同埋能力要求。 三個月之後，即係2023年12月14號，同埋喺最初達成 GCAP 協議之後嘅十二個月，三方喺東京簽咗一份研製飛機嘅國際條約。 呢份條約確定咗之前嘅報導，呢個合作項目嘅總部同埋工業中心會設喺英國。項目嘅第一位行政總裁會係日本人，呢個商業實體嘅第一位領導人會係意大利人。 三個國家亦會成立 GCAP 國際政府組織（GCAP international Government Organisation ，GIGO ），一旦各國嘅國會批准呢份國際條約，呢個組織就會負責管理呢架戰機嘅開發。 《2024 日本防衛白皮書》概述咗，GIGO 會首先將派遣嘅技術官員嚟做項目嘅技術專家，又會建立一個精細同安全嘅工作環境，以確保飛機嘅開發過程順利可靠，各個合作伙伴同埋各個相關政府嘅代表，每日都會透過面對面或者視像會議，嚟溝通同埋交換訊息，同埋同每個相關政府嘅代表進行諮詢 。

喺2024年3月6號，日本首相岸田文雄同参議院預算委員會講，需要做額外嘅國防相關出口改革，嚟降低 GCAP 項目所涉及嘅生產成本，支持日本嘅國家安全，同埋確保日本可以喺國際舞台上被視為可靠嘅國防夥伴。 另外，據報道，首相亦強調，意大利同英國都考慮緊推銷項目嘅成品俾第三國，用增加產量嘅方式嚟降低成本，佢哋要求日本採取類似嘅方法。 喺2024年3月15號，日本國會同意修訂嚴格嘅國防出口規則，准政府將國防技術同設備出口，包括呢架同英國、意大利一齊開發嘅飛機出口。 但係執政聯盟嘅公明黨對呢個決定有所保留，佢哋認為呢個決定唔符合佢哋黨嘅和平主義政策。 日本嘅眾議院喺2024年5月批准簽署東京條約，之後眾議院喺2024年6月5號亦都批准咗，GIGO 正式成立。

《2024 日本防衛白皮書》概述咗日本對加入 GCAP 所帶嚟嘅國防設備同技術轉移政策嘅修訂。 對於將成品飛機轉移去第三國（ GCAP 成員國以外嘅國家）嘅問題，文件指出，好似 GCAP 呢類聯合開發計劃係假設所有當事人對要求同性能都有平等嘅貢獻，而由於英國同意大利認為促進成品轉移去第三國係一個重要嘅貢獻，所以佢哋亦都期望日本會做出類似嘅貢獻。為咗確保符合英國同意大利嘅要求，即係可以出口飛機，用規模經濟嘅方法，嚟進一步降低成本，日本需要建立一個機制，令到呢類軍備轉移能夠進行。為此，日本修訂咗原本喺2024年4月制定嘅現行國防裝備同技術轉移三原則同埋相關嘅實施指南。呢啲修訂包括咗涵蓋 GCAP 嘅指引，並且就 GCAP 出口創造咗防衛裝備轉移三原則：

（一）澄清禁止轉移嘅地方（第一原則），禁止海外轉移國防裝備嘅情況包括：

1. 違反咗日本簽咗嘅條約、國際協定裡面要求嘅義務；
2. 違反聯合國安理會決議所規定嘅義務；或者
3. 轉移到捲入咗衝突嘅國家。

（二）對可能批准嘅轉移個案嘅限制，同埋嚴格嘅審查同資訊披露（第二個原則），可以轉移嘅案件只限於：

1. 可以為積極咁促進和平作出貢獻同國際合作嘅案例；
2. 可以幫到日本安全嘅案例。

另外，已經決定咗嘅重要案例會喺國家安全理事會處理，同埋會披露有關案例嘅資料。

（三）適當嘅控制（第三個原則），確保對特殊用途或者轉移到第三方國家嘅武器作出有效嘅監管同控制。

喺2024年10月14號，國防大臣 Luke Pollard 宣布英國批准咗 GCAP 公約，喺2024年9月成立 GIGO。 喺2024年11月12號，意大利議會亦都批准咗 GCAP 公約 。

喺2025年1月15號，英國國防部宣布， GIGO 嘅總部將會喺雷丁，並由日本防衛審議官岡真臣（Oka Masami）做第一任執行長，負責領導。

合資

喺2024年12月13號， GCAP 嘅三個國家工業合作夥伴宣布成立一個商業合資企業，負責設計、開發，並且喺2030年代中期交付飛機，預期飛機會服役至2070年之後。 BAE 系統、日本航空機産業振興株式会社（ JAIEC ）同李安納度分別持有呢個合資企業嘅33.3 % 股權；呢個協議會先俾各國嘅監管機構批准，然後喺2025年中正式成立合資公司；呢間公司總部會喺英國，同 GIGO 一齊。

喺2024年12月，李安納度表示，佢已經同意大利嘅分包商簽咗價值1億歐元嘅 GCAP 相關研發合約，而意大利國防部已經為呢個計劃撥款88億歐元。 李安納度話佢哋會係飛機開發嘅四個領域嘅領導者：飛行系統整合、武器整合、訓練整合，同埋任務系統當中嘅兩個子系統：武器效果管理系統同飛行控制系統。 李安納度強調會用一種新嘅合作方式去開發第六代戰機，用一個創新模式，令到三個國家實體可以一齊合作，每個領域領先嘅國家互相協調；三個國家嘅工程師喺唔同嘅地點一齊合作。同時，飛機嘅傳統技術元素將會分配俾單一國家嚟做開發。

意大利嘅主要地點將會係 Torino Caselle，呢度係颱風戰鬥機裝配線嘅所在地，但係電子同航空電子嘅相關工作會分佈喺李安納度喺羅馬、Pomezia、佛羅倫斯同 Nerviano 嘅所在地。喺現階段做緊 GCAP 項目嘅9000人當中，有3000個係意大利人。 李安納度強調網絡安全，無論係對飛機本身，定係對開發飛機嘅設施嚟講，嘅重要性。

概念階段

技術示範

暴風空戰示範

喺2023年6月，英國嘅工業合作夥伴分享咗佢哋喺「暴風」項目嘅技術示範件，類似嘅示範件會用喺新項目。 喺呢個時候，喺 BAE 嘅 Warton 設施嘅模擬器上面已經做咗150個鐘模擬飛行時間嘅初步飛行試驗；而 BAE 亦都聲稱，透過用自動編碼，喺模擬器入面用同埋測試嘅重要系統軟件，只需要幾日，而唔係幾個星期嚟整好。同時，勞斯萊斯宣布佢哋用咗一個 EJ200引擎去測試一個由 BAE 開發嘅新 S 形隱形進氣口/管道。 最後，馬丁貝克（Martin Baker）同 BAE 用咗個模型駕駛艙嚟做咗初步嘅緊急彈射座椅試驗。

喺2023年7月， BAE 話總共有60個技術示範項目做緊。 至於實際嘅示範飛機， BAE 強調需要測試隱形特性同武器艙嘅運作，但亦都強調 BAE 仍然對到底係用雙引擎定係單引擎嘅設計持開放嘅態度。

據報喺2024年7月24號，喺通過咗一個重要嘅設計審查之後，BAE 已經開始整呢隻可以飛嘅技術示範飛機。 架飛機嘅大部分零件都會喺英國生產，有超過100個供應商參與。製造過程利用咗熱等靜壓機同埋3D 打印技術嚟減少鍛造品相關嘅材料浪費同埋可以縮短交貨時間。 預計呢架示範機會有一個整合嘅武器艙，呢個係自 Blackburn Buccaneer 之後，第一次再喺英國製造嘅飛機上面用，而 MBDA UK 會協助武器整合。 同時，勞斯萊斯將會提供兩部由國防部捐贈嘅 EJ200引擎嚟為示範車提供動力。 呢架飛機亦都會係第一架利用 PYRAMID（金字塔） 航空電子設計架構嘅飛機。 國防部喺2021年10月首次披露，金字塔係一個可重用嘅開放式任務架構系統設計，目標係透過專注喺一種基於軟件嘅方法，同埋可以同其他行緊金字塔架構嘅平台兼容，令飛機嘅航空電子升級更簡單、更平同更快。 另外，據報，示範機嘅模擬試飛時間已經做咗總共215個鐘。雖然呢部技術示範機嘅開發係英國做嘅，但係所學到嘅技術將會用喺 GCAP ，就好似幾年前嘅日本三菱 X-2 一樣。 呢架技術示範機嘅尺寸仲未公開，但係從 BAE 公開展示嘅引擎管道嘅大細，估計呢架飛機可能比颱風戰鬥機大咗三分之一。

王者之劍飛行試驗機

喺2023年7月14號，英國皇家空軍俾咗一份價值1.15億英鎊嘅合同李安納度英國同2Excel航空，令到王者之劍（Excalibur）飛行試驗機（ FTA ）可以做第二階段嘅開發；佢哋會買第二架波音757，將佢改裝成王者之劍；呢個改裝將會基於喺2021至2022年間對上一架757機身嘅解構分析嘅結果。王者之劍預計會喺2026年開始測試。

喺2024年12月9號，王者之劍飛行試驗機成功完成咗第一階段嘅改裝同飛行測試，而呢架飛機已經安裝咗側艙同腹艙，用嚟裝載由李安納度英國同佢嘅國際合作夥伴一齊開發嘅綜合感應器、非動動能效應（Integrated Sensors, Non-Kinetic Effects，ISANKE）同綜合通訊系統（Integrated Communications Systems，ICS ）等系統。預計王者之劍亦會配備一個戰鬥機式嘅鼻錐，用嚟整合雷達示範器。

引擎示範機

喺2024年法恩堡航空展覽會期間，勞斯萊斯表示，佢哋整緊戰鬥機嘅全規模地面引擎示範機。 呢個示範器係同意大利 Avio Aero 同日本 IHI Corporation 合作開發，用嚟做初步測試三間公司嘅技術兼容性，同埋生產引擎嘅共同設計工具、設計流程同審計流程。 將來，呢架示範機會升級成為生產型號戰鬥機嘅動力同推進系統試驗床。

飛機設計概念

喺2022年 GCAP 展示咗初步嘅設計概念，佢係一架大型、雙引擎、隱形嘅飛機，機翼用咗獨特嘅曲三角翼設計。不過，喺2024年7月22號，喺法恩堡航空展覽會嗰度，展出咗一架1:1比例嘅模型，架模型用咗更新嘅機身設計。模型顯示出重新設計嘅機翼，用咗真正嘅三角形設計，而且機翼大咗，增加咗燃料嘅容量（航程遠咗）、武器容量大咗同速度快咗。雖然官方仲未發佈呢架戰機嘅尺寸特性，但係《珍氏防衛週刊》嘅 Gareth Jennings 喺出席呢個比例模型嘅揭幕禮上面，用佢同 F-111土豚嘅19米翼展做比較。 GCAP 官員強調，呢個仍然係一個概念模型，所以唔代表完成嘅設計。 官員亦強調，喺呢個計劃嘅幾十年生命期內，可能有幾萬人會參與 GCAP ，並分享佢哋嘅諗法，即係到咗2060年之後，呢架飛機仍然會全速生產。 BAE 嘅 Herman Claesen 表示，目前呢架飛機嘅設計理念係，唔打算有任何指定嘅全面運作能力（ FOC ）日期。 Claesen 解釋，同傳統嘅空中系統相比，呢架飛機嘅開放式架構設計，可以簡化飛機喺整個服役期間嘅升級程序。

喺2025年2月5號，英國透露咗龍捲風2號暴風雨（Tornado 2 Tempest，T2T）項目，呢個項目將英國皇家空軍退咗役嘅龍捲風攻擊機艦隊嘅零件拆出嚟、回收改裝成新嘅複雜零件，可以用喺未來嘅新戰機上面。 呢個計劃係為咗睇吓國防部剩餘資產當中，係唔係仍然有啲有用嘅戰略材料，例如高質素嘅鋼、鋁同鈦，係咪可以霧化成粉末嘅「原料」，用嚟製造新嘅零件。 咁樣做嘅潛在好處係可以重用依家貨倉嗰度已經有嘅金屬，增加關鍵同高價值金屬嘅供應，可以用比之前嘅舊工藝更好嘅新工藝，將啲舊材料，整成更輕、更穩陣同更襟用嘅新零件。T2T 展示咗將龍捲風嘅噴射引擎壓縮器車葉用嘅鈦，清理同霧化，然後用嚟 3D 打印成為新嘅壓縮器車葉同鼻錐，然後勞斯萊斯將呢啲壓縮器裝喺 Orpheus 測試引擎入面，然後喺測試條件下成功運行（ Orpheus 係勞斯萊斯嘅一個計劃，目的係要探討設計、開發同生產推進系統嘅新概念）。T2T 亦展示咗一個數碼產品護照系統，採集同記錄材料來源同生命週期數據，可以令到有關材料能夠更明智咁分配，同埋防止唔小心用咗假或者唔適合嘅材料。

喺2025年3月12號，有報導話李安納度預計到2035年會收到350架飛機嘅定單。相較之下，將意大利、英國同日本嘅颱風同 F-2艦隊結合起嚟，就可以得到三個核心夥伴國家嘅最低需求，即係290架。

喺2025年4月1號，國防部代表喺一個訪問嗰度詳細講解咗呢架飛機嘅一啲預期能力，包括武器嘅有效搭載量大約係F-35As嘅兩倍，搭載足夠嘅感應器去獨立形成殺傷鏈，同埋有足夠算力嚟控制低成本無人機，同時喺深入敵方領土嘅時候，喺同傳統支援系統（例如波音E-7「楔尾鷹」空中預警機）嘅連接受到限制嘅時候，仍然能夠保持存活能力。就飛機嘅航程嚟講，佢可能可以用飛機裏面裝咗嘅燃料，穿越大西洋，唔似颱風戰鬥機咁需要加油三、四次。

系統上嘅系統

截至2024年， GCAP 只係專注喺研究同開發第六代戰機，而各個夥伴國家並冇公開表示佢哋打算喺類似歐洲嘅 FCAS 等嘅更廣泛嘅空戰系統計劃上面有更廣泛嘅合作，所以喺開發更廣泛嘅武器資產，即係無人機系統，到依家都係各自為政（例如英國嘅 LANCA 計劃）。

喺2024年3月中，喺一個新聞發布會上面，李安納度嘅首席執行官 Roberto Cingolani 批評英國喺採購更廣泛嘅 GCAP 系統系統嘅細節方面缺乏透明度，而機組戰鬥機組零件嘅製造同開發責任，對於各個合作夥伴公司嘅製造同開發責任等，仍然唔太確定 。

喺2024年7月法恩堡航展期間，據報空中巴士建議，佢嘅翼人無人機輔助裝置（Wingman Unmanned Adjunct， WUA）可以喺計劃嘅工業合作夥伴嘅協助之下為 GCAP 開發。空中巴士亦都強調，呢個唔會同佢作為 FCAS 嘅主要工業合作夥伴而發生衝突，因為 WUA 係佢哋嘅一個完全獨立同自資嘅項目。

類似嘅項目

• Next Generation Air Dominance (NGAD) - US Air Force's sixth-generation fighter programme.
• F/A-XX - US Navy's sixth-generation fighter programme.
• Future Combat Air System (FCAS / SCAF) - European (French / German / Spanish / Belgian) sixth-generation fighter programme.

睇埋

• 英國皇家空軍嘅未來

外部連結

• 李安納度官方網站
• 喺 BAE 系統嘅官方網站