單程路

二〇一二年喺香港影到嘅一條單程路；反方向唔准入。

二十一世紀初喺紐約市影到嘅單程（英文：one way）路牌。

單程交通（當中單程粵語讀音為粵拼：daan1 cing4）係指交通淨係可以向一個方向行駛，而單程路就係道路一種，顧名思義特徵係只容許啲車輛單程行駛。要標示某條路係單程路，可以用單程路牌，亦可以索性喺條路其中一個盡頭設個禁止進入嘅牌。

喺城市規劃等領域上，單程路嘅使用有一定爭議性：單程路一般會提升交通流量，噉係因為駕駛者唔洗面對迎面而嚟嘅車流，亦唔需要應對迎面車流而轉彎；不過另一方面，居民亦可能會唔鍾意單程路，理由可能係去某啲目的地嗰陣焗住要兜遠路，而且單程路車速可能會高啲，因而對行人安全造成負面影響；有啲研究甚至話單程路根本係本末倒置，搞到好多駕駛者被迫兜遠路，反而抵銷車速提升嘅正面影響，有減低可及度之虞。

路牌

單程路嘅路口會有路牌，確保駕駛者知道條道係單程行車嘅：單程行車嘅路牌，往往係一條向上嘅箭咀，而事實係多個歐洲國家都會用藍底白箭咀噉嘅長方形單程路標誌，譬如俄羅斯就係噉；而喺三叉路口，若果主幹道係單程路，就會見到單一向左或者單一向右嘅箭咀；而喺單程路嘅盡頭，車輛禁止進入，所以要設置適切嘅路牌，寫住禁止進入、錯方向或者禁止駛入等嘅字眼，話俾駕駛者知呢條路唔准由呢個方向入，甚至可以加返個停嘅路牌。

世界多個地區嘅單程路牌：

• 
  使用德文嘅地區，好興喺單程路牌上寫單程路（上圖嗰串德文字嘅意思）嘅字眼。
• 
  加拿大
• 
  香港
• 
  美國
• 
  美國
• 
  拉丁美洲多地；Una via 係西班牙文，意思係單程噉解。
• 
  英國嘅禁止進入路牌；呢種牌可以擺喺單程路嘅其中一個盡頭。
• 
  紐西蘭嘅禁止進入（英文：no entry）路牌

應用

喺交通規劃等領域上，單程路被指係有唔少應用價值：

• 有啲路太窄，無法容納雙向行車。呢點喺某啲建築物密度高（可能難以擴闊路面）嘅地區可能特別有用。
• 防止駕駛者穿過住宅區街道，藉此繞過交通燈或者其他停車要求。
• 減少駕駛者喺住宅區遊車河，例如大部分道路設為單程而且向外，車輛冇咩入口可以進入該區。
• 限制車輛嘅流動，呢點對收費泊車系統嘅設置嚟講相當重要。
• 防止車輛出現橫過迎面車流嘅轉彎。
• 提升交通流量，有可能減少塞車嘅情況。
• 將原本雙程嘅路改為單程，攞其中一條做泊車線。
• 行人過馬路嗰陣更輕鬆，因為佢哋淨係需要望其中一個方向有冇車嚟緊。
• 用嚟做快速高速公路嘅出入口匝道。

弊病

單程路亦被指係有唔少壞處。

• 單程路系統往往會令行程長度增加，噉係因為駕駛者去到目的地之前，成日都焗住要轉多幾個彎。
• 單程路亦可能會影響公共交通路線：可能會令到巴士路線分拆去兩條唔同嘅街道，被指會增加混亂同行路距離。
• 商戶亦不時會反對修建單程路，擔心交通流向改變會有損佢哋嘅生意。

想像圖：單程路被指會提升到達目的地要行嘅距離
藍色方形係目的地，而紅色虛線箭咀係行車路線。

冇單程路嘅系統

全單程路嘅系統

參見

• 交通規劃
• 交通管制

外拎

• （香港繁體）單程路，香港運輸署
• （香港繁體）發出指令嘅交通標誌，香港運輸署；可以睇睇 10. 單程行車嗰度。