微縮模型戰棋

微縮模型戰棋係一大類嘅遊戲，特色係用微型模型代表各種部隊，並且模擬打仗嘅。通常嘅玩法係，玩家搵一拃微型模型返嚟，將微型模型以特定嘅陣式擺喺模擬戰場嘅表面上，以某啲方式決定邊個行先邊個行後，仲有係點樣攻擊以及擊破對方嘅部隊等。

嗌法

微縮模型戰棋個英文名係英文：miniature wargame，呢個名就噉字面解，可以理解為微模型打仗遊戲噉嘅意思。

特色

微縮模型戰棋嘅一大特色係結合咗玩遊戲同砌模型呢兩個嗜好：好多時，微縮模型戰棋用嚟代表戰場嘅表面都整得好細緻，令玩家可以睇到晒戰場上嘅一草一木，而且呢啲表面同埋玩遊戲用嘅模型好多時可以由玩家嚟親手砌。有啲微縮模型戰棋，好似係出名嘅戰鎚 40000 噉，就會出一啲好靚好有型嘅模型俾玩家用嚟玩隻遊戲^[1]^[2]。

規則上，大多數微縮模型戰棋都係回合制嘅，但係亦有例外。

多數微縮模型戰棋都要玩家用軟尺留意住啲部隊之間嘅距離，因為呢類遊戲係想真實噉模擬打仗，所以規則上實會重視距離同位置等嘅變數，例如可能規則指明，某個部隊手上武器嘅射程係幾多，唔能夠攻擊距離遠得滯嘅敵軍部隊。

喺多數嘅微縮模型戰棋打仗遊戲之中，模型嘅形狀只係有美術作用，但都有部份嘅微縮模型戰棋規則上會在意啲模型嘅形狀。

簡史

呢種遊戲源自於古代軍隊模擬打仗，例如古時嘅將軍同參謀成日都會將一啲棋或者模型等嘅嘢擺喺一個模擬戰場嘅表面上，用嚟思考同解釋場仗要用嘅策略－慢慢就演變成今日嘅微縮模型戰棋^[1]^[2]。

睇埋

引咗

↑ ^1.0 ^1.1 Schuurman, Paul (2017). "Models of war 1770–1830: the birth of wargames and the trade-off between realism and simplicity". History of European Ideas. 43 (5): 442–455.
↑ ^2.0 ^2.1 Warhammer 40,000 (core rulebook, 8th ed.).

[paul2017-1] 1.0 ^1.1 Schuurman, Paul (2017). "Models of war 1770–1830: the birth of wargames and the trade-off between realism and simplicity". History of European Ideas. 43 (5): 442–455.

[warhammer40000-2] 2.0 ^2.1 Warhammer 40,000 (core rulebook, 8th ed.).

[1]

[2]