時環效應

呢幅圖畫，描繪想像中時間受到某啲力量影響而扭曲。

時環（參見廿一世紀初嘅英文：time loop），又叫時間迴圈，係虛構作品入便一種常見嘅情節裝置，常見於科幻同奇幻等嘅體裁。若果某段時間形成咗時環，意思即係話故事中嘅角色會係噉重複經歷嗰段時間，有時仲會重複一次以上。呢種情況仲可以不斷重設：當某啲條件達到嗰陣，迴圈就會重新開始，當中條件可以係某個角色死亡，或者時間去到某個特定時點；有啲作品喺設定上，會講部份角色能夠保留上次迴圈嘅記憶，仲會想希望搵方法打破重複嘅循環。

呢條橋段有出現喺美國電影同日本視像遊戲等嘅多種創作品之中。

基本概念

睇埋：時間、時間箭嘴同時空穿梭

時環建基於時空穿梭等嘅科幻同科學諗頭。

舉例說明，想像阿明每日朝早返學。佢會起身、食早餐、返學、上堂、放學、然後返屋企。假想有一日，阿明發覺成日都係重複返同一日：佢朝早起身，見到鐘係搭正七點；佢去到學校，發生一模一樣嘅事；放學返到屋企，夜晚瞓咗覺；但係第二朝，佢再起身，發現個鐘又係搭正七點，日曆顯示嘅日期冇變，而且起身後發生嘅事完全一樣。

喺科幻等嘅體裁之中，時環仲可以用嚟描述一種涉及時空穿梭嘅情境，事件會形成因果關係嘅圓環：過去嘅行動導致未來嘅事件，而未來嘅事件又觸發返最初嘅時空穿梭，最後構成一個冇明顯起點嘅自足迴圈。呢個概念挑戰線性嘅時間觀，就算物理學上有關時間嘅討論，都會提到呢個概念。

作品例子

時環喺現代嘅科幻同奇幻作品中好常見。

• 《奇異博士》：二〇一六年美國電影，屬超級英雄類型；喺電影嘅高潮部份，主角奇異博士施展魔法製造時環，同巨大嘅邪惡力量多瑪暮對抗；當時故事講到，多瑪暮正想吞噬地球之際，奇異博士上前同佢交涉，多瑪暮二話不說就殺咗佢，但跟住時間就倒轉返去，不斷重複「多瑪暮準備吞噬地球、奇異博士上前見佢」噉嘅連串事件；因為多瑪暮無論點做都擺脫唔到呢個循環，最後唯有接受奇異博士嘅條件，放過地球。
• 《偷天情緣》：一九九三年美國電影；主角菲爾每日朝早醒返，發現嗰朝都係同一日，二月二號，而且每次都係得佢一個會保留記憶；無論佢點樣做，第二朝醒返都會再次重複呢一日；佢起初利用呢一點嚟為非作歹，因為就算佢偷咗嘢或者犯咗其他罪，第二朝都會 reset 返；但係後嚟佢改為利用重複嘅日子去學新技能，例如學彈鋼琴呀噉，仲開始用佢嘅能力嚟行善，變得更加好人，最後成功打破時環。
• 《最終幻想》第一部

睇埋

• 時間悖論
• 祖父悖論
• 永恆輪迴
• 蝴蝶效應

外拎

• （英文）穩定嘅時環，電視橋段網