權威控制
 | 呢篇文 需要熟悉呢方面嘅人幫手寫。 |
權威控制（英文：authority control；德文：Normdaten眾數），又稱規範控制[註 1]，喺圖書館學同資訊科學，係指將標題、分類（包括作者名、主題、地名等等）等等會用嚟搵資料嘅字眼（喺圖書館學統稱檢索點[註 2]）喺嗰間館嘅目錄入面標準化，令同一樣嘢喺目錄入面淨係會以一個形式表示，而目錄入面用呢種形式紀錄嘅每件數據亦只會代表同一樣嘢[1][2]，不過所謂嘅嘢，有需要嘅話可以係或者包含交叉參照[2]（所謂交叉參照包括分類[3]）。至於一間圖書館點樣做到呢種內部一致性，做法會係將間館嘅內部準則寫低喺一種叫權威檔[註 3]（authority file）嘅文件入面[4][2]。
統一用認可嘅標題可以解決兩類問題——如果同一樣嘢喺目錄入面只係以一個形式表示，當用家搵到嘢，就即係搵到哂間館有嘅所有資料，唔會以為搵到，其實未搵齊；相反，如果目錄入面嘅每個紀錄亦只會代表一樣嘢，當用家搵到嘢，搵到嘅嘢亦唔會九唔搭八。
｢權威控制｣ 其實同日常講嘅權威冇乜開係，而係指將目錄用嘅標題控制成 ｢認可｣（authorized）嘅標題[註 4]。
例
[編輯]
維基百科
[編輯]以美國男歌手米高積臣（Michael Jackson）做例，如果當維基百科做一間圖書館或者一個類似嘅資訊系統，｢米高積臣｣ 喺粵語維基百科可以視為係認可標題，不過喺維基百科，檢索點唔係連去書目而係直接連到相關文章；米高積遜同 Michael Jackson 亦係檢索點，但係唔係文而係跳轉，喺圖書館學算係種交叉參照；文章入面嘅分類同 ｢睇埋｣ 小節（呢篇文冇 ｢睇埋｣ 小節，但係大多數嘅文都有｣）亦係交叉參照。
決定標題係乜、分類係乜、｢睇埋｣ 小節連去邊啲文，可以當成係做權威控制。
維基數據
[編輯]上面例子有啲夾硬；冇咁夾硬嘅話，可以當維基數據係一間圖書館或者一個類似嘅資訊系統。喺維基數據，認可標題係個Q字頭號碼（米高積臣係 Q2831），但係唔同語言亦有主標籤同其他標籤，呢啲全部都係檢索點；維基數據亦有跳轉，亦係檢索點，亦係交叉參照。維基數據入面嘅數據項有唔同 ｢陳述｣，當中有啲陳述係用嚟做分類，亦即係喺圖書館學可以算係交叉參照。同維基百科唔同，維基數據嘅數據項可以視為一種書目，連去唔同嘅維基百科嘅相關文章。
Q字頭號碼係順序畀，冇得㨂，但係標籤係人手畀，點決定可以當成係做權威控制。將兩個數據項合併或者拆散等等嘅人手工序，都係做權威控制。
好多數據項其實完全冇連去任何維基百科嘅文，整呢啲數據項係事先整理數據結構，預先決定認可標題，建立交叉參照嘅相互關係，可以話係做緊權威控制。
公開嘅權威檔
[編輯]出面有一啲公開嘅權威檔，可以用嚟做參考；視乎需要同用途，呢啲權威檔喺某啲情形下可以好有用，亦可以完全冇用（例如，決定某主題嘅粵語標題應該係乜，呢啲出面嘅權威檔通常都冇用，但係可以用嚟例如核對生死日期、作品名稱等等）。下面係幾個喺維基百科同維基數據常見嘅公開權威檔：
| 權威檔 | 檢索點 |
|---|---|
| Virtual International Authority File | 27092134 |
| 德國國家圖書館目錄（德文：Katalog der Deutschen Nationalbibliothek） | 118711083 |
| MusicBrainz | Michael Jackson |
| WorldCat Identities | Michael Jackson |
睇埋
[編輯]參考
[編輯]- ↑ Block 1999, pp. [13–14].
- ↑ 2.0 2.1 2.2 "Why Does a Library Catalog Need Authority Control and What Is It?". Implementing Authority Control (美國英文). 美國: Vermont Department of Libraries. 2003年. 原著喺2013-07-15歸檔. 喺2013-07-19搵到.
- ↑ "Authority Control in the Card Environment". Implementing Authority Control (美國英文). 美國: Vermont Department of Libraries. 2003年. 原著喺2013年11月1號歸檔. 喺2025年7月21號搵到.
- ↑ Block 1999, pp. [34, 37–39].
註
[編輯]- ↑ 譯名見：國家圖書館 (2020)
- ↑ 譯名見：胡歐蘭 (無日期)。又：〈梁根紀念圖書館〉 (香港中文)。香港浸信會神學院。喺2025年7月21號搵到。
- ↑ 譯名見：胡歐蘭 (無日期)。又：〈身居幕後的圖書館員〉 (PDF)。《香港中文大學圖書館通訊》 (香港中文)。2019年5月。頁 5。喺2025年7月21號搵到。
- ↑ 參考 Block (1999), p. [12]、Reitz (n.d.), ｢authority work｣ 條。
書目
[編輯]- 胡歐蘭 (無日期)。"authority control"。《圖書館學與資訊科學大辭典》 (臺灣中文)。喺2025年7月21號搵到。
- 國家圖書館 (2020年7月6日) [2010年1月1日]。〈請問國家圖書館編目組，何謂「線上目錄標題權威檔」？〉 (臺灣中文)。喺2025年7月21號搵到。
- Block, Rick J. (1999), Authority Control: What It Is and Why It Matters (美國英文) [2006-03-30]
- Reitz, Joan M. (n.d.). "A". Online Dictionary for Library and Information Science (美國英文). 喺2023年7月3號搵到.
