觀察者模式

喺軟件工程上，觀察者模式係一種軟件設計模式，指一件物件（subject）會有個列表，記住佢嘅觀察者（參見英文：observer）並且喺有需要嗰陣通知啲觀察者，話俾觀察者知發生咗乜嘢變化，當中通知過程好多時係透過呼叫觀察者中嘅方法。觀察者模式呢種做法，喺遊戲編程等嘅多種應用上都有價值。

遊戲編程

睇埋：遊戲編程

用 Unity 等嘅遊戲引擎製作視像遊戲嗰陣，都可以用觀察者模式。喺視像遊戲入面，好多時候都要用一件事件嚟影響成堆其他物件，例如當有個虛擬敵人死亡嗰時，全場其他物件要播放音效或者震動。然後想像有件隱形嘅物件做事件管理器，當中有類似以下噉嘅碼：

 類 事件管理器（被觀察者）：
   變數 觀察者清單 = []
 
   方法 登記觀察者(觀察者):
       加入觀察者清單
 
   方法 發出事件(事件內容):
       對每個觀察者 喺 觀察者清單：
           觀察者.收到事件(事件內容)
 
 類 音效播放器（觀察者）：
   方法 收到事件(事件內容):
       如果 事件內容 ==「敵人死亡」：
           播放「敵人死亡」音效
 
 類 爆炸特效（觀察者）：
   方法 收到事件(事件內容):
       如果 事件內容 ==「敵人死亡」：
           顯示爆炸動畫
 
 // 使用方式
 事件管理 = 新 事件管理器()
 事件管理.登記觀察者(新 音效播放器())
 事件管理.登記觀察者(新 爆炸特效())
 
 // 敵人死亡時，通知晒所有觀察者
 事件管理.發出事件("敵人死亡")

軟件工程師之所以會用噉嘅設計模式，有好多原因：呢種做法表示，發送事件信息嗰方（subject）唔使知道觀察者係邊個，提升模塊化嘅程度；而且用呢種做法一次過管理大量要俾反應嘅物件，唔使逐件物件 loop 一次。

睇埋

• 物件導向編程
• 事件驅動編程
• 過期監聽者問題