跨語言影響

跨語言影響（英文簡稱 CLI）係指一位講者腦入便唔同語言之間互相影響，最常見嘅係兩種語言喺某位雙語講者身上互相影響。例如有位以粵語為母語嘅人學日文或者法文，佢講新語言嗰時可能會受到粵語嘅影響，而 CLI 有陣時亦會攞嚟指單語講者喺唔同方言（例如香港粵語同廣州嘅粵語）之間產生影響。CLI 可以喺語言嘅唔同子系統中觀察到，包括語用、語義、句法、構詞、音系、語音以至書寫系統等，都可以出現 CLI 噉嘅情況。

磨蝕

睇埋：語言磨蝕

有時，要分清楚語言磨蝕同跨語言影響唔係咁容易。有研究指出，一個人學第二語言嘅時候，好自然會將第二語言嘅元素用返喺佢自己嘅母語度。以廿一世紀初嘅香港人為例，好多人母語係粵語，但係識少少英文都好普遍。佢哋講粵語嘅時候，成日會夾雜英文詞，例如：

「呢件事真係好 complicated，我搞唔掂。」

「我哋聽日去 shopping，一齊買嘢啦！」

「你個 email address 係乜嘢呀？」

但係講啲咁嘅句子，其實未必等於佢哋已經出現語言磨蝕，亦未必代表佢哋唔識講複雜、購物、電郵地址呢啲粵語固有嘅中文詞語。呢個情況同外來詞係唔係真係融入語言系統，都有相似嘅討論空間。

睇埋

• 借詞
• 語言合流