軟件建造
軟件建造係軟件工程其中一個工序，講緊工程師要郁手寫源碼同埋做除錯等嘅工作，實際製作行得到嘅軟件。喺程序上，軟件建造通常發生喺軟件設計之後－喺軟件設計階段，工程師要度橋，諗吓隻軟件要用咩架構同用家介面等，但係未實際郁手。做完軟件建造，整咗隻行到嘅軟件，工程師通常就會進入軟件測試階段[1]。
軟件建造會產生大量需要打理嘅物品，諸如係裝住源碼嘅檔案、紀錄工作過程嘅文件呀噉。因此，點樣好好組織呢啲快勞都係受關注嘅問題，譬如係 GitHub 等嘅工具就可以攞嚟儲住隻軟件嘅唔同版本。
重要概念
[編輯]就大方向嚟講，建造軟件一般都希望寫出嚟嘅電腦程式能夠做到[2]：
- 減少不必要嘅複雜度：大型啲嘅 project，會涉及成隊工程師團隊，甚至一個團隊做完交俾下一個做；因此，寫程式要寫到盡可能簡單，啲程式碼先會一睇就明佢哋做乜，噉下一個接手嘅人就容易做嘢；模塊化做法亦能夠減省不必要嘅複雜度。
- 模塊化：以清晰介面拆件，每嚿單元（模塊；
module）都可以獨自運作，就會達致更易理解，而且啲部件容易拆開攞去返用[3][4]。 - 預想變化：工程師要預期第時會發生咩變化；多數軟件都會隨時間改變，而且客戶嘅要求都有可能隨時間變化，工程師要預測呢啲變化。
- 可返用度：要整到容易返用鼓勵共用元件、函式庫等。
- 抽象化：隱藏實作細節，用家冇必要知嘅行為就唔好騷出嚟。
- 可維護度：軟件需要具備良好嘅可維護度，令到發生錯誤時能夠迅速搵出同修正。
要提升可返用度，方法有好多：工程師可以用參數化[5]，設多啲參數，並且將程式寫到識得按輸入參數調整行為，噉同一嚿模塊就可以改改啲參數就攞去第啲場合用；工程師又可以用各種嘅設計模式，令啲碼更易攞去重用；此外，佢哋仲可以用公開發佈嘅做法，將啲模塊打包成套件或者函式庫呀噉，些牙俾其他開發者用，擴大代碼嘅使用範圍[1]。
有關建造軟件嘅工作流程，亦可以睇吓瀑布模型同埋進化式原型製作等嘅概念。
編寫源碼
[編輯]寫源碼係將軟件設計轉做用特定語言寫成、可執行嘅指令，通常仲會一路編寫一路做測試同偵錯。工程師團隊一般會遵守風格指南，用呢啲指南幫啲變數同快勞改名，會加注釋；做版本控制（靠 GitHub 等嘅工具）管理改動同協作流程；分析靜態嗰時嘅程式，減少常見錯誤。做完呢啲工作之後，佢哋仲會撰寫對外同對內嘅文件，確保軟件容易維修[6]。
寫源碼嗰陣用到嘅語言，又可以分幾類：
- 腳本語言：通常係直譯式，唔需要事先編譯成機器碼；特色係開發效率高、靈活度強，不過效能一般都低過編譯語言。
- 編譯語言：通常需要經編譯器轉換成機器碼先至行到，執行效能高、資源控制精細，適合系統層級或效能要求高嘅應用。
而無論用咩語言，寫源碼都會講到一啲共通嘅要點：變數、子程序要跟命名規範；要用簡潔清晰嘅控制流程；而且要加例外處理處理潛在錯誤，令系統更加穩定[1]。
喺軟件建造過程中，實要結合唔同部組份，即係指將各個模塊、唔同嘅程式碼、唔同團隊造嘅成品同埋系統組件有效整合埋一齊，靠清晰接口設計、版本控制同埋自動化測試，確保整體協調同可靠。一般嚟講，常用嘅整合方法係增進式整合[7]，即係將模塊逐步加落去同埋做測試，而唔係等到最後先一次過組合。噉做嘅好處係：可以及早發現錯誤、降低調試難度、令團隊更快得到行到嘅版本去驗證需求... 等等。
建造軟件嗰陣亦要做各種措施，確保啲程式有返咁上下容錯能力。工程師好多時會採取防禦式編程呢種設計方式，一路寫一路假設系統可能出現錯誤或者不合理嘅輸入，並且採取額外措施應對。常見做法有使用例外處理嚟捕捉同處理運行期間出現嘅異常情況，避免程式崩潰[8]；又可以利用斷言，去檢查關鍵假設係咪成立，及早發現潛在錯誤。於是佢哋整出嚟嘅系統就做到更容易識別、隔離同修復問題。亦可以睇睇契約式設計嘅概念。
較大型嘅軟件工程 project 可能喺寫源碼階段就要為國際化（i18n）做準備。國際化指嘅係將語言同文字等內容同程式邏輯分開，方便之後做本地化，翻譯同轉換成唔同語言同文字。由於唔同語言文字有唔同嘅長度、方向同字型要求，轉換之後可能會引致排字同介面設計方面嘅問題[9]。
相關工具
[編輯]睇埋
[編輯]引述
[編輯]- ↑ 1.0 1.1 1.2 SWEBOK Pierre Bourque; Robert Dupuis; Alain Abran; James W. Moore, 編 (2004). "Chapter 4: Software Construction". Guide to the Software Engineering Body of Knowledge. IEEE Computer Society. pp. 4–1–4–5. ISBN 0-7695-2330-7.
- ↑ Fraser, S. and Mancl, D., 2008. No silver bullet: Software engineering reloaded. IEEE Software, 25(1), pp.91-94.
- ↑ Wong,Y. and Sharp, J.,A Specification and Design Methodology Based on Data Flow Principles, in: Sharp, J. ed., Dataflow computing: Theory and Practice, Ablex Publishing, Norwood, 1992, 37-79.
- ↑ Davis, D., Burry, J., & Burry, M. (2011, July). Untangling parametric schemata: enhancing collaboration through modular programming. In Proceedings of the 14th international conference on Computer Aided Architectural Design, University of Liege, Liege.
- ↑ 英文：parameterization
- ↑ Fowler, Martin (2018). Refactoring (2nd ed.). Addison-Wesley. ISBN 9780134757599.
- ↑ SWEBOK Pierre Bourque; Robert Dupuis; Alain Abran; James W. Moore, 編 (2004). Guide to the Software Engineering Body of Knowledge. IEEE Computer Society. ISBN 0-7695-2330-7.，佢哋 3.8 嗰度就講到增進式整合（英文：incremental integration）嘅概念。
- ↑ 2 Defensive Coding Techniques You Should Use Today. Medium.
- ↑ Internationalization (i18n). UX Glossary.
拎
[編輯]
- （英文）McConnell, Steven (2004). Code Complete (第2版). Microsoft Press. ISBN 978-0-7356-1967-8.
_-_The_Noun_Project.svg?lang=zh-yue)