金啤梨形態素

上圖嘅係 cranberry：Blueberry 係指藍莓，當中 blue- 嘅意思明顯係指藍色，但係 cranberry 入便嘅 cran- 係咩意思？一般現代嘅英語使用者都唔知。

金啤梨形態素（參見英文：cranberry morpheme）係有關構詞同詞彙化嘅概念，係形態素一種，特徵係無獨立意思，亦唔會出現喺其他嘅詞度，而只係掕喺某隻詞嘅頭或尾等嘅地方。呢個概念嘅名嚟自金啤梨喺英文入便個名。

背景概念

内文：形態素同規範形態素

睇埋：詞彙化

形態素係語言學上用嚟分析詞語嘅重要概念，指語言入便最細嘅有意思單位。例如（以下用咗粵拼）：

• 粵語：靚女可以拆成靚（leng3）同女（neoi2）兩個更細嘅有意思單位，同時若果靚再拆細變成例如 eng3 就唔會再有原先嗰個意思。
• 英語：dogs 可以拆成 dog（名詞指狗）同埋 -s（詞尾表示眾數）。

按呢個定義，原則上每個形態素都理應有某啲意思或者語法上嘅功能。不過喺實際語言使用中，有啲形態素並無獨立意義，只係喺某一兩隻詞之中出現掕喺其他（有獨立意思嘅）形態素身上。呢啲形態素就謂之金啤梨形態素。

用幾個現代英語嘅例子：

• Cranberry 入便個 cran-：成隻詞係指金啤梨，當中 berry 係莓，但現代英語冇得用 cran- 自成一隻詞。
• Cobweb 入便個 cob-：成隻詞係指蜘蛛網，當中 web 係指網，但現代英語冇得用 cob- 自成一隻詞。
• Lukewarm 入便個 luke-：成隻詞係指溫熱、少少暖噉嘅意思，當中 warm 係暖噉解，但 luke- 自成一隻詞嗰陣無得作類似少或者微等嘅意思。

呢啲例子都表明，雖然呢啲詞嘅形態睇落似乎有結構，但對現代嘅英語使用者嚟講，實際上已經係形態不透明。

喺廿一世紀初，部份粵語詞彙都被指有金啤梨形態素嘅情況，譬如中文詞彙蘋果（粵語讀音為 ping4 gwo2）粵語日常講嘢都會用，而呢隻詞中嘅蘋就被指係金啤梨形態素，淨係有喺蘋果一詞中出現，而且一般人唔知佢單獨成詞可以係咩意思。

形成原因

睇埋：語義演變

金啤梨形態素嘅成因好多。多種語言演變機制，都可以導致金啤梨形態素產生。

金啤梨形態素其中一個主要成因係：隻詞嘅某啲形態素喺語言演變過程中逐漸消亡，唔再有人獨立使用，淨係保留咗喺某啲合成詞入面。用返 lukewarm 為例：據英文史同相關領域嘅學者考究，中古英語嘅 luke- 本來可以作單獨嘅形態素，帶有輕微、溫吞等嘅意思，而且仲可見於好多唔同詞語之中，譬如係中古英語 lukely 一詞意思具有微微噉等嘅意思；中古英語存在於中世紀後期，隨住年月過去，英語起咗變化，英語嘅使用者唔再用 luke- 嚟指輕微、溫吞呢啲意思，而帶有呢嚿形態素嘅詞大部份都消亡咗，唔再有人用，得返 lukewarm 一詞係到咗二十一世紀都依然有人用嘅。於是 luke- 就成為咗金啤梨形態素。

睇埋

• 語義演變
• 詞彙化
• 構詞學

引述

引用來源：

註釋：