阿斯伯格综合征

阿斯伯格综合征（英语：Asperger syndrome，简称 AS），是广泛性发育障碍（PDD）中个一种综合征，属于自闭症谱系障碍（ASD）。渠个重要特征是社交搭非言语交际个困难，同时伴随着兴趣狭隘搭重复特定行为，但相较于其他泛自闭症障碍，仍相对保有语言搭认知发展。

亚斯伯格症候群个确切病因到难还朆弄清楚。虽则可能搭遗传有眼搭界，但是到难，还朆发现确切个基因方面个证据，环境因素量来也有一定影响。箇歇个脑部扫描技术还弄弗清爽普遍有得个潜在问题。2013年，美国精神医学学会出版个《精神疾病诊断搭统计手册第五版》（DSM-5）里向拿阿斯伯格症归到自闭症谱系障碍里向哉，包括自闭症搭待分类个广泛性发育障碍。到2019年，阿斯伯格症还勒许《国际疾病分类手册第十一版》（ICD-11）里向。2021年个《国际疾病分类手册第十一版》（ICD-11）拿阿斯伯格症并到孤独症谱系障碍个亚型里向去哉。

阿斯伯格综合征个治疗方式弗單單只有一種方法，必过针对特定干预措施个效果证据也有限。治疗个主要目的是改進患者比較推板个沟通技巧、强迫行为、重复性动作搭手腳协调个问题。常樁用着个干预手段包括：社交技巧训练、认知行为治疗、职业治疗、言话治疗、爷娘技能培训，还有针对心理或焦虑问题个药物治疗。年纪变大以后，一部分小囡个情况会得变好，但是社交咾沟通障碍一般性还是会得一径有得个。一部分研究学者搭勒垃自闭症谱系里向个人提出另外一种看法：渠拉认为泛自闭症就是个体弗一样个表现，弗是一种毛病咾，弗犯着治疗或治好。