香港小一入學統籌辦法

香港小一入學統籌辦法，俗稱香港小一派位、香港小一申請，係香港政府教育局（同埋佢嘅前身）設立嘅一套學位分配制度，主要負責分配官立小學同資助小學嘅小一學位，但唔包括直資小學、私立小學同國際學校（包埋英基學校協會屬下小學）。呢套制度目的係確保學位分配公平、有序，避免家長四處重複申請，亦方便教育局統籌全香港嘅學額。

參加資格

申請人必須同時符合以下嘅條件：

• 入學當年9月時年滿5歲8個月（例如2026年9月入學，必須喺2020年12月31號或之前出生）
• 香港居民
• 未入讀小學
• 從未獲派小一學位

制度架構

自行分配學位階段

• 家長可以唔受校網限制，向一間官立或資助小學直接遞交申請。
• 每間學校會預留唔多過50%嘅小一學額作自行分配，其中包括：
  • 甲類學位（約佔30%）：必收生，包括有兄姊喺嗰間小學就讀、父母喺嗰間小學任職等。
  • 乙類學位（唔少過20%）：按「計分辦法」分配，唔可以進行筆試或面試。

統一派位階段

分配淨低學額。分為兩部分：

• 甲部：全香港約5%學額，唔受校網限制，可選最多 3 間小學。
• 乙部：約45% 額，限喺住址所屬嘅「小一學校網」內選校。

電腦會先處理甲部，再處理乙部，按隨機編號分配。結果一般喺 6 月初公布。

申請單張

香港政府教育局（同埋佢嘅前身）會製作申請單張用嚟講解小一入學嘅申請程序，最早喺1987年出現，但因為咁多年來入面兩位主角都幾乎冇改過設計，所以有時會引起一啲網民嘅討論。

單張設計同後來變化

原版嘅單張係一男一女的學生正向左行走，不過咁多年嚟不論係格式，還是封面上男女童嘅樣子打扮、抑或背着書包走路嘅姿勢神情，基本上都無變化，改變主要都係顏色同背景，例如由1987年較為「暗啞」嘅橙色轉為2015年嘅淺綠色或者2025年較為鮮艷的橙色。另外，2015年嘅背景由迷宮變兩棵花。

而去到2015年後，教育局嘅單張亦將兩位主角左右掉轉。但主角依然係同樣打扮同表情。

網民反應

有啲網民對呢種舊圖重用嘅做法批評，感嘆香港嘅設計業就是小修小改再出街；亦有網民用比較開玩笑嘅態度面對，話男女主角長年留班，或者新單張入面嘅學生係舊設計中學生嘅子女；更有人話呢個係香港人嘅集體回憶，希望呢個封面維持落去。