ꠝꠘꠤꠚꠥꠞꠤ
ꠝꠘꠤꠚꠥꠞꠤ ꠎꠣꠔꠤ ꠜꠣꠞꠔ ꠅ ꠛꠣꠋꠟꠣꠖꠦꠡꠞ ꠄꠈ ꠔꠥꠞꠣ ꠀꠞ ꠛꠂꠡꠤꠡ꠆ꠐꠚꠥꠞ꠆ꠘ ꠎꠘꠉꠥꠡ꠆ꠑꠤꠞ ꠘꠣꠝ⁕ ꠔꠣꠞꠣꠞ ꠝꠥꠟ ꠛꠣꠠꠤ ꠜꠣꠞꠔꠞ ꠝꠘꠤꠚꠥꠞ ꠞꠣꠁꠎ꠆ꠎꠔ⁕ ꠝꠘꠤꠚꠥꠞꠤꠘ꠆ꠔꠞ ꠘꠤꠎꠡ꠆ꠡ ꠝꠣꠔ, ꠢꠞꠚ, ꠡꠣꠁꠔ꠆ꠔ ꠀꠞ ꠡꠝ꠆ꠞꠤꠖ꠆ꠗ ꠇꠤꠡꠐꠤ ꠇꠣꠟꠌꠣꠞ ꠞꠁꠍꠦ⁕ ꠜꠣꠞꠔꠞ ꠝꠘꠤꠚꠥꠞ ꠞꠣꠁꠎ꠆ꠎ ꠀꠞ ꠛꠣꠋꠟꠣꠖꠦꠡꠞ ꠍꠤꠟꠐ ꠛꠤꠜꠣꠉꠞ ꠛꠃꠔ ꠄꠟꠣꠇꠣꠔ ꠝꠘꠤꠚꠥꠞꠤꠘ ꠕꠣꠈꠂꠘ⁕
ꠀꠡ꠆ꠐꠖꠡ ꠡꠔꠣꠛ꠆ꠖꠤꠞ ꠢꠦꠡ ꠔꠘꠦ ꠃꠘꠛꠤꠋꠡ ꠡꠔꠣꠛ꠆ꠖꠤꠞ ꠚꠁꠟ ꠚꠞ꠆ꠎꠘ꠆ꠔ ꠅꠀ ꠈꠔꠐꠣ ꠡꠣꠝꠣꠎꠤꠇ, ꠞꠣꠎꠘꠂꠔꠤꠇ ꠊꠐꠘꠣꠁꠔꠞ ꠡꠤꠇꠣꠞ ꠅꠁꠀ ꠀꠞ ꠎꠥꠖ꠆ꠖꠎꠘꠤꠔ ꠈꠣꠞꠘꠦ ꠜꠣꠞꠔꠞ ꠃꠔ꠆ꠞ-ꠚꠥꠛꠞ ꠝꠘꠤꠚꠥꠞ ꠞꠣꠁꠎ꠆ꠎꠞ ꠅꠗꠤꠛꠣꠡꠤ ꠅꠈꠟ ꠖꠦꠡꠍꠣꠠꠤ ꠜꠣꠞꠔꠤꠅ ꠃꠚꠝꠢꠣꠖꠦꠡꠞ ꠛꠣꠇ꠆ꠇꠣ ꠅꠘ꠆ꠌꠟ ꠅꠈꠟꠅ ꠐꠣꠁ ꠟꠁꠘ⁕ ꠈꠣꠘ꠆ꠖꠣꠞ ꠀꠡꠣꠝ ꠞꠣꠁꠎ꠆ꠎꠞ ꠇꠣꠍꠣꠠ ꠎꠦꠟꠣꠔ, ꠔ꠆ꠞꠤꠙꠥꠞꠣ ꠞꠣꠁꠎ꠆ꠎꠔ, ꠙꠡ꠆ꠌꠤꠝꠛꠘ꠆ꠉꠞ ꠘꠛꠖꠤꠚ ꠀꠞ ꠛꠣꠋꠟꠣꠖꠦꠡꠅ ꠎꠔ ꠝꠘꠤꠚꠥꠞꠤꠘ꠆ꠔꠞ ꠕꠣꠈꠣ-ꠢꠣꠝꠣꠘꠤ ꠀꠞꠝ꠆ꠜ ꠅꠄ⁕ ꠛꠣꠞ꠆ꠝꠣ-ꠝꠘꠤꠚꠥꠞ ꠎꠥꠖ꠆ꠖꠞ ꠡꠝꠄ (১৮১৯-১৮২৫) ꠢꠤꠎꠛꠣꠘꠣ ꠝꠘꠤꠚꠥꠞꠞ ꠞꠣꠎꠣ ꠌꠃꠞꠎꠤꠔ꠆ ꠍꠤꠋꠢ, ꠢꠦꠘ ꠖꠥꠁ ꠜꠣꠁ ꠝꠣꠞꠎꠤꠔ꠆ ꠍꠤꠋꠢ ꠀꠞ ꠉꠝ꠆ꠜꠤꠞ ꠍꠤꠋꠢ ꠡꠁꠔꠦ ꠍꠤꠟꠐ ꠀꠁꠀ ꠐꠣꠁ ꠟꠁꠘ⁕ ꠎꠥꠖ꠆ꠖ ꠛꠣꠖꠦ ꠐꠣꠁ ꠟꠅꠀ ꠛꠃꠔ ꠡꠖꠦꠡ ꠚꠤꠞꠤꠀ ꠎꠣꠁꠘ, ꠇꠤꠘ꠆ꠔꠥꠇ ꠛꠃꠔ ꠝꠘꠤꠚꠥꠞꠤ ꠔꠣꠞꠣꠞ ꠘꠄꠀ ꠔꠣꠘꠅ ꠔꠣꠘꠔꠤꠔ ꠟꠁꠘ⁕ ꠛꠣꠋꠟꠣꠖꠦꠡ ꠀꠅꠀ ꠝꠘꠤꠚꠥꠞꠤꠘ꠆ꠔꠦ ꠛ꠆ꠞꠣꠝ꠆ꠝꠘꠛꠣꠠꠤꠀꠞ ꠇꠍꠛꠣ, ꠝꠝꠤꠘꠡꠤꠋꠉꠞ ꠖꠥꠞ꠆ꠉꠣꠚꠥꠞ, ꠓꠣꠈꠣꠞ ꠝꠘꠤꠚꠥꠞꠤ ꠚꠣꠠꠣ ꠀꠞ ꠝꠥꠟꠔ ꠛꠤꠢꠔ꠆ꠔꠞ ꠍꠤꠟꠐꠞ ꠛꠣꠇ꠆ꠇꠣ ꠁꠍꠔꠣꠘꠅ ꠛꠡꠔꠤ ꠉꠠꠤ ꠔꠥꠟꠦ⁕
ꠛꠞ꠆ꠔꠝꠣꠘꠦ ꠍꠤꠟꠐ ꠛꠤꠜꠣꠉꠦꠞ ꠝꠥꠟꠁꠛꠣꠎꠣꠞ, ꠍꠤꠟꠐ, ꠡꠥꠘꠣꠝꠉꠁꠘ꠆ꠎ ꠅ ꠢꠛꠤꠉꠘ꠆ꠎ ꠎꠦꠟꠣꠔ ꠝꠘꠤꠚꠥꠞꠤ ꠎꠘꠉꠥꠡ꠆ꠑꠤꠞ ꠝꠣꠘꠥ ꠊꠞꠉꠣꠁꠐ ꠈꠞꠂꠘ⁕
ꠀꠟꠉꠣ ꠝꠣꠔꠈꠕꠣ ꠀꠞ ꠗꠞ꠆ꠝꠞ ꠖꠣꠄ ꠛꠣꠋꠟꠣꠖꠦꠡꠞ ꠝꠘꠤꠚꠥꠞꠤꠘ꠆ꠔꠞ ꠔꠤꠘꠐꠣ ꠒꠣꠟꠚꠣꠟꠣ ꠀꠍꠦ ꠀꠞ ꠔꠣꠞꠣ (১) ꠛꠤꠡ꠆ꠘꠥꠙ꠆ꠞꠤꠀ, (২) ꠝꠂꠔꠂ ꠅ (৩) ꠙꠣꠋꠉꠣꠘ ꠘꠣꠝꠦ ꠚꠞꠤꠍꠤꠔ⁕ ꠝꠘꠤꠚꠥꠞꠤꠘ꠆ꠔꠞ ꠝꠣꠏꠦ ꠁ ꠔꠤꠘ ꠉꠥꠞꠅ ꠞꠣꠎꠘꠂꠔꠤꠇ ꠊꠐꠘꠣꠞ ꠡꠤꠇꠣꠞ ꠅꠁꠀ ꠔꠣꠞꠣ ꠛꠣꠋꠟꠣꠖꠦꠡ ꠀꠁꠀ ꠈꠣꠘ꠆ꠖꠣꠄ ꠈꠣꠘ꠆ꠖꠣꠄ ꠊꠞꠉꠣꠁꠐ ꠛꠣꠘꠣꠁꠘ⁕
ꠛꠤꠡ꠆ꠘꠥꠙ꠆ꠞꠤꠀ ꠅꠈꠟ ꠇꠇꠦꠡꠄꠒ ꠝꠢꠣꠎꠣꠔꠤꠞ ꠀꠞ꠆ꠎ-ꠜꠣꠞꠔꠤꠅ ꠃꠙꠚꠞꠤꠛꠣꠞꠞ ꠎꠣꠔ ꠀꠞ ꠔꠣꠞꠣꠞ ꠝꠣꠔꠞ ꠘꠣꠝ ꠛꠤꠡ꠆ꠘꠥꠙ꠆ꠞꠤꠀ ꠝꠘꠤꠚꠥꠞꠤ ꠝꠣꠔ⁕ ꠝꠂꠔꠂ ꠅꠈꠟ ꠝꠋꠉꠟꠄꠒ ꠝꠢꠣꠎꠣꠔꠤꠞ ꠔꠤꠛ꠆ꠛꠔꠤ-ꠛꠞ꠆ꠝꠤ ꠃꠙ-ꠚꠞꠤꠛꠣꠞꠞ ꠎꠣꠔ ꠀꠞ ꠔꠣꠞꠣꠞ ꠝꠣꠔꠞ ꠘꠣꠝ ꠝꠂꠔꠂ⁕ ꠙꠣꠋꠉꠣꠘ ꠅꠈꠟ ꠀꠞ꠆ꠎ ꠛꠋꠡꠎꠣꠔ ꠅꠁꠟꠦꠅ ꠝꠂꠔꠂ ꠝꠣꠔꠦ ꠀꠞ ꠗꠞ꠆ꠝ ꠝꠣꠚꠤꠇ ꠔꠣꠞꠣ ꠝꠥꠍꠟꠤꠝ⁕ ꠛꠣꠋꠟꠣꠖꠦꠡꠞ ꠝꠘꠤꠚꠥꠞꠤꠘ꠆ꠔꠞ ꠝꠣꠏꠦ ꠛꠤꠡ꠆ꠘꠥꠙ꠆ꠞꠤꠀꠁꠘ ꠃ ꠛꠦꠡꠤ⁕
ꠄꠍ.ꠀꠁ.ꠄꠟ ꠁꠘ꠆ꠐꠣꠞꠘꠦꠡꠘꠣꠟꠞ ꠉꠘꠣ ꠀꠘꠝꠣꠘ ২০০৩ ꠡꠣꠟ ꠘꠣꠉꠣꠖ ꠛꠣꠋꠟꠣꠖꠦꠡ ꠝꠘꠤꠚꠥꠞꠤ ꠛꠤꠡ꠆ꠘꠥꠙ꠆ꠞꠤꠀ ꠝꠣꠘꠥ ৪০ ꠀꠎꠣꠞ ꠀꠞ ꠝꠘꠤꠚꠥꠞꠤ ꠝꠂꠔꠂ ꠝꠣꠘꠥ ১৫ ꠀꠎꠣꠞ ꠀꠍꠟꠣ⁕ ꠝꠣꠔꠞ ꠜꠤꠘ꠆ꠘꠔꠣ ꠛꠣꠖ ꠖꠤꠟꠦ ꠛꠤꠡ꠆ꠘꠥꠙ꠆ꠞꠤꠀ ꠅ ꠝꠂꠔꠂ ꠅꠈꠟꠞ ꠝꠣꠏꠦ ꠡꠣꠝꠣꠎꠤꠇ, ꠇꠤꠡꠐꠤ ꠇꠣꠟꠌꠣꠞ ꠀꠞ ꠗꠞ꠆ꠝꠤꠅ ꠛꠣꠄ ꠔꠦꠝꠘ ꠀꠟꠣꠉ ꠇꠥꠘꠔꠣ ꠘꠣꠁ⁕
ꠝꠘꠤꠚꠥꠞꠤꠘ꠆ꠔꠞ ꠇꠤꠡꠐꠤ ꠇꠣꠟꠌꠣꠞ ꠄꠈꠛꠣꠞꠦ ꠐꠣꠡꠣ ꠀꠞ ꠛꠋꠡꠉꠔ⁕ ꠝꠘꠤꠚꠥꠞꠤ ꠇꠤꠡꠐꠤ ꠇꠣꠟꠌꠣꠞꠞ ꠢꠈꠟꠔꠘꠦ ꠃꠎꠣꠟꠣ ꠖꠤꠇ ꠅꠁꠟ ꠔꠣꠞꠣꠞ ꠘꠣꠍ, ꠎꠦꠔꠣꠞ ꠖꠥꠘꠤꠀꠎꠥꠠꠤ ꠈꠖꠞ⁕
ꠝꠘꠤꠚꠥꠞꠤꠘ꠆ꠔꠞ ꠉꠦꠍꠦ ꠞꠤꠔꠥꠜꠤꠔ꠆ꠔꠤꠇ ꠀꠍꠣꠞ ꠅꠘꠥꠡ꠆ꠑꠣꠘ ꠛꠦꠡꠤ⁕ ꠛꠍꠞ ꠡꠥꠞꠥꠞ ꠝꠥꠇꠣꠄ ꠝꠘꠤꠚꠥꠞꠤ ꠛꠤꠡ꠆ꠘꠥꠙ꠆ꠞꠤꠀꠁꠘ꠆ꠔꠞ ꠛꠤꠡꠥ ꠀꠞ ꠝꠂꠔꠂ ꠅꠈꠟꠞ ꠌꠂꠞꠣꠃꠛꠣ ꠃꠡ꠆ꠡꠛ ꠅꠄ⁕ ꠀꠓ ꠝꠣꠡ ꠎꠉꠘ꠆ꠘꠣꠕꠖꠦꠛꠞ ꠞꠕꠎꠣꠔ꠆ꠞꠣ ꠀꠞ ꠇꠣꠘ ꠃꠡ꠆ꠡꠛꠞ ꠡꠝꠄ ꠞꠥꠎ ꠞꠣꠁꠔ ꠝꠘꠤꠚꠥꠞꠤ ꠝꠘ꠆ꠖꠤꠞ ꠛꠂꠡ꠆ꠘꠛ ꠇꠛꠤ ꠎꠄꠖꠦꠛꠞ ꠉꠤꠔꠉꠥꠛꠤꠘ꠆ꠖ ꠘꠣꠍ ꠅ ꠉꠣꠘꠞ ꠔꠣꠟꠦ ꠚꠞꠤꠛꠦꠡꠘ ꠈꠞꠣ ꠅꠄ⁕
ꠇꠣꠔ꠆ꠔꠤ ꠝꠣꠡ ꠝꠣꠡꠎꠥꠠꠤ ꠍꠟꠦ ꠗꠞ꠆ꠝꠤꠅ ꠘꠣꠘꠣꠘ ꠇꠤꠔꠣꠛ ꠚꠠꠣ-ꠢꠥꠘꠣ⁕ ꠄꠞꠛꠣꠖꠦ ꠀꠄ ꠝꠘꠤꠚꠥꠞꠤꠘ꠆ꠔꠞ ꠡꠛꠍꠦ ꠛꠠ ꠃꠔ꠆ꠡꠛ ꠞꠣꠍꠙꠥꠘ꠆ꠘꠤ⁕ ꠀꠡ꠆ꠐꠣꠖꠡ ꠡꠔꠣꠛ꠆ꠖꠤꠔ ꠝꠘꠤꠚꠥꠞꠞ ꠞꠣꠎꠣ ꠝꠢꠣꠞꠣꠎ ꠜꠣꠉ꠆ꠉꠌꠘ꠆ꠖ꠆ꠞ ꠙ꠆ꠞꠛꠞ꠆ꠔꠤꠔ ꠍ꠆ꠞꠤꠇ꠆ꠞꠤꠡ꠆ꠘꠞ ꠞꠣꠍꠙꠥꠘ꠆ꠘꠤꠝꠣ ꠘꠣꠝꠞ ꠝꠘꠤꠚꠥꠞꠤꠘ꠆ꠔꠞ ꠡꠛꠍꠦꠛꠠ ꠅꠘꠥꠡ꠆ꠑꠣꠘꠐꠣ ꠛꠣꠋꠟꠣꠖꠦꠡ ꠙ꠆ꠞꠣꠄ ꠖꠦꠡ꠆ꠡ ꠛꠞꠍ ꠗꠞꠤ (ꠀꠘꠥꠝꠣꠘꠤꠇ ১৮৪৩ ꠈ꠆ꠞꠤ: ꠔꠘꠦ) ꠙꠣꠟꠤꠔ ꠅꠁꠀ ꠀꠞ⁕ ꠄꠅꠔ ꠝꠣꠁꠀ ꠖꠥꠟꠚꠥꠘ꠆ꠘꠤꠝꠣꠔ ꠝꠘꠤꠚꠥꠞꠤꠘ꠆ꠔꠦ ꠀꠛꠤꠞ ꠃꠡ꠆ꠡꠛꠞ ꠇꠥꠡꠤꠛꠣꠡꠤ ꠈꠞꠦ⁕ ꠁꠛꠣꠟꠣ ꠙꠣꠟꠣꠇꠤꠞ꠆ꠔ꠆ꠔꠘꠞ ꠘꠣꠝꠤꠀꠟꠣ ꠗꠣꠞꠣ "ꠢꠟꠤ" ꠚꠞꠤꠛꠦꠡꠘ ꠈꠞꠤ ꠝꠘꠤꠚꠥꠞꠤ ꠚꠥꠀꠚꠥꠠꠤꠘ꠆ꠔꠦ ꠊꠞꠦꠊꠞꠦ ꠉꠤꠀ ꠜꠤꠇ ꠔꠥꠟꠦ⁕
ꠝꠘꠤꠚꠥꠞꠤꠘ꠆ꠔꠞ ꠘꠤꠎꠡ꠆ꠡ ꠗꠞ꠆ꠝꠞ ꠘꠣꠝ "ꠀꠙꠥꠇꠙꠣ" ꠎꠦꠈꠐꠣ ꠎꠦ ꠚꠥꠞꠣꠘꠣ, ꠀꠖ꠆ꠖꠣꠔꠤꠇ ꠛꠣꠄ ꠛꠃꠔ ꠘꠤꠘ ꠀꠞ ꠖꠣꠞ꠆ꠡꠘꠤꠇ ꠛꠣꠄ ꠛꠃꠔ ꠃꠍꠣ⁕ ꠚꠥꠞꠣꠘꠣ ꠗꠞ꠆ꠝꠛꠤꠡ꠆ꠡꠣꠡ ꠀꠘꠝꠣꠘ ꠍꠤꠡꠐꠤꠈꠞ꠆ꠔꠣ ꠘꠤꠎꠞ ꠒꠃꠟ ꠔꠘꠦ ꠝꠣꠘꠥ ꠎꠣꠔꠤꠞꠦ ꠉꠠꠍꠂꠘ ꠀꠞ ꠚꠞ꠆ꠔꠦꠈꠐꠣ ꠝꠣꠘꠥꠡ ꠍꠤꠡꠐꠤꠈꠞ꠆ꠔꠣꠞ ꠄꠈꠦꠈꠐꠣ ꠍꠦꠝꠣ⁕ ꠄꠛꠅ ꠝꠘꠤꠚꠥꠞꠤ ꠝꠂꠔꠂ ꠅꠈꠟꠞ ꠛꠃꠔ ꠁ ꠗꠞ꠆ꠝꠔ ꠞꠁꠍꠦ⁕ ꠝꠘꠤꠚꠥꠞꠤ ꠛꠤꠡ꠆ꠘꠥꠙ꠆ꠞꠤꠀꠁꠘ꠆ꠔꠞ ꠄꠈꠋꠡꠞ ꠝꠣꠏꠦ "ꠀꠙꠥꠇꠙꠣ" ꠙꠥꠎꠣꠞ ꠍꠟ ꠞꠁꠍꠦ⁕ ꠀꠡ꠆ꠐꠖꠡ ꠡꠔꠣꠛ꠆ꠖꠤꠔ ꠝꠘꠤꠚꠥꠞꠤꠘ꠆ꠔꠦ ꠛꠂꠡ꠆ꠘꠛ ꠗꠞ꠆ꠝꠔ ꠀꠄ⁕
ꠝꠘꠤꠚꠥꠞꠤ ꠉꠥꠞꠞ ꠝꠥꠟ ꠖꠥꠁ ꠎꠘꠉꠧꠡ꠆ꠑꠤꠞ ꠝꠣꠏꠦ ꠝꠣꠔꠞ ꠀꠟꠣꠉ ꠞꠁꠍꠦ, ꠎꠦꠟꠣꠘ -
ꠝꠂꠔꠂ ꠛꠤꠡ꠆ꠘꠥꠙ꠆ꠞꠤꠀ
ꠝꠘꠤꠚꠥꠞꠤ ꠝꠂꠔꠂ ꠝꠣꠔꠞꠦ ꠔꠤꠛ꠆ꠛꠔꠤ-ꠛꠞ꠆ꠝꠤ ꠃꠙ-ꠚꠞꠤꠛꠣꠞꠞ ꠇꠥꠇꠤ-ꠌꠤꠘ ꠖꠟ ꠀꠞ ꠛꠤꠡ꠆ꠘꠥꠙ꠆ꠞꠤꠀ ꠝꠣꠔꠞꠦ ꠁꠘ꠆ꠖ-ꠀꠞ꠆ꠎ ꠃꠙ-ꠚꠞꠤꠛꠣꠞꠞ ꠛꠣꠋꠟꠣ-ꠅꠡꠝꠤꠀ ꠖꠟ ꠎꠣꠉꠣ ꠖꠦꠅꠀ ꠅꠁꠍꠦ, ꠎꠥꠖꠤꠘꠅ ꠁ ꠀꠟꠉꠣꠈꠞꠘ ꠟꠁꠀ ꠝꠣꠔꠔꠁꠔ꠆ꠔꠛꠤꠖ ꠅꠈꠟꠞ ꠝꠣꠏꠦ ꠛꠃꠔ ꠝꠔꠜꠦꠖ ꠞꠁꠍꠦ⁕ ꠛꠃꠔꠦ ꠛꠤꠡ꠆ꠘꠥꠙ꠆ꠞꠤꠀ ꠝꠣꠔꠞꠦ ꠝꠢꠣꠞꠣꠡ꠆ꠐ꠆ꠞꠤ-ꠡꠃꠞꠖꠟꠞ ꠝꠣꠔ, ꠀꠛꠣꠞ ꠈꠦꠃ ꠇꠦꠃ ꠁꠉꠥꠞꠦ ꠁꠘ꠆ꠖ-ꠝꠘ꠆ꠉꠟꠄꠒ ꠃꠙꠖꠟꠞ ꠐꠤꠇꠣꠞ ꠝꠣꠏꠦ ꠝꠘ ꠈꠞꠂꠘ⁕ ꠎꠠ ꠀꠞ ꠛꠣꠞꠘꠤꠞ ꠈꠦꠔ ꠄꠈ ꠅꠀꠄ ꠖꠄꠅ ꠝꠣꠔꠞ ꠝꠣꠏꠦ ꠛꠦꠇꠞꠘꠉꠔ ꠝꠤꠟ ꠞꠁꠍꠦ⁕ ꠖꠄꠅ ꠝꠣꠔꠅ ꠚꠣꠀꠞꠤ ꠘꠣꠉꠣ ꠀꠞ ꠇꠥꠇꠤꠝꠣꠔꠞ ꠚꠜꠣꠛ ꠖꠦꠈꠣ ꠎꠣꠄ⁕ ꠡꠛ꠆ꠖꠜꠣꠘ꠆ꠒꠣꠞꠞ ꠝꠥꠇꠣꠄ ꠖꠄꠅ ꠝꠣꠔꠅ ꠛꠦꠛꠀꠞ ꠅꠄ ꠁꠟꠣꠘ ꠡꠛ꠆ꠖꠡꠁꠋꠇꠣ ꠍꠣꠁꠞ ꠀꠎꠣꠞꠞꠅ ꠛꠦꠡ⁕ ১৮৮৯ ꠡꠘ ꠛꠣꠞ ꠅꠀ ꠜꠣꠞꠔꠛꠞ꠆ꠡꠞ ꠝꠣꠔꠞ ꠚꠣꠟꠤꠚꠣꠟꠤꠞ ꠝꠥꠟ ꠜꠤꠔ꠆ꠔꠤ ꠍꠣꠞ ꠎꠞ꠆ꠎ ꠀꠛ꠆ꠞꠣꠢꠣꠝ ꠉ꠆ꠞꠤꠀꠞ꠆ꠍꠘꠞ Linguistic Survey of India-ꠔ ꠝꠂꠔꠂ ꠝꠣꠔꠞ ꠟꠉꠦ ꠛꠤꠡ꠆ꠘꠥꠙ꠆ꠞꠤꠀ ꠝꠘꠤꠚꠥꠞꠤ ꠝꠣꠔꠞꠦ ꠝꠘꠤꠚꠥꠞꠞ ꠅꠁꠘ꠆ꠘꠔꠝ ꠝꠣꠔ ꠈꠁꠀ ꠃꠟ꠆ꠟꠦꠇ ꠈꠞꠣ ꠅꠄ⁕ ꠖꠥꠁꠅꠐꠣ ꠝꠣꠔ ꠜꠣꠞꠔ ꠡꠤꠇ꠆ꠞꠤꠔꠤ ꠚꠣꠁꠍꠦ ꠀꠞ ꠀꠡꠣꠝ ꠅ ꠔ꠆ꠞꠤꠙꠥꠞꠣ ꠞꠣꠁꠎ꠆ꠎꠞ ꠁꠍꠇꠥꠟ ꠅꠈꠟꠅ ꠝꠘꠤꠚꠥꠞꠤ ꠝꠂꠔꠂ ꠀꠞ ꠛꠤꠡ꠆ꠘꠥꠙ꠆ꠞꠤꠀ ꠖꠄꠅ ꠝꠣꠔꠦ ꠟꠦꠈꠣꠚꠠꠣꠞ ꠡꠥꠎꠥꠉ ꠀꠍꠦ⁕ ꠝꠘꠤꠚꠥꠞꠤ (ꠝꠂꠔꠂ) ꠝꠣꠔ ꠜꠣꠞꠔꠞ ꠅꠁꠘ꠆ꠘꠔꠝ ꠞꠣꠡ꠆ꠐ꠆ꠞꠜꠣꠡꠣ ꠀꠞ ꠝꠘꠤꠚꠥꠞ ꠞꠣꠁꠎ꠆ꠎꠞ ꠞꠣꠎ꠆ꠎꠜꠣꠡꠣ⁕ ꠝꠘꠤꠚꠥꠞ ꠞꠣꠁꠎ꠆ꠎꠔ ꠝꠘꠤꠚꠥꠞꠤ ꠝꠂꠔꠂ ꠝꠣꠔꠦ ꠅꠘꠣꠞꠍ ꠚꠞ꠆ꠎꠘ꠆ꠔ ꠚꠠꠣꠞ ꠡꠥꠎꠥꠉ ꠞꠁꠍꠦ⁕ ꠔꠄ ꠛꠤꠡ꠆ꠘꠥꠙ꠆ꠞꠤꠀ ꠝꠣꠔꠦ ꠝꠘꠤꠚꠥꠞ ꠚꠠꠣꠞ ꠡꠥꠎꠥꠉ ꠘꠣꠁ⁕ ১৯৭৬ ꠡꠣꠟ ꠕꠣꠇꠤ ꠛꠣꠋꠟꠣꠖꠦꠡ ꠛꠦꠔꠣꠞ ꠍꠤꠟꠦꠐ ꠇꠦꠘ꠆ꠖ꠆ꠞ ꠔꠘꠦ ꠚꠔꠤ ꠢꠣꠚꠔꠣꠔ "ꠝꠘꠤꠚꠥꠞꠤ ꠅꠘꠥꠡ꠆ꠑꠣꠘ" ꠡꠤꠞꠥꠘꠣꠝꠦ ꠛꠣꠞꠤꠈꠞꠤ ꠛꠤꠡ꠆ꠘꠥꠙ꠆ꠞꠤꠀ ꠅ ꠝꠂꠔꠂ ꠝꠣꠔꠦ ꠅꠘꠥꠡ꠆ꠑꠣꠘ ꠚꠍꠣꠞ ꠡꠥꠞꠥ ꠅꠄ ꠀꠞ ꠁ ꠅꠘꠥꠡ꠆ꠑꠣꠘꠞ ꠍꠟ ꠄꠛꠅ ꠍꠟꠔꠦ ꠀꠍꠦ⁕
ꠡꠥꠞ꠆ꠎꠖꠦꠚꠔꠣꠞ ꠃꠖ꠆ꠖꠦꠡ꠆ꠡꠦ ꠞꠍꠤꠔ ꠉꠤꠔꠤꠇꠛꠤꠔꠣ ꠅꠃꠉ꠆ꠞꠤ ꠝꠘꠤꠚꠥꠞꠤ ꠝꠂꠔꠂ ꠡꠣꠁꠔ꠆ꠔꠞ ꠚꠥꠞꠣꠘꠣꠔꠝ ꠘꠤꠖꠞ꠆ꠡꠘ, ꠎꠦꠉꠥ ꠈ꠆ꠞꠤꠡ꠆ꠐꠤꠅ ৩৩ ꠅꠛ꠆ꠖꠔ ꠞꠍꠤꠔ⁕ ꠛꠃꠔ ꠙ꠆ꠞꠦꠝꠉꠤꠔꠤ ꠀꠞ ꠉꠚꠉꠤꠔ꠆ꠔꠤ ꠝꠘꠤꠚꠥꠞꠤ ꠝꠂꠔꠂ ꠡꠣꠢꠤꠔ꠆ꠔꠞ ꠅꠝꠥꠁꠟ꠆ꠟ ꠡꠝ꠆ꠙꠖ⁕ ꠝꠘꠤꠚꠥꠞꠤ (ꠝꠂꠔꠂ) ꠡꠣꠁꠔ꠆ꠔꠞ ꠟꠦꠈꠣ ꠅꠍꠔꠤꠔ꠆ꠔ ꠝꠤꠟꠦ ꠈ꠆ꠞꠤꠡ꠆ꠐꠤꠅ ꠀꠡ꠆ꠐ ꠡꠔꠣꠛ꠆ꠖꠤ ꠔꠘꠦ⁕ ꠀꠞꠛꠣꠄ ꠛꠤꠡ꠆ꠘꠥꠙ꠆ꠞꠤꠀ ꠝꠘꠤꠚꠥꠞꠤ ꠝꠣꠔꠞꠅ ꠚꠥꠞꠣꠘꠣ ꠡꠣꠁꠔ꠆ꠔ ꠜꠣꠘ꠆ꠒꠣꠞ ꠞꠁꠍꠦ⁕ ꠛꠞꠘ ꠒꠣꠢꠣꠘꠤꠞ ꠄꠟꠣ (ꠝꠦꠊ ꠒꠣꠈꠣꠞ ꠉꠣꠘ / ১৪৫০-১৫০০ ꠈ꠆ꠞꠤ:), ꠝꠣꠖꠁ ꠡꠞꠣꠢꠣꠟ ꠄꠟꠣ (ꠛꠤꠡ꠆ꠘꠥꠙ꠆ꠞꠤꠎꠣ ꠝꠘꠤꠚꠥꠞꠤ ꠟꠥꠇꠉꠣꠘ / ১৬০০-১৭০০ ꠈ꠆ꠞꠤ:),ꠈꠣꠝ꠆ꠛꠣꠕꠂꠛꠤꠞ ꠙ꠆ꠞꠦꠝꠇꠣꠢꠤꠘꠤ (১৫০০-১৬০০ ꠈ꠆ꠞꠤ:), ꠀꠙꠣꠘꠞ ꠎ꠆ꠎꠣꠞꠤ (ꠟꠥꠇꠇꠕꠣ), ꠙꠃꠞꠦꠁ (ꠙ꠆ꠞꠛꠍꠘ) ꠅꠔꠣꠁꠘ ꠛꠤꠡ꠆ꠘꠥꠙ꠆ꠞꠤꠀ ꠝꠘꠤꠚꠥꠞꠤ ꠡꠣꠁꠔ꠆ꠔꠞ ꠅꠝꠥꠁꠟ꠆ꠟ ꠡꠝ꠆ꠙꠖ⁕ ꠃꠘꠛꠤꠋꠡ ꠡꠔꠈꠞ ꠝꠣꠏꠈꠣꠘꠅ ꠢꠤꠎꠛꠣꠘꠣꠞ ꠛ꠆ꠞꠤꠐꠤꠡ ꠜꠣꠞꠔꠞ ꠞꠣꠎꠘꠂꠔꠤꠇ ꠄꠎꠦꠘ꠆ꠐ Colonel McCullock ꠔꠣꠘ Valley of Manipur and Hill Tribes ꠛꠁꠅ ꠁꠋꠟꠤꠡ, ꠝꠘꠤꠚꠥꠞꠤ ꠛꠤꠡ꠆ꠘꠥꠙ꠆ꠞꠤꠀ ꠅ ꠝꠘꠤꠚꠥꠞꠤ ꠝꠂꠔꠂ ꠝꠣꠔꠞ ꠚꠣꠞꠣꠇ ꠖꠤ ꠛꠣꠐ꠆ꠐꠤꠈꠞꠤ ꠡꠛ꠆ꠖꠞꠥꠉꠣꠞ ꠟꠦꠈꠁꠘ⁕
ꠀꠔꠖꠤ ꠈꠣꠚꠠ ꠛꠣꠘꠣꠘꠤꠔ ꠝꠘꠤꠚꠥꠞꠤꠘ ꠎꠦ ꠄꠇ꠆ꠍꠚꠣꠐ⁕ ꠘꠤꠎꠞ ꠈꠣꠚꠠ ꠔꠣꠞꠣ ꠘꠤꠎꠦ ꠛꠣꠘꠣꠁꠘ⁕ ꠙ꠆ꠞꠣꠄ ꠚꠞꠔꠦꠇ ꠊꠞ ꠔꠣꠔ ꠞꠁꠍꠦ⁕ ꠝꠘꠤꠚꠥꠞꠤ ꠀꠔꠞꠈꠣꠝ ꠖꠥꠘꠤꠀꠎꠥꠠꠤ ꠘꠣꠝꠤꠀꠟꠣ⁕ ꠝꠘꠤꠚꠥꠞꠤꠘ꠆ꠔꠞ ꠛꠣꠘꠣꠁꠟ ꠔꠣꠔꠞ ꠡꠣꠠꠤ, ꠉꠣꠝꠍꠣ, ꠍꠣꠖ꠆ꠖꠞ, ꠛꠦꠉ ꠅꠔꠣꠁꠘ ꠅꠁꠘ꠆ꠘꠣꠘ꠆ꠘ ꠎꠣꠔꠤꠞ ꠝꠣꠏꠦꠅ ꠢꠝꠣꠘ ꠈꠖꠞꠣꠟꠣ⁕
ꠛꠐꠤꠡ ꠀꠝꠟꠅ ꠝꠘꠤꠚꠥꠞꠤ ꠈꠦꠔꠥꠀꠟ ꠅꠈꠟꠞ ꠡꠋꠉ꠆ꠞꠣꠝꠞ ꠈꠕꠣ ꠢꠈꠟꠞꠎꠣꠘꠣ⁕ ১৯৪৩ ꠡꠣꠟ ꠎꠝꠤꠖꠣꠞꠤꠞ ꠛꠤꠞꠥꠖ꠆ꠖꠦ ꠛꠤꠖ꠆ꠞꠥꠢ ꠊꠥꠡꠘꠣ ꠈꠞꠦꠍꠤꠟ ꠢꠤꠡꠝꠄꠞ ꠝꠥꠟꠛꠤꠛꠣꠎꠣꠞ ꠝꠢꠇꠥꠝꠣꠞ ꠜꠣꠘꠥꠉꠣꠍ ꠚꠞꠉꠘꠣꠞ ꠜꠣꠘꠥꠛꠤꠟ ꠉꠣꠅꠞ ꠝꠘꠤꠚꠥꠞꠤ ꠛꠤꠡ꠆ꠘꠥꠙ꠆ꠞꠤꠀ ꠀꠞ ꠝꠘꠤꠚꠥꠞꠤ ꠝꠂꠔꠂ ꠉꠥꠞꠞ ꠈꠦꠔꠥꠀꠟ ꠅꠈꠟꠦ⁕
১৯৭১ ꠡꠣꠟꠞ ꠛꠣꠋꠟꠣꠖꠦꠡꠞ ꠡꠣꠗꠤꠘꠔꠣ ꠎꠥꠖ꠆ꠖꠔ ꠝꠘꠤꠚꠥꠞꠤꠘ ꠢꠋꠇꠦ-ꠀꠚꠞꠇꠦ ꠅꠋꠡ ꠘꠦꠁꠘ⁕ ꠛꠤꠡ꠆ꠘꠥꠙ꠆ꠞꠤꠀ ꠀꠞ ꠝꠂꠔꠂ ꠉꠥꠞꠞ ꠛꠣꠇ꠆ꠇꠣ ꠝꠘꠤꠚꠥꠞꠤ ꠎꠥꠀꠘ ꠅꠈꠟ ꠝꠥꠇ꠆ꠔꠤꠛꠣꠁꠘꠤꠔ ꠎꠥꠉ ꠖꠦꠁꠘ⁕ ꠝꠘꠤꠚꠥꠞꠤ ꠛꠦꠐꠤꠘ ꠅꠈꠟꠅ ꠘꠣꠘꠣꠘꠜꠣꠛꠦ ꠝꠥꠇ꠆ꠔꠤꠛꠣꠁꠘꠤ ꠀꠞ ꠝꠤꠔ꠆ꠞꠛꠣꠁꠘꠤꠞ ꠡꠖꠁꠡ꠆ꠡ ꠅꠈꠟꠞꠦ ꠡꠣꠁꠎ꠆ꠎ ꠡꠎꠥꠉꠤꠔꠣ ꠈꠞꠂꠘ⁕