Algoritmo

Peteĩ taꞌanga Epañañeꞌẽme omboꞌéva mbaꞌépa jajapo vaꞌerã "Ndaipóri ramo hesapeha", oiporandu "Oĩpa peteĩ fóko?" ha ñambohovái vaꞌerã "Nahániri" térã "Héẽ", upe rire jarekóta tembiapoukapy heꞌíva "Emoĩ peteĩ fóko".

Algoritmo haꞌe tembiapoukapy aty ikatúva jasegi ñambohovaisérõ peteĩ papapykuaa kuaaraꞌã térã peteĩ porandu asy, jaipuru avei jajapopasérõ ambue tembiapo jaguerojerapaséva. Upéicha ikatu jahero guarani etépe ko algoritmo apopyrãndy térã apoukapy rape, jepémo ndojeipurúi koꞌãva. Algoritmo haꞌe mbaꞌe ombohapéva, oñembohysýimava ha oñemohendapámava, jasegi ramo ko hapére ikatu ñambohováita peteĩ porandu térã ikatu jajuhúta mbaꞌéichapa ojeipapa pe jahekáva.

Techapyrã, ikatu jahecha peteĩ "tembiꞌu ñembosakoꞌirã" algoritmo ramo, upe ñembosakoꞌirãme jahecháta mbaꞌéichapa jajapo vaꞌerã ñane rembiꞌurã, jasegi ramo hapeitére, jarekóta tembiꞌu jaipotáva.

Ára ha ára jaipuru ko algoritmo ha oparupi jajuhu oñemyatyrõsévo térã oñembohovaiséro peteĩ mbaꞌe. Techapyrã ambuéva haꞌe umi kuatia mbokatupyrýva (eꞌpañañeꞌẽme: manual), umíva niko ñanemboꞌéva mbaꞌéichapa ikatu jajapo térã ñamopuꞌã peteĩ mbaꞌe ha jasegipa ramo heꞌívare peteĩ-teĩ imboꞌepýre ikatúta jajapopa pe jaipotáva. Papapykuaápe hetaite jaipuru jaikuaasévo hetakue, techapyrã oñembohetavévo (X) térã oñembovóvo (÷) jasegi vaꞌerã haperã jajuhu hag̃ua hetakue tee.

Ko ñeꞌẽngue algoritmo ou karai herakuã papapykuaáre oñemoarandu vaꞌekue réragui, Al-Juarismi, Kalifáto Mbohapyha peguáva. Hembiapokuépe oikuaaukaraẽ álgebra mbaꞌe opaichagua ha papapy mbojojaha. Upévare ojeꞌe hese haꞌehague álgebra moheñoiha, ko álgebra katu haꞌe papapykuaa vorekue, oipuru umi "oñemoambuéva" ohechauka hag̃ua papapy neꞌĩra ojeikuaa térã papapy ikatu oñemoambue.