EVOL

EVOL
Sonic Youth
Título EVOL
Instancia de álbum musical
Parte de álbums de Sonic Youth en orde cronolóxica
Forma artística álbum de estudio
Xénero rock alternativo
Lingua lingua inglesa
Autoría
Interpretado por Sonic Youth
Publicación
Produtor/a Sonic Youth
Selo discográfico SST Records
Datas  Data de publicación 1986
Dimensións Duración 2.349 s
Localización  Lugar de publicación Estados Unidos de América
Identificadores Freebase /m/01jkzc_
Fontes e ligazóns
Wikidata

EVOL é o terceiro álbum de estudio da banda estadounidense de rock alternativo Sonic Youth, editado en maio do ano 1986 a través do selo SST Records. É o primeiro traballo no que aparece o actual batería da banda Steve Shelley, que substituíra a Bob Bert a mediados de 1995. No disco pódese ver unha transición da sonoridade da banda, indo do son máis noise rock dos seus álbums anteriores cara a unha maior sensibilidade rock. A portada é unha fotografía de Lung Leg, tomada da película Submit to Me, de Richard Kern.

Neste disco atópase a primeira verdadeira colaboración nun traballo de Sonic Youth, ao gravar Mike Watt, da banda Minutemen, o baixo nos temas "In the Kingdom #19" e "Bubblegum" (esta segunda só aparecía como canción extra no CD). Nese momento foi cando o proxecto Ciccone Youth comezou a coller forma, e realmente as cancións "Into The Groovey" e "Tuff Titty Rap", aparecidas no seu The Whitey Album, foron gravadas nas sesións de EVOL.

En abril do ano 2016 a revista Rolling Stone colocouno no posto 30 da súa lista dos 40 mellores álbums de punk de todos os tempos.

Antecedentes e gravación

En xuño de 1985, durante a xira de Bad Moon Rising, Bob Bert deixou a banda e foi substituído por Steve Shelley. A nova formación comezou a traballar rapidamente en material para o seu terceiro álbum. A banda asinou un contrato con SST Records xa que, cara 1986, o seu fundador Greg Ginn estaba ansioso por afastarse das súas raíces hardcore. Sonic Youth tomou un descanso tras a xira e rematou as composicións para EVOL. En marzo de 1986 a banda gravou o disco en BC Studio con Martin Bisi. EVOL foi a segunda vez na que o grupo traballou coa cantante e artista de Nova York Lydia Lunch. Lunch compartiu voces no tema "Death Valley '69" e compuxo a canción "Marilyn Moore" con Thurston Moore.

Mike Watt tocou o baixo nos temas "In the Kingdom #19" e na versión de "Bubblegum". A banda animouno a tocar no primeiro deses temas pouco despois da morte do seu compañeiro en Minutemen D. Boon nun accidente de tráfico. Casualmente, a canción fala tamén dun accidente na estrada. Watt entrara nunha severa depresión tras a morte de Boon e estaba considerando deixar a súa carreira na música. Watt falou do tempo que pasou cos membros de Sonic Youth durante a gravación do disco como un factor importante na súa decisión de continuar tocando. A seguinte banda de Watt, Firehose, actuaría con Sonic Youth na xira Flaming Telepaths. Durante ese tempo o grupo iniciou o proxecto Ciccone Youth, que contaba con todos os membros de Sonic Youth e con Watt. Editaron un sinxelo formado por tres temas: "Into the Groove(y)" (unha versión do éxito de Madonna "Into the Groove", que incorporaba fragmentos da súa gravación) e a curta "Tuff Titty Rap" na cara a (ámbalas dúas interpretadas polos membros de Sonic Youth), e "Burnin' Up" (interpretada por Watt con guitarras adicionais de Greg Ginn) na cara b. O proxecto deu como resultado en 1988 o disco The Whitey Album.

No álbum en formato vinilo, a lonxitude de "Expressway to Yr. Skull" está indicada co símbolo de infinito (∞); a parte final do tema ten unha rañura de bloqueo (locked groove), marcando o seu final teórico. A versión en CD engade unha canción extra: a versión do tema de Kim Fowley "Bubblegum". Segundo Watt, el e Shelley tocaron o ritmo básico sobre a gravación real de Fowley, que posteriormente foi eliminada cando os outros músicos engadiron as súas partes.

Presentación

A portada do álbum ten unha imaxe da modelo/actriz Lung Leg, dun fotograma do filme de Richard Kern Submit to Me. Leg xa aparecera anteriormente no video musical de "Death Valley '69" (dirixido por Kern e Judith Barry). A contraportada mostra unha fotografía en branco e negro da banda nun marco en forma de corazón. As 10 cancións do disco están listadas nunha orde diferente que á istaxe real. Os nomes dos membros tamén aparecen na contraportada, aínda que non se lles asignan instrumentos, e pode lerse "guitarras, voces, batería", con "baixo" agochado tras a fotografía da banda.

O inserto inclúe a letra das cancións e a cara A representa a Thurston Moore, con ollos debuxados nas mans, sosténdoas diante da cara. Esta fotografía foi usada despois na portada do sinxelo de "Starpower". Á esquerda desta fotografía hai unha viñeta do cómic de Marvel The New Mutants (que se atopa na segunda páxina do número 14, publicado en abril de 1984). O outro lado ten imaxes das películas de terror Friday the 13th Part 2 e Children of the Corn, cun fotograma do filme de 1962 House of Women na que aparecen as protagonistas Constance Ford (sacando a lingua) e Barbara Nichols na esquina superior dereita. Esta imaxe só aparece na edición orixinal en vinilo de SST e nas reedicións en vinilo de despois de 2010. No resto das edicións a foto escureceuse.

Promoción

Sonic Youth estreou o novo material para EVOL o 12 de abril de 1986 en Austin, Texas; unha gravación dese concerto foi publicada posteriormente en 1992 como Live at the Continental Club. EVOL foi lanzado en maio de 1986 por SST en vinilo e casete. A banda realizou unha xira por Europa en maio e xuño, interpretando temas do álbum (aínda que nunca tocar ao vivo "In the Kingdom #19" e "Bubblegum"). A banda tamén estreou "White Kross", que máis tarde apareceu en Sister. Despois da xira europea fixeron unha xira polos Estados Unidos en xuño e xullo. En xullo, a banda lanzou o único sinxelo de EVOL, "Starpower". Estaba acompañado por "Bubblegum" e unha versión editada de "Expressway to Yr. Skull". Nunca se publicou un vídeo de "Starpower". Porén, publicouse un vídeo de "Shadow of a Doubt" dirixido por Kevin Kerslake e no que aparecía Gordon sentada nun tren. Despois da xira, a banda gravou a banda sonora de Made in USA, pero non se publicou ata 1995. EVOL lanzouse en CD a finais de 1986.

Listaxe de cancións

Tódolos temas escritos e compostos por Sonic Youth (Thurston Moore, Kim Gordon, Lee Ranaldo, Steve Shelley), agás onde se indique.. 

N.º	Título	Letras	Voces	Duración
1.	"Tom Violence"	Moore	Moore	3:05
2.	"Shadow of a Doubt"	Gordon	Gordon	3:32
3.	"Star Power"	Moore	Gordon	4:48
4.	"In the Kingdom #19"	Ranaldo	Ranaldo	3:24
5.	"Green Light"	Moore	Moore	3:46
6.	"Death to Our Friends"			3:16
7.	"Secret Girl"	Gordon	Gordon	2:54
8.	"Marilyn Moore"	Lydia Lunch, Moore
9.	Sin título		Moore	4:04
10.	"Expressway to Yr. Skull"			7:19

N.º	Título	Escritor(es)	Voces	Duración
11.	"Bubblegum"	Kim Fowley	Gordon, Ranaldo	2:49