Hunus

Hunus
370s–469
Territoriu estimau baxu'l control hunu so Attila, c. 450 d.C.
Capital	Corti d'Attila
Lenguas	húnicu góticu Varias lenguas tribalis
Goviernu	Tribal confederación
Istoria
Iniciu	Conquista de los alanus i los godus
Añu	370s
Final	Dengizich, iju d'Attila, mori
Añu	469
Governantis
Rei u xefi
370s? – Balamber? c. 395 – ? – Kursich i Basich c. 400–409 – Uldin c. 412 – ? – Charaton c. 420s–430 – Octar i Rugila 430–435 – Rugila 435–445 – Attila i Bleda 445–453 – Attila 453–469 – Dengizich i Ernak 469–? – Ernak
Sucessus
437 – Attila i Bleda s'hazin co-reis delas tribus unificás 445 – Moti de Bleda; Attila queda cumu rei solu 451 – Batalla delas Llanuras Cataláunicas 452 – Invasión del norti d'Italia 454 – Batalla de Nedao
Antis / Dispués
Antis Alanus Greuthungi Thervingi Pannonia Dispués Gepids Rugiland Reinu ostrogodu Reinu suevu (Danubiu)

La fiesta d’Atila, cuadru del pintol húngaru Mór Than. Se sostriba nel fragmentu de Priscu, al qu’arrepresenta de brancu ena parti derecha, sostiniendu el su libru d’estoria.

Los hunos (latín vulgal: huni; tamién cumu chuni; griegu medieval: Oúnnoi / Οὕννοι) fuerun una confederación de puebrus nómadas i seminómadas, formá a partil de varios grupos étnicus procedentis del área esteparia del Asia Central, xuntu con grupus conquistaus o asimilaus ena zona balcánica. La emportancia delos hunus estuvu ena criación tardía dun auténticu aparatu de polval, escapás de rivaliçal, en atribucionis i enfruencias, colas dos mitais produtus dela división del Emperiu Romanu, amenaciandu al mesmu tiempu tanto a Constantinopla cumu a Roma. A ellu puei sumal-si la reiteración de deferentis estudiosus, dendi el sigru XVIII ata ogañu, encabeçaus pol Edward Gibbon, qu'a partil delos primerus testimonius delas huentis clásicas dendi Amianu Marcelinu, considerarun alos hunos cumu el verdaeru puntu dendi el qual s’abríe prociu el mentau períou delas grandis migraciones, que precipitó de forma paulatina el colasu i cáida final del Emperiu Romanu d'Ociidenti nel 476, al mesmu tiempu qu’el própiu Emperiu Romanu d'Orienti mantenía una difícil situación enos sus dominius uropeus, enllegandu a perdel la su autoriá en partis senificativas destos, asselajadamenti ena zona de Tracia, ondi se concentraba gran parti delos ostrogodus ata la su marcha a Italia a finales del sigru V.

Paralelamenti a esta noción tradicional sobri el papel estóricu delos hunos, se devi hazel necessariamenti una división sociopolítica alreol dela su própia evolución, alvertía a través delas huentis documentalis dendi el própiu Amianu Marcelinu: assin, un estatus inicial delos hunos, passa pol sel una horda puxanti, espansiva i amenacianti pa colos sus vezinus situaus enas estepas ocidentalis o pónticas, erigiendu-si n’esti estatus original, cumu una confederación nómada al ussu, destinguiendu-si una figura xerárquica o lídel dela mesma, acompañau duna redi clientelal, adláteris i ciertus estratus superioris. Una segunda etapa la constituyi la su reubicación i assentamientu a lo largu delas estepas, proyeutandu núcleus d’estacionamientu temporal, i inclusive osservandu-si ya un monarca, comparabli ala imaxen posteriol del reiks (rex) dela zona de Germania, lo que suena una perennidá, apaeciendu un cargu sucesoriu que s'eredaba, apareciu al funcionamientu delos dominius delos señoris o alos estaus. Esta destinción es sumamenti emportanti, de cara a tenel en cuenta los cámbius notorius qu’el puebru hunu esperimentó dendi la su apaición nel escenariu uropeu a finalis del sigru IV i el su repliegui generalizau pa colas estepas i la pérdida del su polval, ya a metá del sigru V, en tan solu unas décaas.

Controversia sobri el su orixin

Duranti la Antigüedá, el teólogu Jerónimu asocidó alos hunos colos antiguus escitas. Esta identificación, xuntu cun mieu general ala llegada del Anticristu a finis del sigru IV, dio lugal ala su identificación con Gog i Magog. Esta demonización delos hunos se reflexa tamién ena obra Getica de Jordanes, escrita nel sigru VI, el qual los retrata cumu un puebru diabólicu que desciendi de demonius i bruxas.

Ogañu el orixin delos hunos acontina siendu un tema controversiaun pa los estoriaoris. A partil de Joseph de Guignes nel sigru XVIII los estoriaoris án asociau alos hunos qu’apaeçun n'Uropa nel sigru IV col puebru xiongnu, que se mienta enos rexistrus estóricus chinus dela dinastía Han, el qual abríe formau una importanti entiá política enas estepas dela atual Mongolia.

Pa cola segunda metá del sigru XX otrus autoris encetarun a espressal el su escepticismu pa con esti enfoqui tradicional, basandu-si prencipalmenti nel estudiu delas huentis arqueológicas i paleoantropológicas. Pa dalgunus autoris, cumu Otto Maenchen-Helfen, la relación hunos-xiongnu careci de sustentu devíu, en parti, ala distancia cronológica entri dambos dos puebrus. Se sugieri que, de habel dessistiu conexionis entri los hunos i los xiongnu, es probabli que solu aiant siu afinidais colturalis en lugal duna contiuniá étnica. Basandu-si enos topus de tumbas hunas i xiongnu, Maenchen-Helfen concluyó qu’albitraba que no dessistía correspondencia entri los restos umanus de dambos dos puebrus. Otru puntu a miental es la prática dela deformación craneal praticá polos hunos uropeus i iranís que no á siu atestiguá enos xiongnu. Inque Maenchen-Helfen realiza una importanti crítica ala postura tradicional, el su análisis no respondi concretamenti ala cuestión del orixin delos hunos, inque sí aclareci qu’estos no palraban una luenga irania, sinu una túrquica.

Más ogañu dalgunus estoriaoris án revalorau la semilitú delos etnónimus presentis en antiguas luengas. Las dos huentis prencipalis son una carta enviá pun comercianti sogdianu datá del añu 313, ena qual relata la invasión del norti de China pol puebru Xwn nel añu 311, i la referencia ena traducción d'antiguus sutras budistas pun monxi bactrianu dela ciá de Dunhuang, el qual aplicó la parabra Huna pa referil-si alos xiongnu. Étienne de la Vaissière argumenta que dambos dos decumentus demuestran que Huna o Xwn fuerun las transcripciones exactas del nomi delos xiongnu. Christopher Atwood apoia esta postura i prantea qu’el sánscritu Huna es una transcripción dela parabra Xona, la qual fue escrita en chinu antiguu duranti la dinastía Han. Tamién argumenta qu'esta referencia fue transmitía pol comerciantis griegus bactrianus a Uropa, ondi se convirtió en Ounnoi i Hunni en griegu i latín, respetivamenti. Otra referencia se topa nel libru Wei Shu del Estau Wei del norti, el qual contieni referencias delos restos delos xiongnu que vivierun enas estribaciones de Altái. Pa De la Vaissière, la huenti china demuestra qu’estos xiongnu d’Altái (delos qualis se originarun los hunos iranís i uropeus) conservarun la su identidá sigrus endispués dela su expulsión delas estepas mongolas, argumentandu assin qu’el vínculu qu’uni alos hunos colos xiongnu es de carátel políticu i no étnicu. De fechu, los hunos uropeus, al igual que los kidaritas i heftalitas, se describin mejol en términus políticus qu’en términus étnicus i lingüísticus.

Otra prueba del vínculu entri hunos i xiongnu es, dendi el puntu de vista arqueolóxicu, la gran cantidá de calderus topaus dendi la llanura panónica ata el desiertu d'Ordos. Estos presentan una clara evolución coltural (de hormas simpris a hormas más comprexas) que evidencia que los calderus hunus se originarun delos calderus xiongnu.

Estoria

Asia oriental i central

Sigún las crónicas dela antigua China, los xiongnu eran un puebru nómada de ganaerus i guerrerus, que vivía enas estepas orientalis al norti dela Gran muralla. La dinastía Qin pudo rechazal los sus ataquis de horma más o menus eficaz, peru tras la cáida desta, los xiongnu lograrun superal la Gran Muralla China i encetal una seri d'incursiones en territoriu chinu. Los xiongnu tamién combatierun contra otrus puebrus nómadas, i duranti el mandatu del chanyu Modun (209-174 a. C.) derrotarun alas tribus delos donghu, dingling i hunyu, unificandu pol primera ves las estepas mongolas. El su iju i sucesol, Laoshang, expandió el control xiongnu pa cola cuenca del Tarim, ondi derrotó al puebru delos yuezhi, forçándolus a migral alas regiones de Bactriana i Gandara, ondi estos hormarían el Emperiu kushán. L'emperadol Wen dela dinastía Han quiso alexal el peligru pagándu-lis tributus (preferentiementi seda i cerealis), algo que col tiempu sedríe una constanti ena relación delos xiongnu con otrus puebrus ata varios sigrus endispués. Los bienis qu'a la corti xiongnu recibía cada añu eran tan abondus qu'el los intercambiaban con notablis beneficios colos comerciantis d’ociidenti que llegaban pola Ruta dela seda. Tamién uvu matrimonius de conveniencia entri princesas chinas i biembrus dela aristocracia xiongnu col pesqui de sellal la pas.

Mapa aprossimau del área d'extensión delas hordas xiongnu

Esta relación se quebró quandu l'emperadol Wu dexó de pagal-lis tributus i, anticipandu-si ala esperá reacción delos xiongnu, envió varias expediciones alas estepas a partil de 133 a. C., inque solu una tuvo éxito: la qu’en l'añu 127 a. C. consiguió expulsal alos xiongnu del cursu superiol del río Amarillu. Las expediciones posterioris mantuvierun entretenius alos nómadas combatiendu nel su própiu territoriu de horma constanti, lo qu’un los debilitó. Nel añu 121 a. C. fuerun derrotaus nel correol de Gansu pol xeneral chinu Huo Qubing i perdierun el control delas ciaidais-oasis dela cuenca del Tarim. Los chinus pusierun la çona baxu el su mandu i entrarun en contatu pol primera ves colos persas helenizaun de Ferganá, que introduxerun l'alfalfa i el cavallu árabi en China.

Los debilitaun xiongnu se escindierun en dos ramas pa l'añu 48. Una dellas, los xiongnu del sul, se ubicó ena región de Ordos cumu aliaus delos Han. Dambas dos partis entrarun en polvoreu; i nel añu 89 las ramas tribalis septentrionalis fuerun derrotás polas del sul, las qualis contaban con assistencia del exércitu Han. Los xiongnu del norti fuerun forçaus a migral pa l'oesti, ala región de Altái, perdiendu la su posición enas estepas mongolas las qualis passarun a manos delas tribus xianbei pa la metá del sigru II. Pola su parti, los xiongnu del sul devierun afrontal tensionis pol su estilu de via nómada cola puebración china local. Estu no impidió que Cao Cao los gastara cumu cavallería nel su exércitu enas guerras sucedías luegu dela cáida dela dinastía Han. Cavi miental qu'a la aristocracia delos xiongnu del sul cambió el su apellíu a Liu pol razonis de prestixiu, afirmandu qu'estaban relacionaun cola familia imperial Han a través dela vieja política de matrimonius mestus.

Endispués del establecimientu dela dinastía Jin nel añu 265, China se mantuvo unía duranti un brevi períodu ata qu’el norti fue invadiu pol puebrus bárbarus, entri los que se toparan remanentis delos xiongnu del sul, los qualis ya abían siu bastanti enfruenciaun pola coltura china. Liu Yuan, un descendienti del últimu caudillu xiongnu reinanti, aglutinó alos sus siguioris i encetó a expandil la su autoriá, reivindicandu amás el su supuestu linaxi i conexón cola dinastía Han, tal i cumu demostró cola titulatura pa la dinastía qu’estableció en 304: Han. Nel 311 los xiongnu conquistarun Luoyang, puntu final dela Ruta dela Seda, i tamién ocuparun Chang’an, la qual gastarun cumu capital pol varios añus. Esta dinastía gobernó nel norti de China ata que finalmenti sucumbió enas guerras previas ala formación dela dinastía Wei del norti.

El períodu d'aprossimadamenti un pal de sigrus, a partil dela migración al oesti delos xiongnu del norti, está caracterizau pununa relativa escuriá enas huentis. El libru dela estoria del estau Wei del norti confirma la dessistencia dun estau xiongnu pa l'ussudu delas montañas d'Altái. Esta vaga referencia enas huentis chinas hazi suponel que los xiongnu no desplegarun una activiá política i milital d'importancia, cumu sí abían fechu antañu, lo qual puei estal relacionau cola cercanía nel esti delos xianbei, los qualis los abían derrotau i seguramenti subyugau duranti el sigru II. Esta situación geopolítica desfaborabli abríe cambiau pa la metá del sigru III, quandu, pa l'esti, los xianbei se fragmentarun en facciones enfrentás entri sí i, pa l'ussudu, el Emperiu kushán encetó el su declivi. Estu abríe permitiu alos xiongnu recuperal-si pocu a pocu i abandonal las estribaciones d'Altái en varias oleás entri los añus 350 i 360: dalgunas se dirigierun pa col río Yaxartes, nel qual entrarun en contatu colas colturas iranias dela çona, asselajadamenti colos comerciantis sogdianus i bactrianus, i otras se dirigierun pa col río Volga, entrandu ena estepa póntica.

Persia i India

Alreol del añu 350 las huentis persas i romanas mientan la invasión delas rayas orientalis del Emperiu sasánida a manos delos xionitas o chionitas, los qualis saquearun varias ciaidais. El estoriaol Amianu Marcelinu defini craramenti a estos chionitas cumu hunos. El términu persa pa referil-si a estos invasoris, Xyon, provién del avésticu Xyaona, desiniaura qu'apaeci enos testus sagraus zoroastrianus cumu los enemigos del profeta Zoroastru. Esti ataqui tomó pol sospresa al emperadol persa Sapor II, que nesi momentu se topaba sitiandu la fortaleza romana de Nísibis en Mesopotamia. Esti partió liheru pa Sogdiana col su exércitu pa hazel frenti alos chionitas duranti una guerra que duró varios añus, ata que finalmenti los derrotó, estableciendu luegu una aliança col rei chionita Grumbates. Quandu Sapor volvió a atacal alos romanos nel añu 360, le acompañaban varios chionitas nel su exércitu. Amianu Marcelinu narra que duranti el sitiu de Amida, el únicu iju de Grumbates cayó ena batalla i fue endispués quemau nuna grandi pira funeraria, algo inacetabli pa los persas, los qualis rechazaban esta prática devíu a qu'a la su religión, el zoroastrimu, la proivía. Ata el reinau de Sapor II los chionitas se mantuvierun cumu aliaus delos persas, se huerun iranizandu pocu a pocu (dendi el puntu de vista coltural i lingüísticu) i se establecierun enas provincias nororientalis del Emperiu persa. Endispués conformarun dinastías endependientis i acuñarun moneda.

Entri los añus 420 i 440 los kidaritas fuerun la primera dinastía chionita en regil de horma endependienti i apropial-si delas regiones de Sogdiana, Bactriana i Gandara. Estos incorporarun nel su goviernu elementos dela antigua dinastía kushán, reclamandu sel los herederus políticus destos. Endispués incursionarun nel Punyab, ondi entrarun en polvoreu col Emperiu gupta dela India al qual hizun abondas derrotas, propiciandu el su declivi. Tamién derrotarun alos sasánidas, los qualis devierun carmal las sus demandas con tributus. Los kidaritas finalmenti declinarun anti el ataqui dendi el norti delos heftalitas, otra delas ramas delos chionitas, los qualis se aliarun colos sasánidas de Peroz I i destruyerun la su capital, Balaam, nel 467.

Los heftalitas apoiarun a Peroz contra el su jermanu i usurpador nel tronu, Hormizd III. Quandu Hormizd fue derrocau, Peroz decidió vuelvil a ponel las provincias orientalis baxu control persa, atacandu alos sus antiguus aliaus, peru fue derrotau i fechu presoneru pol rei heftalita Kushnavaz, siendu lliberau más tardi tras dexal al su iju Kavad cumu rején. Quandu Peroz volvió a atacal, fue otra ves venciu i muertu ena batalla de Herat. Kavad I acidió al tronu, peru las ostilidais colos heftalitas acontinarun duranti décadas. Assin i tou, el mesmu Kavad I pudo recuperal el tronu persa col apoiu destos quandu fue usurpaun brevi-tiempu pol su jermanu Djamasp en 498. Pa l'añu 509 los heftalitas se abían adueñau del tou del antiguu territoriu kidarita, dendi el río Indu ata la cuenca del Tarim. Al esti del Indu, el rei Toramana incursionó ata la región de Madhya Pradesh i el su sucesol Mihirakula estableció la su capital en Sagala. Finalmenti, l'emperadol sasánida Cosroes I concretó una aliança colos göktürk i xuntus consiguierun derrotal nel añu 557 alos heftalitas ena batalla de Bujará. El su reinu fue devidiu en dos a lo largu del río Oxus, siendu la parti norti pa los turcus i la sul pa los persas.

Uropa

El orixin delos hunos uropeus sedríe topal-si enas tribus xiongnu d’Altái que se dirigierun pa l'oesti, alas llanuras al norti del mari Caspio. Pa la segunda metá del sigru IV las huentis romanas mientan qu’el puebru hunu, baxu el mandatu del rei Balamber, atacó las tierras delos sármatas alanos, qu’en essos momentos se extendía entri los ríos Volga i Don, sometiendu a esti puebru. Endispués avançarun pa la cuenca del Dniéper, ondi vencierun alos ostrogodus en 375, provocandu qu’una parti destos se refugiarie colos sus vezinus visigodus i otra maioritaria huerie forçá a servil nel exércitu hunu. Pol últimu, los hunos cruçarun el Dniéster nel 376 i derrotarun tamién alos visigodus, que solicitarun asilu al Emperiu Romanu d'Orienti. Las tierras en polval delos hunos se extendían ya dendi el mar Caspio al Danubio. Otrus puebrus germánicus, cumu los gépidus, hérulus i esciros, tamién fuerun sometius, al igual que puebraciones protoeslavas.

Cuadru de Ulpiano Checa. La invasión delos bárbarus o La entrá delos hunos en Roma (1887)

Nel añu 395 encetarun a circulal rumores d'alarma ena raya romana. Un oficial del exércitu imperial, Amianu Marcelinu, destinau en Tracia, contó la mieu-dá apaición a orillas del Danubio dunos jombri que describió assin:

Las huentis mientan a varios reyes hunus, cumu Uldin, Charaton i Octar, los qualis mantuvierun un lideralgu parcial sobri los hunos. Assin i tou, la presión exercía polos hunos hizu que vándalus, suevus, alanos i burgundius cruçarun el Rin nel añu 406 devastandu la Galia i assentándu-si finalmenti en Hispania (a excepción delos burgundius que se quedarun nel valli del Ródano). Pola su parti, los visigodus baxu el mandatu del su rei Alaricu saquearun Roma nel 410 i luegu se assentarun en Aquitania. Aprovechandu el caos desatau pol estos puebrus, el rei hunu Rugila cruçó el río Danubio nel 422 i atacó alos romanos con tal fuerça qu'el emperadol d'Orienti Teodosio II tuvo que pautal con él la entrega de 350 libras d'oru añualis pa logral la pas. En 434 murió Rugila, dexandu el tronu de horma conxunta alos sus sobrinus Bleda i Atila, ijus del su jermanu Mundzuk. Estos mantuvierun la pas colos romanos a cámbiu de que duplicaran el tributu.

Nel añu 439 acusarun alos romanos de habel rotu el acuerdu de pas luegu de qu'el obispu dela ciá de Margus cruçarie el Danubio i profanarie las tumbas reales hunas que abía ena orilla norti. Atila i Bleda saquearun varias ciaidais romanas, entri ellas Margus, Viminacium, Singidunum, Naiso, Serdica i Filipópolis. Derrotarun alos romanos en todas las batallas i cercarun Constantinopla, la qual no pudo sel conquistá gracias alas sus polerosas murallas. Luegu pusierun rumbu a Galípolis, ondi derrotarun alas tropas imperialis que se topaban refugiauas allí. Tras la derrota, Teodosio acordó una nueva pas, muncho más caru qu’a la anteriol, ena qual acidió a pagal 6.000 libras d'oru cumu castigu pol no habel cumpliu el tratáu de pas anteriol, i un tributu añual triplicau que ascendió a 2100 libras añualis. Tras estas victorias, Bleda i Atila se retirarun alos sus dominius al norti del Danubio.

Çonas controlás polos hunos d'Atila.

Atila se coronó rei únicu endispués de que murierie el su jermanu duranti una caçá nel añu 445, possibriamenti assassinaun pol él mesmu. Atacó de nuevu alos romanos en 447, obteniendu una victoria en campu abiertu ena batalla del Utus, peru cun altu costu en jombris. Seguidamenti devastó Grecia ata el passu delas Termópilas i enos añus siguientis se mantuvo una especii de ostiliá latenti entri Atila i Teodosio II, cumu narra Priscu (fragmentus dela su Estoria), el qual lo visitó xuntu a varios embajadoris romanos nel añu 449. Se concluyó una nueva pas, pola qual los romanos abían d'evacual una ancha franja surdanubiana i entregal grandis tributus, cuya cuantía no precisan las huentis.

Atila. Dun'ilustración pa la Edda Poética

Posteriormenti Atila se propusu atacal alos visigodus del reinu de Tolosa, que no se mantenían en polvoreu con Valentiniano III ni col xeneral Flavio Aecio, con quinis Atila estaba en güenas relaciones ata nesi momentu. Nostanti, nel añu 450 Honoria, la jermana del emperadol, le envió a Atila una petición d'aiúa col pesqui de que la librara de contrael matrimoniu cun excónsul. Cumu prueba dela su identidá, Honoria envió el su anillu, situación que Atila aprovechó pa reclamal-la cumu esposa i pedil la metá del emperiu cumu doti. Anti esta circunstancia, Aecio i el rei visigodu Teodorico I pautarun una actuación conxunta col pesqui d'aparal alos hunos, los qualis entrarun ena Galia nel añu 451. Atila conquistó Divodurum i luegu intentó ocupal Aurelianum peru fue atravancau devíu ala llegada del exércitu romano-visigodu. Los dos exércitus se enfrentarun ena batalla delos Campos Cataláunicus, cuyo resultáu se considera una victoria estratéxica pa la aliança visigodo-romana. Dendi el puntu de vista d'Aecio, el mejol resultáu fue lo que prociu: Teodorico murió, lo qual generó una crisis sucesoria ena aristocracia visigoda, i Atila se retiró col su exércitu al esti del río Rin.

En 452 Atila pidió otra ves el su matrimoniu con Honoria. Invadió Italia i saqueó las ciaidais de Aquilea, Patavium, Verona, Brixia, Bergomo i Mediolanum, sin qu'Aecio pudierie aparal-lu. Los hunos lograrun avançal ata la mesma Roma. Nostanti, munchus guerrerus abían muertu, no pola acción del enemigu, sinu pola jambruna i la pesti que nesi momentu asolaban Italia. Frenti alas puertas de Roma, el papa León I se entrevistó con Atila, i se diz que le suplicó que no saquearie la ciá santa. Finalmenti, i contra tous los pronósticus, Atila se retiró tras la entrevista col papa i empendoló el Emperiu d'Ociidenti. El nuevu emperadol d'Orienti, Marciano, interrumpió el pagu de tributus pautau pol Teodosio II; i Atila se aviava pa atacal-le, quandu murió duranti la su nuechi de bodas, nel añu 453.

A la muerti d'Atila le sucedió el su iju Elak, que uvu de hazel frenti ala sublevación delos sus jermanus Dengizik i Ernak. Pocu endispués, varios puebrus sometius, cumu los gépidus, ostrogodus, hérulus i otrus, se rebelarun al mandu de Ardarico, caudillu delos gépidus. Los hunos fuerun derrotaus ena batalla de Nedao nel 454, lo qual senificó el fin delos hunos cumu potencia en Uropa. Dalgunus hunos fuerun aniquilaus ena llanura panónica, que fue ocupá polos gépidus, munchus otrus se retirarun al esti delos Cárpatos.

Tribus sucesoras delos hunos pa l'añu 500

Muertu Elak, los hunos se volvierun a devidir entri los sus jermanus Dengizik i Ernak, el primeru al mandu delos hunos ociidentalis i el segundu delos orientalis. Luegu dela derrota sufría nel 454, dambos dos jermanus atacarun alos ostrogodus, los qualis se abían endependiçau delos sus señoris hunus, peru fuerun derrotaus pol Valamiro. Posteriormenti, alreol del 465, Dengizik i Ernak enviarun embajadoris a Constantinopla solicitandu establecel un mercau pal intercambiu de provisionis. Esta solicitud fue rechazá polas autoriáis romanas, lo qual llevó a Dengizik a atacal alos romanos sin la aiúa del su jermanu Ernak, peru fue derrotau i assassinaun en 469. Los remanentis delos hunos quedarun baxu el mandu de Ernak i afrontarun finalmenti alas nuevas puebraciones oghúricas que llegaban dendi el esti, los saraguros i los onoguros, los qualis, sigún Priscu, eran pressionaus a la su ves dendi el esti polos sabirus. Sigún Procopio de Cesarea, luegu dela muerti de Ernak, el reconfigurau Estau hunu se devidió otra ves entri los sus dos ijus, hormandu dos hordas distintas inque relacionás entri sí: los cutriguros al oesti i los utiguros al esti. Contingentis de estas puebraciones sirvierun cumu mercenarius del exércitu bizantinu duranti el sigru VI.

Nel añu 558 los kutriguros, dirigius pol caudillu Zabergán, cruçarun el Danubio i saquearun territoriu bizantinu, llegandu mu cerca dela capital, Constantinopla. Al añu siguienti fuerun derrotaus pol xeneral Flavio Belisario ena batalla de Melantias. Col pesqui d'evital nuevas incursiones, l'emperadol Justiniano I incitó, en primera instancia, el enfrentamientu entri kutriguros i utiguros, sobornandu a estos últimus. Luegu encargó alos ávaros provienientis del esti sometel a estas tribus a cámbiu d'oru. Desta manera, las últimas ramas tribalis considerás hunas fuerun subyugás polos ávaros los qualis se posicionarun cumu la nueva potencia nómada dendi la llanura panónica ata la estepa póntica.

Sigún dalgunus autoris, los onoguros –xuntu con remanentis delos utiguros i kutriguros– conformarun la basi del puebru protobúlgaru. La dominación ávara sobri estas tribus nunca fue absoluta, lo qual aclareci el fechu de que baxu el lideralgu del caudillu Kubrat los protobúlgaros finalmenti se sacudieran la tutela delos sus señoris nel sigru VII i establecieran la Primitiva Gran Bulgaria.

Coltura

Calderus hunus

Pol su orixin xeográficu se cree qu'el idioma hunu devió pertenecel a alguna familia lingüística de Asia Central, cumu la túrquica, yeniseica o mongólica. Otra hipótesis es que huerie dela familia indoeuropea, ya sea irania o inclusive eslava, teoría basá enas inscripciones de monedas jallás en tumbas hunas procedentis del atual Afganistán. Nostanti los investigadores consideran qu'a la farta de testus hunus impidi establecel qualquiel filiación más allá de meras elucubraciones.

Los hunos eran nómadas i vivían en choças temporalis, assin i tou conhecían la propiedá dela tierra. Pola su condición nómada, la ganaería i la caça tenían un papel más importanti ena su economía qu’a la agricultura. Las carencias ena su dieta eran saciás pol mediu del commerciu i el saqueu en territoriu enemigu. Las armas que gastaban ena guerra eran la espada recta, la lança, el laçu (cuerda cola que cativaban alos sus enemigos) i el arcu, que solían disparal dendi el cavallu. A estu contribuía el gastu del estribu, que tomarun delos chinus i que introduxerun más tardi en Persia i Uropa. Cavi miental la proidución de calderus, los qualis demuestran una contiuniá coltural colos calderus delos xiongnu. Estos calderus se topan a lo largu de toa la estepa euroasiática.

Sigún las huentis griegas i romanas, el goviernu delos hunos estaba a cargu dun rei, inque es discutibri quántu se aplica esti términu pal casu delos hunos i quánta autoriá tenía el rei sobri el total delos hunos i demás puebraciones sometiu. Ai casus enos qu'a la huentis ábate hazin mención de ciertus reyes, lo qual demuestra poca activiá pol parti delos hunos o un períodu de desunión dela horda. En otrus casus, col lideralgu de pressonalidais más huertis o carismáticas (pun ejemplu, Atila), los hunos fuerun escapás de asestal contundentis derrotas alos romanos i germanus. En otrus casus, la autoriá estuvo compartía pol dos caudillus a la ves, cumu los casus de Octar i Rugila, Bleda i Atila o Dengizik i Ernak.

S'á estimaun que en 425 eran 60 000 guerrerus, totaliçandu un puebru de 300 000 pressonas, entri los que seguramenti devan contal-si puebraciones subyugás d’orixin germánicu, eslavu i iraniu.

Dela su religión se sabi mu pocu. Aparientiementi tenían un tipu d'adoración al cavallu (ya qu'estos animalis eran una figura ábate sagrada pa ellus). Si se almiti la teoría de que fuerun un puebru d’orixin altaicu, possibriamenti praticaran el tengrianismu. Las huentis romanas suelin referil-si a ellus cumu individuos subumanus carentis de qualquiel clasi de dios i moral, sin creencia n'otra via aparti dela terrenal, inque se sabi que tenían algo apareciu a chamanis o bruxas ena su tribu (que creían ena dessistencia de abominaciones subterráneas infernalis), especialiçáus ena adivinaura a partil del examen de restos i uesus de animalis. Originalmenti cremaban alos sus muertus, inque más alantri encetarun a inhumal-lus. Praticaban tanto la poliandria cumu la poliginia.

El estoriaol romanu Amianu Marcelinu nos dexó un testu ondi poemus osserval la visión deformá que los romanos tenían sobri los hunos:

Los hunus i los úngarus

Duranti más de quinientus añus s'á creiu que los húngarus son descendientis dretus delos hunos. Inque las tribus magiaris solu encetarun a establecel-si ena çona xeográfica dela atual Hungría a finis del sigru IX (varios sigrus endispués dela desintegración dela confederación delos hunos), esti argumentu sirvió pa legitimal el polval dela casa Árpád i los sus descendientis enas tierras que ocuparun. Ai una leyenda medieval que remonta el linaxi del caudillu magiar Árpád ata el própiu Atila, iju de Bendegúz i pai de Csaba, pai de Ed, pai de Ugyek, pai de Álmos, pai de Árpád.

Enos sigrus posterioris, nel Renacimientu i ena Edá Moderna, acontinarun con esta concepción inque se le dio menus credibiliá. Esta interroganti encetó a ocupal a munchus estoriaoris húngarus ena Edá Moderna i Contemporánea, quinis pocu a pocu fuerun jallandu las incongruencias del postulaun dela descendencia dela casa real húngara dendi Atila. El estoriaol Pál Hunfalvy (1810-1891) fue el primeru que consideró esta conexón entri los húngarus i los hunos cumu algo irreal. Esta postura fue atacá polos estoriaoris Károly Szabó, Géza Kuun, Géza Nagy, Bernát Munkácsi, József Thúry, Frigyes Hirtl i Ármin Vámbéry. Nostanti, la cancillería húngara tomó posición en favol de Hunfalvy, manteniéndu-si académicamenti ata ogañu.

Los nomis Atila, Csaba i Réka (la esposa de Atila) son mu popularis entri los húngarus, inclusive i asselajadamenti ena atualiá. Pol otra parti, enas crónicas húngaras, Bleda, el jermanu de Atila, se llama Buda. Esta es la explicación que se le intenta dal dendi el Meyuevu al orixin del nomi dela ciá de Buda, que posteriormenti, unía con Pest, hormará la ciá de Budapest.

Bibliografía

• Asimov, Isaac (1983) La Alta Edad Media: Las edades oscuras, Editorial Alianza.
• Atwood, Christohper (2012) Huns and Xiōngnu: New thoughts on an old problem, in: VV. AA., Studies in History and Culture in Honor of Donald Ostrowski.
• Bock, Susan (1992) Los hunos, tradición e historia, Universidad de Murcia.
• Botton Beja, Flora (2000) China, su historia y su cultura hasta 1800, El Colegio de México, Centro de Estudios de Asia y África.
• de la Vaissière, Étienne (2005) Huns et Xiongnu, Central Asian Journal N.º 49, pp. 3-26.
• de la Vaissière, Étienne (2007) Is there a “Nationality of the Hephtalites?”, en: Hephtalites, Bulletine of the Asia Institute N.º 17, pp. 119-132.
• de la Vaissière, Étienne (2005) Sogdian Traders: A History, Leiden.
• de la Vaissière, Étienne (2015) The steppe world and the rise of the Huns, in: Maas, Michael, Age of Attila, Cambridge.
• Gernet, Jacques (2005) El mundo chino, Editorial Crítica.
• Grousset, René (1970) The empire of the steppes, Rutgers University.
• Heather, Peter (2010) Empires and Barbarians: The Fall of Rome and the Birth of Europe, Oxford University Press.
• Homo, León (1971) Nueva historia de Roma, Editorial Iberia, Barcelona.
• Kim, Hyun Jin (2016) The huns, Routledge.
• Kim, Hyun Jin (2013) The huns, Rome and the birth of Europe, Universidad de Cambridge.
• Lebedynsky, Iaroslav (2001) Armes et guerriers barbares au temps des grandes invasions: IVe au VIe siècle apr. J.-C, Errance.
• Maenchen-Helfen, Otto (1973) The world of the huns: studies in their history and culture, University of California.
• Olaya Montero, Nuria (2017) Las fuentes clásicas y orientales relativas a las fronteras septentrionales del Imperio Sasánida (224-651), Universidad Autónoma de Barcelona.
• Sinor, Denis (1990) The hun period, en: Sinor, Denis, Cambridge History of Early Inner Asia, Cambridge.
• Soto Chica, José (2012) Bizancio, la Persia sasánida, los búlgaros y la disputa ávaro-turca por el control de las estepas 557-603, Universidad de Granada.
• Soto Chica, José (2012) Bizantinos, sasánidas y musulmanes: El fin del mundo Antiguo y el comienzo de la Edad Media 565-642, Universidad de Granada.

Véa-si tamién

Atila

Idioma hunu

Tengrianismu

Hunos brancus