Ina

O palimo’ot no mama 爸爸的叮嚀

Pa’ayaway a sowal: 前言

“ Matiya o ’orad ko ngiha no mama,sakahemaw sa i tanginga a masoni’’,O kaka ci Siwley, tadaki’mel ato maolah a malawla, i fongngoh ningra ci kafong to landaway a hangkaci,maolah a maro’ i papapapahan a minengneng to adiyoc no ’orad i fanaw.O safa ci Siwi,tadamitengil to sowal,i falohang ningra mapakafit ko kahengaay a sasifing.

Damsayay a ngiha’ no mama 爸爸慈祥的聲音

Ira ko tatoloay a takola’ ci loma i fanaw,kaloromi’ami’ad malacecay cangra itini a ma’orip .O mama a takalo i, o tadamama nangra, nika oroma mato o widang ato o kapot no wawa a misalama. Kaloromi’ami’ad mararid a pakaynien no mama i damsayay a tawa ato mipakongko, a mipalimo’ot to wawa ningra "kasasiolah, kasasidama ato kalalok a matayal saan”. ”nikaorira, o kaka ci Siwley paca’of sa ,"mafa’ to kako, mafana’ to kako saan". Nika o safa ci Siwi tadamaolah a mitengil to sawal no mama, i mata ningra iraay ko mato malikatay a losa’, nanay o sowal no mama ma’emin a matilid i faloco’ningra.

O radiw no takola’ 青蛙的歌聲

Nai fanaway a ngiha no takola’ tadamakeling a matengil ko soni, kowa kowa sa a romadiw ci Siwley,matiya o romadiway to radiw ningra,arawhan i,mato mipaca’ofay to damasayay a pipalimo’ot no mama. O matiniay ko ’orip nangra to romi’ami’ad’,ano masadak to ko cidal,salipahak sa to cangra a malacecay,masadak a matayal,ano micelem ko cidal nai wali salihaday sato cangra a minokay. O kalipahakan a ’orip nangra matiya makawitay to i kaloromi’ami’ad,fiw:fiw sa ko fali,o radiw a fadihang,miliyaw a makero i fafaet no fanaw,mato salihaday sanay a pasowal to matatodongay ato tadasoelinay a lipah.Matomies i faloco’ nangra ko ’icel, awa’ay toko katalawan nangra, nawhai,iraay ko mama a mipatiha.Yaradiw no takola’,malo midipotay to i kaemangay ho a ’orip nangra, o tadafangcalay a olic.

Mipatihi i kacifalian 風中的陪伴

替代文字

Yo cecay a romi’ad,mato’as to ko mihecaan ni mama, salihaday sato a mati^enang a miliyas to kaolahan nira ci Siwley ato ci Siwi. Fiw:fiw sa ko fali,caay toko mamatengil ko ngiha’no mama,nika mahapingan ni Siwley manangangay i fali ko ngiha’ no mama. Matomes no losa’ ko mata nangra,o soni no ’orad ato soni no fali mato ngiha’ no mama a pasowal ”mararid kako a patihi i tamowanan saan”.

Caay ka tawal a palimo’ot 忘不了的叮嚀

Itiya to,maharateng nangra a malakaka ko palimo’ot no mama,O soni no ’orad ato soni no fali,mato o ngiha’ no mama i tanginga a pasowal " kasasiolah, kasasidama ,kalalok a matayal sanay a sowal”. Itiya a malaecay cangra a miharateng to i ’ayaway a romi’ad,pikapot no mama i cangraan toya tera’tera’ay a romi’ami’ad.

Mairol i ka’oradan 雨中的思念

Saramasmas sa ko ’orad i fanaw, ya i fanaway a papah ira ko mato falatfatay a tera’ no nanom.Aro’sa ci Siwley i papahan,ngengeng han ningra ko i seraay a adiyoc no ’orad,maharateng ko palimo’ot no mama ningra. O soni no ’orad mato o ngiha’ no mama.Tata’angta’ang sa ko ’orad i,sa’ada:da sa ko faloco’ nangra, caayay kanga’ay a pakaynien i sowal a mirayray. O ’irol no faloco’matiya o radiw,na’on sa a masadak.

kasasidama 互相扶持

Yo cecay a romi’ad,masadak cangra a miala to kakaenen ,cay pina’on matoro’ i lalan ci Siwi,tangsol han no kaka a mikiting ko kamay ni Siwi,itiya to a misatapang cangra a minanam to masasiolah ato masasidamaay a ’orip. I kaikor no tireng nangra,mato iraay a ma’araw ko damsayay a tireng no mama a mipa’icel i cangraan , sa’icelen a misiayaw to rarakaten. Salihaday sato ko faloc’ ni Siwi,itiya to a mafana’ ci Siwley a mamihapopo a midipot to safa ningra.Onian ko tadamaanay a kalimelaan a lalosidan ko niowaan no mama nangra .

O ngiha’ no ’orad ko mihinomay 雨聲的安慰

O dadaya’ay a fanaw,titatita sa ko ngiha’ no ’orad ,fiw:fiw sa ko honi i papapapahan.Takec han ni Siwley ci Siwi,matengil nangra ko piceli no takola’,mato palimo’ot no mama nangra i cangraan,sadiheko sa ko faloco’nangra. Ano kakayakaya ko dadaya,ano i ka’ayaw no lalan matomes ko cekacekaan,o olah no mama,malecad to o ’ool no nemnem a micepa’ to makedahay a faloco’,matiya o fo’is a mipataengad to i ka’ayaway a lalan.Ona ’olah,caay ka kakaya ko toki a mafalic,caay ka hakowa ko la’ed a malahedaw,mangalef a mangalef to a mangaang i lalinik no faloco’,o damsayay ato o tanetekay,a mararid malo saka ’orip nangra a pitadiecan.

Kairolan a kacifo’isan 星空下的想念

Masa’esa to,matomes i kakarayan ko fo’is.Torohan ni Siwley koya satata’angay a fo’is,sowal sa” minengnengay ci mama i titaanan”. Ca’a sako fongoh ni Siwi a minengneng to fo’is,na’on sa a mita’ong ,sedisa a matawa,i faloco’nangra,matomes ko pacafay ato olah.

Caay ko mamalahedaw a olah 愛永不消失

Ano titatita sa a matengil ko soni no ’orad,mamatengil ko piceli no takola’ a ngiha. Yomatera’ to ko ’orad,seli sa a malesa ko losa’ no mata i pising nangra,caykanca mararom to ko falocao’,o irol no faloco’ mato falihang a soni,o palimo’ot no mama,miliyaw a pangiha i tanginga. Mafana’ ko wawawawa, caayay ko mamalahedaw ko olah no mama nangra,i ca^enot (harateng)a marayray ato mikadado’edo’ ,i ka’oripan nangra a malikat, o mamararid a mipacafay i cangraan.

Ina o miliput ko wawa!midemak aca to tatayalen no loma' ato matayal i papotal.