Irak

Template:CountryIrak, á̱ ndyen ma̱ng a̱lyoot a̱gwomna̱ti ka nang Ri̱pobi̱lik Irak wu, yet a̱byin kya di̱ fam A̱siya Jenshyung di̱ fam-a̱byin kwai-nfwuo-á̱niet hu nang á̱ ngyei A̱ka̱wa̱tyia̱ A̱tyin a̱ni. Ma̱ng shi á̱niet ku swak milyon 46, kikya si̱ yet a̱byin 14 ka ka̱ swak ma̱ng byia̱ á̱nietbishyi ma̱ nka a̱ni mi̱ vam-a̱byin A̱siya hu ma̱ng a̱byin 33 ka̱ swak ma̱ng shi á̱nietbishyi mi̱ swanta hu. Ka̱ yet ri̱pobi̱lik malikpacam mundundung kya ka̱ byia̱ bibyintyok gwomna 18. A̱byin ka si̱ byia̱ a̱gi̱gak ma̱ng bibyin Turukya di̱ fam a̱za hu, Iran di̱ fam a̱tyin hu, A̱ngam A̱sa̱khwot Pari̱si wu ma̱ng Kuwet di̱ fam a̱tak-a̱tyin hu, Sa̱udi A̱rabya di̱ fam a̱tak hu, Urdun di̱ fam a̱tak-jenshyung hu, ma̱ng Suriya di̱ fam jenshyung hu. A̱keangtung ka ma̱ng a̱gba̱ndang a̱keang nka gu swak ma̱ng shi a̱ni nggu wa yet Bakdat. Á̱niet Irak ba shyia̱ di̱ vwuon, ma̱ng nkhang-a̱byin mbeang nyám a̱yit tai. Ma̱nang a̱byin ka yet kap swanta A̱la̱raba ma̱ng Khwikpaa̱pyia̱ hwa a̱ni, a̱lyiak á̱niet Irak ba yet Á̱nietkpaa̱kpeang – nwuat nfwuo jhyang si̱ yet Khwiki̱risi̱ti, Khwiyazidi, Khwimande, Khwiyari̱sani, ma̱ng Khwizarotuti̱ra. Lilyem a̱gwomna̱ti Irak hu hwa yet La̱ra̱ba ma̱ng Kurudi; lilyem ghyáng nang á̱ ku nwuak a̱wat di̱ nfam-a̱byin jhyang huhwa yet Turukya (Turukmen), Suret (A̱suriya), ma̱ng A̱ri̱meniya.

Kyiak neet mi̱ shyiri̱p miliniyon 6 A̱K hu, á̱kpa̱kpai nkyai a̱bwum wu tsi̱tsak a̱ka̱ghyui Tigi̱rit ma̱ng Yufi̱rati̱t na, nang á̱ ngyei Mesopotamya a̱ni, ku byin á̱ghyang mami a̱ca̱cet a̱ka̱keang gbangbang, ntat-a̱ghyi, ma̱ng bibyintyokshan mi̱ Sumet, A̱kat, ma̱ng A̱suriya.