Археаграфічная камісія (Беларусь)
| Археаграфічная камісія | |
|---|---|
| Краіна | Беларусь |
| Адрас | 220002, Рэспубліка Беларусь, г. Мінск, вул. Крапоткіна, 89/1, каб. 44, |
| Тып арганізацыі | археаграфічная камісія[d] |
Археаграфічная камісія — каардынацыйны, навукова-метадычны і публікацыйны цэнтр у галіне археаграфіі, які дзейнічае пры Беларускім навукова-даследчым інстытуце дакументазнаўства і архіўнай справы (БелНДІДАС). Створана 28 кастрычніка 1999 года рашэннем калегіі Дзяржаўнага камітэта па архівах і справаводстве Рэспублікі Беларусь[1].
Гісторыя
[правіць | правіць зыходнік]Археаграфічная камісія аднавіла традыцыі археаграфічнай працы ў Беларусі, закладзеныя ў XIX — пачатку XX стагоддзя Віленскай археаграфічнай камісіяй (1864—1915), Віцебскай вучонай архіўнай камісіяй (1909—1919) і Археаграфічнай камісіяй Інстытута беларускай культуры (1920-я). Археаграфічная дзейнасць перарвалася ў пачатку 1930-х і была адноўленая з канца 1940-х гадоў[1].
У развіццё археаграфіі значны ўклад унеслі гісторыкі і крыніцазнаўцы Мітрафан Доўнар-Запольскі, Дзмітрый Даўгяла, Мікалай Улашчык[1].
Арганізатарам і першым старшынём Археаграфічнай камісіі ў 1999—2001 гадах быў доктар гістарычных навук, прафесар Расціслаў Платонаў (1930—2001)[1].
Статус і дзейнасць
[правіць | правіць зыходнік]Згодна з Палажэннем аб Археаграфічнай камісіі, зацверджаным Дырэктарам Дэпартамента па архівах і справаводстве Міністэрства юстыцыі Рэспублікі Беларусь 13 сакавіка 2014 г., яна з’яўляецца ведамасным каардынацыйным, навукова-метадычным і публікацыйным цэнтрам у галіне археаграфіі[1].
Археаграфічная камісія працуе на грамадскіх пачатках. Базавай арганізацыяй Археаграфічнай камісіі Дэпартамента па архівах і справаводстве Міністэрства юстыцыі Рэспублікі Беларусь з’яўляецца БелНДІДАС, на які ўскладзена арганізацыйнае забеспячэнне яе дзейнасці[1].
Навуковым выданнем Археаграфічнай камісіі і БелНДІДАС з’яўляецца «Беларускі археаграфічны штогоднік», які выдаецца з 2000 г. і ў 2005 г. уключаны ў Пералік навуковых выданняў Рэспублікі Беларусь для апублікавання вынікаў дысертацыйных даследаванняў, зацверджаны Вышэйшай атэстацыйнай камісіяй Рэспублікі[1].
Напрамкі працы
[правіць | правіць зыходнік]- каардынацыя археаграфічнай працы архіўных устаноў Беларусі;
- складанне планаў археаграфічнай работы;
- навуковае рэцэнзаванне зборнікаў дакументаў;
- правядзенне навуковых канферэнцый і круглых сталоў[1].
Структура
[правіць | правіць зыходнік]У склад Камісіі ўваходзяць прадстаўнікі архіваў, ВНУ, музеяў, бібліятэк і навукова-даследчых арганізацый. Пасяджэнні агульнага сходу адбываюцца не радзей як раз на два гады. Выканаўчы орган — Бюро Археаграфічнай камісіі[1].
Кіраўніцтва
[правіць | правіць зыходнік]Станам на жнівень 2025 года ў кіраўніцтва камісіі ўваходзілі[1]:
- Першы намеснік старшыні — Міхаіл Шумейка, кандыдат гістарычных навук, дацэнт.
- Намеснікі старшыні — Рыгор Жалняркевіч; Валерый Пазнякоў, кандыдат гістарычных навук.
- Іншыя члены бюро — Дзмітрый Мацвейчык (Нацыянальны гістарычны архіў Беларусі), Вячаслаў Селемянёў (Нацыянальны архіў Рэспублікі Беларусь), Вячаслаў Насевіч, іншыя.
- Сакратар — Станіслаў Рудовіч, кандыдат гістарычных навук, дацэнт[1].