Перайсці да зместу

Вольга Славаміраўна Бондарава

Дадаць спасылкі
З Вікіпедыі, свабоднай энцыклапедыі
У Вікіпедыі ёсць артыкулы пра іншых людзей з прозвішчам Бондарава.
Вольга Славаміраўна Бондарава
Дата нараджэння 20 кастрычніка 1982(1982-10-20) (42 гады)
Грамадзянства
Партыя

Вольга Славаміраўна Бондарава, па нараджэнні Каранкевіч (руск.: Ольга Славомировна Бондарева; нар. 20 кастрычніка 1982, в. Чарлёнка, Гродзенская вобласць[1]) — прарасійская актывістка ў Беларусі. Вядома напісаннем даносаў на нелаяльных рэжыму Лукашэнкі асоб, вынікам чаго становіцца іх палітычны пераслед[2][3][4][5]. Таксама піша звароты супраць ужывання беларускай мовы ў грамадскай прасторы[6][7], выступае супраць афіцыйнага шанавання беларускіх нацыянальных дзеячаў[8][9][10][11], піша звароты дзеля скасавання беларускіх канцэртаў і мерапрыемстваў[4]. Яе ініцыятывы часта падтрымліваюць чыноўнікі рэжыму на месцах, выконваючы прапановы[⇨].

Набыла папулярнасць праз перапосты яе заяў незалежнымі СМІ, такімі як «Наша ніва»[12], пры гэтым СМІ рэжыму Лукашэнкі амаль не згадваюць яе дзейнасць[13][14].

Біяграфія

[правіць | правіць зыходнік]

Нарадзілася 20 кастрычніка 1982 года ў вёсцы Чарлёнка[1]. Імаверна, выхоўвалася без бацькі, пра гэта гаварылі прысутныя на адным з судовых пасяджэнняў[15].

Большасць часу нідзе афіцыйна не працавала. У 2018 годзе непрацяглы час была на невядомай пасадзе ў штаце кампаніі «Чысты свет плюс». Астатні час Бондарава ў дзяржаўных базах даных, паводле інфармацыі «Кіберпартызан», пазначана як «беспрацоўная»[16].

Прыцягвалася да адміністрацыйнай і крымінальнай адказнасці за кантрабанду цыгарэт у Польшчу[17].

Не пазней за 2021 год уступіла ў Камуністычную партыю Беларусі. На старонках партыйнай газеты «Коммунист Беларуси» Бондараву называлі спецыялістам аддзела гістарычнага аналізу Цэнтра вывучэння перспектыў інтэграцыі ЕАЭС (2021)[18], выканаўцай абавязкаў сакратара па агульных пытаннях Мінскага гаркама КПБ і адказным сакратаром рэдакцыі (2023[19]). У красавіку 2023 года была ўзнагароджана медалём ЦК КПБ[20].

У 2022 годзе паступіла ў Беларускі дзяржаўны педагагічны ўніверсітэт імя Максіма Танка. Вучыцца на бюджэце на дзённым аддзяленні філалагічнага факультэта, спецыяльнасць — «Беларуская мова і літаратура»[21].

У канцы ліпеня 2024 года стала вядома, што Бондарава была выключана з Камуністычнай партыі Беларусі[22].

26 сакавіка 2025 года была затрыманая і асуджана судом Маскоўскага раёна Мінска на 13 сутак адміністрацыйнага арышту[23][24].

Сям’я

[правіць | правіць зыходнік]

Станам на красавік 2023 года разведзена. Мае дачку. Былы муж працаваў дальнабойшчыкам у Германіі[16], таксама падтрымліваў Лукашэнку, праз што меў праблемы з калегамі-беларусамі[2].

Грамадская актыўнасць

[правіць | правіць зыходнік]

Пратэсты 2020 года ў Беларусі

[правіць | правіць зыходнік]

У 2020 годзе ў самы разгар масавых акцый пратэсту Вольга Бондарава разам з былым супрацоўнікам спецслужб Дзмітрыем Беляковым заснавала ініцыятыву «Інфаспецназ Беларусь», якая супрацьстаяла інфармацыі з незалежных каналаў[16].

Праводзіла акцыю «Антывандал», узгодненую з «органамі правапарадку». Сутнасць акцыі, паводле Бондаравай, «у ліквідацыі сімволікі дэструктыўнага зместу, якая нясе антыдзяржаўны сэнс». Бондарава з аднадумцамі зрывала бел-чырвона-белыя стужкі і зафарбоўвала бел-чырвона-белую сімволіку на вуліцах Гродні. Гэта стала прычынай некалькіх канфліктаў з пратэстоўцамі, што вылілася ў шэраг судовых працэсаў. Уступіла ў «Саюз блогераў Беларусі», з якога яе выключылі ў ліпені 2021 года за «парушэнне прафесійнай этыкі»[25].

Пацярпелая ў судах

[правіць | правіць зыходнік]

Вольга праходзіла пацярпелай у справе Васіля Пільца[17], якога абвінавацілі ў хуліганстве і асудзілі на «хімію». 14 снежня 2020 года на вуліцы Агінскага ў Гродне Пілец быццам «схапіў яе за шыю левай рукой, здушваючы, прыцягнуў да сябе, затым заціснуў, здушваючы шыю, паміж плячом і перадплеччам правай рукі, тым самым прычыніў фізічны боль і маральныя пакуты». Паводле Бондаравай, яна адчула пачуццё знявагі, страх за сваё жыццё і здароўе. Васіль Пілец казаў, што выйшаў на шпацыр з сынам і з сабакам. Сабака пацягнула дзіця, тое ўпала на пешаходную дарожку і запэцкалася ў фарбе, якой карысталася Бондарава для замалёўвання надпісаў, што ёй не падабаліся. Пілец зрабіў Бондаравай заўвагу, а тая пачала здымаць яго на мабільны тэлефон[17]. З гэтага пачаўся канфлікт, які скончыўся ў судзе, дзе Бондарава спагнала з Пільца матэрыяльную кампенсацыю маральных пакут — 1000 рублёў. 12 лютага 2021 года суд Кастрычніцкага раёна Гродні прысудзіў Васілю Пільцу год «хатняй хіміі» паводле ч. 1 арт. 339 КК «Хуліганства». Пазней Гродзенскі абласны суд замяніў «хатнюю хімію» на сапраўдную[15].

Паводле таго ж артыкула з удзелам Бондаравай асудзілі на паўтара года калоніі Вадзіма Плаўскага[26]. У мясцовым скверы ён развешваў белыя стужкі, калі да яго падышла Бондарава і пачала здымаць на тэлефон. Адбыўся канфлікт, у выніку якога мужчыну асудзілі. Плаўскі адбываў тэрмін у ПК № 15 і 17 студзеня 2022 года выйшаў на волю.

Вольга Бондарава фігуравала таксама ў справе аб «Штрафе за гноміка[27]» — звярнулася ў міліцыю па факце «пратэстнага дэкору» ў кватэры сваёй былой аднакласніцы.

Актывісцкая дзейнасць пасля заканчэння вулічных пратэстаў

[правіць | правіць зыходнік]

Вольга Бондарава змагаецца супраць беларускасці, у якой бачыць уцісканне рускамоўных у Беларусі. Таксама змагаецца супраць усіх праяў заходняга свету, пры гэтым часта апелюе да «разбэшчвання моладзі».

Змаганне з заходнім уплывам

[правіць | правіць зыходнік]

Праз актыўнасць Бондаравай у Беларусі ў 2022 годзе забаранілі святкаваць Хэлоўін[28].

Паводле яе ініцыятывы ў снежні 2022 — студзені 2023 года ў Гродне скасавалі паказы навагодняга дзіцячага спектакля «Монстры на навагодніх канікулах».

З яе падачы з дзяржаўнага тэлебачання знялі сацыяльную рэкламу супраць гвалту над дзецьмі, якую фундавала амерыканская арганізацыя USAID. Пасля скаргаў Бондаравай Камітэт дзяржаўнага кантролю пачаў правяраць пункты продажу цацкі «Хагі-Вагі», якую яна называла праявай сатанізму. Таксама скардзілася на кандытарскую ўстанову, якая прадавала пірожныя ў форме мужчынскіх і жаночых палавых органаў[16].

Знайшла ў рэкламе бонсцікаў ад «Еўраопта» прапаганду ЛГБТ[29]. Пазней палічыла такой самай прапагандай выяву блогера Дзім Дзімыча ў іншай рэкламе «Еўраопта». У выніку сетка прыбрала рэкламы, якія не спадабаліся Бондаравай[30].

Змаганне супраць беларускасці

[правіць | правіць зыходнік]

Бондарава данесла на выстаўлены ў прасторы «Цэнтр гарадскога жыцця» ў Гродне партрэт беларускага антысавецкага партызана Яўгена Жыхара аўтарства Алеся Пушкіна. Пасля гэтага генеральная пракуратура распачала крымінальную справу за «рэабілітацыю і апраўданне нацызму». Прастору ліквідавалі[31], а мастака Алеся Пушкіна асудзілі[32] на пяць гадоў пазбаўлення волі. У ліпені 2023 года ён памёр у зняволенні[33].

Адна з пачынальнікаў кампаніі супраць скасавання Інструкцыі па транслітарацыі беларускіх назваў літарамі лацінскага алфавіта, створанага на аснове беларускай лацінкі. У далейшым гэту кампанію падтрымалі іншыя прарасійскія дзеячы, такія як Вадзім Гігін, Аляксей Дзермант, Ігар Марзалюк і інш[34]. 24 сакавіка 2023 года Інструкцыя была канчаткова скасавана[35].

Праз яе звароты бібліятэка ў Астраўцы не атрымала імя Адама Мальдзіса, як было запланавана. Бондарава назвала дзеяча «прапольскім калабарантам»[36].

Праз ініцыятыву Бондаравай са школьнай праграмы па літаратуры выключылі творы Артура Вольскага і Уладзіміра Ягоўдзіка.

Дабівалася зносу помніка Ларысе Геніюш у Зэльве на тэрыторыі царквы Святой Жываначальнай Тройцы, пасля чаго яго прыбралі ў невядомае месца.

Імаверна, датычная да знікнення памятнай шыльды ў гонар паўстанцаў 1863—1864 гадоў, у 1990-х гадах усталяванай на сцяне гродзенскага чыгуначнага вакзала[37]. Гродзенскія ўлады пагадзіліся прыбраць са спісу знакавых для горада персон на сайце гарадской бібліятэкі нацыянальных герояў Кастуся Каліноўскага і Тадэвуша Касцюшку.

Канфлікты з рэжымам Лукашэнкі

[правіць | правіць зыходнік]

У ліпені 2023 года заявіла, што кіраўнік упраўлення ўнутраных спраў Гродзенскага аблвыканкама Дзмітрый Разянкоў высунуў супраць яе галаслоўныя абвінавачанні, і запатрабавала прад’явіць ёй афіцыйныя абвінавачанні[38].

«Мне стала вядома пра тое, што вы асмеліліся распаўсюджваць пра мяне не адпаведныя рэчаіснасці звесткі, што нібыта я з’яўляюся „другім Ціханоўскім“, абражаю Ю. Х. Караева і У. С. Караніка, што праз такіх, як я, адбыўся дзяржпераварот», — напісала Бондарава.

Праз тыдзень яна запісала відэа з выбачэннямі за свае словы[39].

«Спрыяе распальванню варожасці і нянавісці», — напісала яна ў заяве ў Генпракуратуру на дэпутата і гісторыка Ігара Марзалюка. Прычынай стаў выступ Марзалюка на тэлеканале СТБ, дзе ён выказаўся за пазітыўную дыскрымінацыю рускай мовы — своеасаблівыя льготы для беларускамоўных.

Канфлікт з Бондаравай мае старшыня гродзенскай абласной арганізацыі «Белая Русь» Святлана Вараніца, якая абуралася, што на экскурсію ў Брэсцкую крэпасць прапагандыстка прыехала з «голай філейнай часткай»[16].

У пачатку 2025 года аб’ектам яе нападак стала Ганна Лукашэнка, нявестка Аляксандра Лукашэнкі, больш вядомая пад творчым псеўданімам Ганна Сялук. Прычынай стала тое, што маладыя беларускія блогеры і артысты, такія як Дзім Дзімыч (Дзмітрый Сіўчык), Улька Пулька (Ульяна Сталярова), Анджыліша (Ангеліна Міхалёва) і Улад Кабякоў, якія былі звязаныя з пралукашэнкаўскім прадзюсарскім цэнтрам «Флагман М’юзік» і якіх Вольга Бондарава вінаваціла ў садаміі і разбэшчванні моладзі, апынуліся пад пратэкцыяй Ганны Сялук. Блогеры ўдзельнічалі перад чарговымі прэзідэнцкімі выбарам у прапагандысцкім «Марафоне адзінства» ў падтрымку Аляксандра Лукашэнкі, працоўнай групай якога кіравала Ганна Сялук. Вольга Бондарава называла яе мянушкай «Сялуха» і адкрыта крытыкавала яе дзейнасць[40]:

" Засунем глыбей галаву ў пясок, а язык у сраку. І дазволім сялусе куратарам прапагандыстаў ЛГБТ разбэшчваць нашых дзяцей… "
" Сілавікам рэспект. Сялусе ганьба "
" Калі думаеш, што дно прабіта, але знізу пастукалі ашуканцы з сялухаўскай «крышай». Фубля! "

Вайна ва Украіне

[правіць | правіць зыходнік]
Знак «Z» — адзін з сімвалаў рашызму і падтрымкі расійскага ўварвання ва Украіну, які шырока выкарыстоўвае Вольга Бондарава і паплечнікі.

З пачаткам поўнамаштабнага расійскага ўварвання ва Украіну Бондарава перайменавала канал з ужываннем лацінскіх літар Z і V, сімваламі падтрымкі расійскай агрэсіі і рашызму, і ён называўся «БондареVа. БеZ купюр». Распаўсюджвала праз канал рэпосты расійскага прапагандысцкага кантэнту[2].

Крыніцы

[правіць | правіць зыходнік]
  1. ↑ а б 41-гадовая даносчыца Бондарава расказала пра свой легальны вопыт працы — агулам два гады за жыццё . Наша Ніва. Праверана 5 лютага 2024.
  2. ↑ а б в Как гродненская контрабандистка стала самой известной доносчицей страны. Рассказываем историю Ольги Бондаревой (руск.). Зеркало (17 студзеня 2023). Праверана 18 жніўня 2023.
  3. ↑ "Да снежня я не ведала пра Бондараву": настаўніцу выгналі з Беларусі праз данос | Навіны Беларусі | euroradio.fm . euroradio.fm (2 лютага 2025). Праверана 12 лютага 2025.
  4. ↑ а б У Мінску адмянілі канцэрт у клубе «Рэактар». Публічны данос на іх рабіла Бондарава . Наша Ніва (30 кастрычніка 2024). Праверана 12 лютага 2025.
  5. ↑ Данос – гэта можа быць нармальна? Псіхолаг распавёў, чаму людзі даносяць . belsat.eu. Праверана 12 лютага 2025.
  6. ↑ Председатель Центризбиркома резко ответил Бондаревой насчет белорусского языка | Новости Беларуси | euroradio.fm (руск.). euroradio.fm (10 студзеня 2025). Праверана 12 лютага 2025.
  7. ↑ Бондарава парадавалася, што перамагла беларускую лацінку. Насамрэч, гэта быў расійскі трансліт . Hrodna.life - навіны Гродна (15 лістапада 2023). Праверана 12 лютага 2025.
  8. ↑ «Дзякуючы высілкам камуністычнай партыі». У Менску прыбралі крыж памяці святара Вінцэнта Гадлеўскага . belsat.eu. Праверана 12 лютага 2025.
  9. ↑ Прарасійская актывістка Вольга Бондарава дамагаецца зносу помніка Ларысе Геніюш у Зэльве . REFORM.news (ранее REFORM.by) (1 сакавіка 2023). Праверана 12 лютага 2025.
  10. ↑ Бондарава атакавала яшчэ аднаго класіка беларускай літаратуры . Наша Ніва (14 лістапада 2023). Праверана 12 лютага 2025.
  11. ↑ Напярэдадні 90-годзьдзя Мальдзіса ўлады прыпынілі рашэньне аб прысваеньні ягонага імя Астравецкай раённай бібліятэцы . Радыё Свабода (2 жніўня 2022). Праверана 12 лютага 2025.
  12. ↑ Google Search. www.google.com. Праверана 12 лютага 2025.
  13. ↑ Google Search. www.google.com. Праверана 12 лютага 2025.
  14. ↑ Google Search. www.google.com. Праверана 12 лютага 2025.
  15. ↑ а б HL. Активистка “ИнфоСпецНаз” Ольга Бондарева взыскала с политзаключенного 1000 рублей за моральные страдания . Hrodna.life (2 ліпеня 2021). Праверана 18 жніўня 2023.
  16. ↑ а б в г д «Галоўная даносчыца Беларусі». Хто такая Вольга Бондарава, якая змагаецца з Геніюш, Марзалюком і «Хагі-Вагі» . Радыё Свабода (28 красавіка 2023). Праверана 18 жніўня 2023.
  17. ↑ а б в "Пацярпелыя выконвалі свой дзяржаўны доўг па зафарбоўванню незарэгістраванай сімволікі". Прысуд Васілю Пільцу . spring96.org (12 лютага 2021). Праверана 18 жніўня 2023.
  18. ↑ Ольга Бондарева Вражеская пропаганда от Геббельса до наших дней // Коммунист Беларуси. — 21 мая 2021. — № 21 (1273). — С. 5.
  19. ↑ Ольга Бондарева Беларусь нуждается в законодательной защите от ЛГБТ-пропаганды // Коммунист Беларуси,. — 4 августа 2021. — 4 августа — № 31 (1387). — С. 4.
  20. ↑ Плавинский Александр. 21 апреля 2023 года в Минске прошел внеочередной XIV (XLVI) Съезд Коммунистической партии Беларуси | ВКонтакте. m.vk.com. Праверана 18 жніўня 2023.
  21. ↑ Пад абцасам: як гарадзенская інфаспецназаўка стала гаспадыняй цэлага рэгіёну. belsat.eu. Праверана 18 жніўня 2023.
  22. ↑ Даносчыцу Бондараву выгналі з Камуністычнай партыі . Наша Ніва (28 ліпеня 2024). Праверана 28 ліпеня 2024.
  23. ↑ Вольгу Бондараву пасадзілі на 13 сутак . Наша Ніва (27 сакавіка 2025). Праверана 28 сакавіка 2025.
  24. ↑ Пророссийскую активистку Бондареву арестовали на 13 суток по административной статье (руск.). Зеркало (28 сакавіка 2025). Праверана 28 сакавіка 2025.
  25. ↑ Право имеют. Telegram. Праверана 18 жніўня 2023.
  26. ↑ Вадзім Плаўскі — Палітычныя вязні ў Беларусі. prisoners.spring96.org. Праверана 18 жніўня 2023.
  27. ↑ Гном са сцяжком правёў адзіночны пікет на падваконніку. Цяпер яго ўладальніка судзяць . Hrodna.life (18 жніўня 2023). Праверана 18 жніўня 2023.
  28. ↑ У Беларусі забаранілі святкаваць Хэлоўін. Плануюць «культурнае імпартазамяшчэнне» (руск.). VK. Праверана 18 жніўня 2023.
  29. ↑ vasia11. Бондарава хоча сцерці памяць пра Каліноўскі і Касцюшку і ваюе з «Еўраоптам» . Hrodna.life (24 ліпеня 2023). Праверана 18 жніўня 2023.
  30. ↑ antonio. Бондарава дамаглася, каб “Еўраопт” змяніў сваю рэкламу. Але на гэтым яна не спыняецца (абноўлена) . Hrodna.life (26 ліпеня 2023). Праверана 18 жніўня 2023.
  31. ↑ К, А.. У Гродне пачаўся суд над установай "Цэнтр гарадскога жыцця". Яе хочуць ліквідаваць . Hrodna.life (20 красавіка 2021). Праверана 18 жніўня 2023.
  32. ↑ Художника Алеся Пушкина приговорили к 5 годам лишения свободы. belsat.eu. Праверана 18 жніўня 2023.
  33. ↑ В Беларуси умер художник и политзаключенный Алесь Пушкин – DW – 11.07.2023 (руск.). dw.com. Праверана 18 жніўня 2023.
  34. ↑ Чым яшчэ займаецца Рэспубліканскі савет па гістарычнай палітыцы, які прыняў рашэнне адмовіцца ад лацінкі ў транслітарацыі геаграфічных назваў?. reform.by (9 студзеня 2023).
  35. ↑ Лукашысты пазбавіліся беларускай лацінкі ў транслітарацыі геаграфічных назваў. nashaniva.com (4 красавіка 2023).
  36. ↑ Boradyn, Władysław. Бібліятэка ў Астраўцы ня будзе насіць імя Адама Мальдзіса. Яго назвалi «прапольскiм калабарантам» . Wb24.org - Wirtualna Białoruś (2 жніўня 2022). Праверана 18 жніўня 2023.
  37. ↑ У Гродне знік памятны знак паўстанцам 1863 года - Беларуская Служба - polskieradio.pl(нявызн.). polskieradio.pl. Праверана 18 жніўня 2023.
  38. ↑ antonio. Бондарава ўступіла ў канфлікт з галоўным міліцыянтам Гродзеншчыны: кажа, што адчувае “іспанскі сорам” за сілавікоў . Hrodna.life (16 чэрвеня 2023). Праверана 18 жніўня 2023.
  39. ↑ vasia11. Бондарава запісала "пакаяннае" відэа з самой сабой. Навошта? . Hrodna.life (21 чэрвеня 2023). Праверана 18 жніўня 2023.
  40. ↑ «Сілавікам рэспект. Сялусе ганьба». Бондарава прыдумала мянушку для нявесткі Лукашэнкі . Наша Ніва (1 сакавіка 2025). Праверана 28 сакавіка 2025.
Узята з "https://be.wikipedia.org/w/index.php?title=Вольга_Славаміраўна_Бондарава&oldid=4969280"