Ганна Віктараўна Навасельцава

Ганна Віктараўна Навасельцава
Дата нараджэння	11 мая 1983(1983-05-11) (42 гады)
Месца нараджэння	Віцебск, Віцебская вобласць, Беларуская ССР, СССР
Грамадзянства	Беларусь
Род дзейнасці	пісьменніца, літаратуразнаўца
Месца працы	Віцебскі дзяржаўны ўніверсітэт імя П. М. Машэрава
Навуковая ступень	кандыдат філалагічных навук
Навуковае званне	дацэнт
Альма-матар	Віцебскі дзяржаўны ўніверсітэт імя П. М. Машэрава (2006) БДУ
Прэміі	літаратурная прэмія імя Уладзіміра Караткевіча

Ганна Віктараўна Навасельцава (нар. 11 мая 1983, Віцебск) — беларуская літаратуразнаўца, пісьменніца. Кандыдат філалагічных навук (2013), дацэнт (2016).

Біярафія

Нарадзілася ў 1983 годзе ў Віцебску. Скончыла Віцебскі дзяржаўны ўніверсітэт імя П. М. Машэрава (2006), аспірантуру пры ім (2009), Беларускі дзяржаўны ўніверсітэт (2012), дактарантуру пры Інстытуце літаратуразнаўства імя Янкі Купалы Цэнтра даследаванняў беларускай культуры, мовы і літаратуры НАН Беларусі (2021).

З 2009 года — выкладчык кафедры беларускай літаратуры ВДУ імя П. М. Машэрава, з 2015 года — дацэнт кафедры літаратуры, з 2023 года — дацэнт кафедры беларускай і рускай філалогіі.

Сфера навуковых інтарэсаў: жанр рамана ў беларускай літаратуры другой паловы XX — пачатку XXІ стагоддзя. На прыкладах значнага корпуса мастацкіх тэкстаў, раман разглядаецца ёй як адкрытая змястоўная форма асэнсавання рэчаіснасці, дзе асноўным прадметам аўтарскага творчага паказу выступае асоба ў яе канфліктных узаемаадносінах з грамадска-сацыяльнымі абставінамі.

Творчасць

У 2018 годзе выйшла кніга «Калі цябе спаткае казка…». Яна складаецца з шэрагу аўтарскіх казак і казачных апавяданняў, дзе ўвасоблена мастацкая рэканструкцыя матываў і вобразаў з беларускага і сусветнага фальклору. Галоўнымі героямі выступаюць вядомыя чарадзейныя персанажы, міфалагічныя істоты, якія праходзяць дзівосныя выпрабаванні, спазнаюць сябе і вучацца разумець іншых.

Прэміі і ўзнагароды

• Літаратурная прэмія імя Уладзіміра Караткевіча ў намінацыі «проза» (2020).

Выбраная бібліяграфія

• Калі цябе спаткае казка…: Зборнік сучасных казачных гісторый / Г. В. Навасельцава. — Мінск: А. М. Янушкевіч, 2018. — 166 с. ISBN 978-985-7165-73-5
• Жанр рамана ў беларускай літаратуры другой паловы XX — пачатку XXI стагоддзя: манаграфія / Г. В. Навасельцава. — Віцебск: ВДУ імя П. М. Машэрава, 2020. — 268 с. ISBN 978-985-517-763-1
• Эстэтычнае спасціжэнне літаратурнай і навуковай дзейнасці ў беларускім рамане канца XX стагоддзя / Г. Навасельцава // Беларуская думка. № 10, 2023. — С. 98—104.

Спасылкі

• researchgate.net