Домачай
Каардынаты: 53°54′11″ пн. ш. 30°18′2″ у. д. / 53.90306° пн. ш. 30.30056° у. д.
| «Домачай» | |
 | |
| Тып | адкрытае акцыйнае таварыства |
|---|---|
| Дэвіз | Зроблена зь цеплынёй |
| Заснаваная | 29 чэрвеня 1927 (98 гадоў таму) |
| Заснавальнікі | Народны камісарыят харчовай прамысловасьці Беларускай ССР |
| Уласьнікі | Магілёўскі аблвыканкам |
| Краіна | Беларусь |
| Разьмяшчэньне | Магілёў |
| Адрас | Ленінскі раён, вуліца Касманаўтаў, дом 39а[1] |
| Ключавыя фігуры | Вольга Цімафеенка (гендырэктарка), Андрэй Курцікаў (галоўны інжынэр) |
| Галіна | харчовая прамысловасьць |
| Прадукцыя | хлеб, булка, каравай, торт, пірожнае, печыва, сухар, сушка, пернік |
| Абарачэньне | ▲83,2 млн рублёў (2024 год[2]; 23,9 млн $)[3] |
| Апэрацыйны прыбытак | ▼102 тыс. рублёў (2024 год; 29,3 тыс. $) |
| Чысты прыбытак | ▲80 тыс. рублёў (2024 год; 23 тыс. $) |
| Лік супрацоўнікаў | 1500 (2025 год) |
| Матчына кампанія | Магілёўскі аблвыканкам |
| Даччыныя кампаніі | Бабруйскі хлебазавод, Горацкі хлебазавод, Крычаўскі хлебазавод[4] |
| Аўдытар | «Белрасаўдыт» |
«Домачай» — дзяржаўнае булачна-кандытарскае прадпрыемства Беларусі, заснаванае ў 1927 годзе ў якасьці «Магілёўскага хлебакамбінату».
На 2025 год быў адным зь вядучых у Беларусі і найбольшым у Магілёўскай вобласьці вытворцам хлебабулачных і кандытарскіх вырабаў. Улучаў 3 хлебазаводы ў Магілёве, а таксаа ў Быхаве, Касьцюковічах і Мсьціславе. Асобныя падразьдзяленьні працавалі ў Бабруйску, Горках і Крычаве. Вырабляў хлеб, булкі, караваі і пірагі, а таксама такія ласункі, як пернікі, аўсянае печыва, слодычы, тарты, пірожныя і крэкеры. Сярод іншага, выпускаў функцыянальную ежу, у тым ліку сухія сьняданкі ў выглядзе кукурузных палачак і сухары. Урэшце, вырабляў пітную ваду, квас, безалькагольныя напоі, слоеныя мучныя вырабы, солад, «Домачаеўскі» напой з вузкалістага скрыпню і фэрмэнтаваныя пшанічныя вырабы[5].
Фірмовыя крамы і падарожніцтва
[рэдагаваць | рэдагаваць крыніцу]На 2025 год «Домачай» меў 19 уласных гандлёвых кропак, зь іх 11 у Магілёве:
- 3 фірмовыя крамы — 2 у Магілёве, у тым ліку краму зьніжак, і адну ў Менску па праспэкце Незалежнасьці ў «Першым нацыянальным гандлёвым доме» каля станцыі мэтро «Ўсход»;
- 13 гандлёвых павільёнаў — 8 у Магілёве, у тым ліку на Менскім рынку і аўтавакзале, 4 у Мсьціславе і адзін у Прапойску;
- 3 аўталаўкі — у Магілёве пры Палацы гімнастыкі, Чавусах і Шклове[6].
На вытворчасьцях «Домачаю» ладзілі гастранамічна-прамысловае падарожніцтва для школьнікаў у суправаджэньні дарослых і студэнтаў. Экскурсіі працягласьцю 40—50 хвілінаў ладзілі з аўторка да пятніцы ад 9:00 да 10:30. Пры гэтым наведваньне вытворчага цэху з азнаямленьем з вытворчасьцю хлебабулачных вырабаў і каштаваньнем выпечкі займала 20—25 хвілінаў. Прымаліся экскурсійныя групы ад 10 чалавек. Акрамя знаёмства з гісторыяй хлебапячэньня і прадпрыемства, экскурсанты атрымлівалі наборы сьвежай выпечкі. Цана экскурсіі складала 25 рублёў (8,5 даляры) з чалавека[7]. У 2025 годзе вытворчасьці прадпрыемства наведвалі да 1000 прамысловых падарожнікаў[8].
Сярод іншага, «Домачаю» належаў выхаваўча-аздараўленчы летнік «Зара» на беразе вадасховішча Рудзея ў Чавускім раёне (Гарбавічы). Летнік меў 2 спальныя карпусы на 215 дзяцей з душавымі пакоямі на кожным паверсе. Сталовая прапаноўвала 5-разовае харчаваньне. Летнік працаваў у 5 зьменаў па 15 дзён. Даезд ажыцьцяўляўся дызэль-цягніком па лініі Беларускай чыгункі «Магілёў — Крычаў» да станцыі «Раста» і аўтобусам ад Магілёўскага аўтавакзала ў бок Чавусаў да прыпынку «Раста»[9].
Вырабы
[рэдагаваць | рэдагаваць крыніцу]На 2025 год «Домачай» вырабляў:
- 24 найменьні подавага хлеба вагой ад 250 грамаў да 2,2 кг, у тым ліку бездражджавы і бяз цукру, цалкам жытні і пшанічны[10];
- 16 найменьняў формавага хлеба вагой ад 300 да 900 грамаў, у тым ліку з вотруб’ем і бездражджавы, цалкам жытні і пшанічны[11];
- 22 найменьні булачных вырабаў вагой ад 75 да 500 грамаў, сярод якіх былі багеты, батоны, пірагі, ражкі, сайкі і хлябцы, у тым ліку з вотруб’ем і бяз цукру[12];
- 5 найменьняў караваяў вагой ад аднаго кіляграму[13];
- 14 найменьняў тартоў, у тым ліку бананавы, кіеўскі, чайны, шакалядны і шпінатны[14];
- 10 найменьняў пірожных, у тым ліку бульбачку, кошык, трубачку з крэмам, бісквітнае і «Напалеон»[15];
- 30 найменьняў печыва, у тым ліку імбірнае, з вотруб’ем, кураб’е, шчарбет, кекс, каўрыжку, аўсянае і сочнік[16];
- 9 найменьняў сухароў і 5 найменьняў сушак[17];
- 17 найменьняў пернікаў, у тым ліку шакалядныя, імбірныя, какосавыя і малочныя[18];
- 25 найменьняў заедак, у тым ліку італьянскія абаранкі таралі, хлебныя палачкі грысіні і сухарыкі красьціні[19];
- 5 найменьняў кукурузных і рысавых палачак[20];
- фэрмэнтаваны вузкалісты скрыпень, жытні солад, панірованыя сухары, квас «Амсьціслаўская смаката», газаваную ваду і пітную ваду[21].
Мінуўшчына
[рэдагаваць | рэдагаваць крыніцу]29 чэрвеня 1927 году Народны камісарыят харчовай прамысловасьці Беларускай ССР ухваліў Пастанову № 391 аб утварэньні «Магілёўскага хлебакамбінату». У 1930 годзе прадпрыемства перайшло ў падпарадкаваньне Беларускага дзяржаўнага трэсту хлебапякарнай прамысловасьці (Белхлебтрэсту). У 1932 годзе ўвялі ў дзеяньне Магілёўскі хлебазавод № 1 па Быхаўскай вуліцы, дом 159. У 1939 годзе мэханізаваную пякарню перабудавалі ў Маглёўскі хлебазавод № 2 па Першамайскай вуліцы, дом 135. У 1940 годзе «Магілёўскі хлебакамбінат» перадалі Магілёўскаму абласному трэсту хлебапячэньня (Беларуская ССР)[22].
У ліпені 1944 году хлебакамбінат аднавіў працу ў падпарадкаваньні Магілёўскага аблтрэсту «Белгалоўхлебу». 31 сьнежня 1947 годзе ўрадавая камісія выдала заключэньне аб сканчэньні адновы хлебазаводу № 2. У сьнежні 1950 году «Магілёўскі хлебакамбінат» перайшоў у падпарадкаваньне «Белгалоўхлебтрэсту» Міністэрства харчовай прамысловасьці Беларускай ССР. У 1964 годзе здалі ў карыстаньне Магілёўскі хлебазавод № 3. 10 лістапада 1965 году Ўправа побытавага абслугоўваньня і мясцовай прамысловасьці Магілёўскага прамысловага аблвыканкаму ўхваліла Загад № 831, якім падпарадкавала сабе хлебакамбінат. 19 жніўня 1966 году Магілёўскі аблвыканкам ухваліў Рашэньне № 508, якім падпарадкаваў хлебакамбінат Управе харчовай прамысловасьці[22].
19 жніўня 1971 году Ўправа харчовай прамысловасьці Магілёўскага аблвыканкаму выдала Загад № 68, якім перайменавала прадпрыемства ў «Магілёўскі хлеба-кандытарскі камбінат». У той самы дзень Загадам па камбінаце яго пераўтварылі ў кандытарска-харчовы цэх. 10 красавіка 1972 году Міністэрства харчовай прамысловасьці Беларускай ССР выдала Загад № 75, паводле якога прадпрыемства перадалі Магілёўскаму абласному вытворчаму аб’яднаньню хлебапякарнай прамысловасьці («Магілёўхлебпрам»). 1 красавіка 1976 году Мінхарчпрам БССР выдаў Загад № 311 «Аб удасканаленьні кіраваньня харчовай прамысловасьцю БССР». Паводле гэтага Загаду прадпрыемства перайменавалі ў «Магілёўскі хлебазавод» без праўнай самастойнасьці. 6 сьнежня 1985 году «Магілёўхлебпрам» падпарадкавалі Міністэрству хлебапрадуктаў Беларускай ССР[22].
18 чэрвеня 2001 году «Магілёўхлебпрам» пераўтварылі ва ўнітарнае прадпрыемства. 27 студзеня 2014 году прадпрыемства пераўтварылі ў адкрытае акцыйнае таварыства «Домачай»[22]. У красавіку 2014 году на Горацкім хлебазаводзе «Домачаю» запусьцілі вытворчасьць вафляў «Магілёўскі пачастунак» па 700 кг за зьмену[23]. 4 красавіка 2022 году на Горацкім хлебазаводзе асвоілі вытворчасьць пшанічнага соладу, распрацоўку якой вёў Беларускі дзяржаўны ўнівэрсытэт харчовых і хімічных тэхналёгіяў у Магілёве. На 2022 год «Домачай» меў 3 заводы ў Магілёве і 7 падразьдзяленьняў у раёнах Магілёўскай вобласьці. На прадпрыемстве працавала каля 2000 чалавек[24].
8 жніўня 2023 году на Мсьціслаўскім хлебазаводзе пачалі разьліў «Амсьціслаўскай» пітной вады[25]. За 2023 год «Домачай» выпусьціў каля 16 000 т хлебабулачных вырабаў. За содні выпускалі да 45 т вырабаў[26]. У 2024 годзе «Домачай» пачаў пастаўкі замарожаных вырабаў у Расею, Нямеччыну і ЗША[27]. У 2025 годзе за мяжу пастаўлялі звыш 100 т выпечкі штомесяц. На прадпрыемстве працавала каля 1500 чалавек[28].
Крыніцы
[рэдагаваць | рэдагаваць крыніцу]- ^ Зьвесткі для сувязі (рас.) // ААТ «Булачна-кандытарская кампанія «Домачай», 2025 г. Праверана 13 ліпеня 2025 г.
- ^ Справаздача аб прыбытках і стратах па стане на 31.12.2024 (рас.) // ААТ «Булачна-кандытарская кампанія «Домачай», 14 красавіка 2025 г. Праверана 13 ліпеня 2025 г.
- ^ Афіцыйныя курсы беларускага рубля ў адносінах да замежных валют, якія ўстанаўліваюцца штодзённа, на 31.12.2024 (3,4735 рублі за даляр) // Нацыянальны банк Беларусі, 31 сьнежня 2024 г. Праверана 13 ліпеня 2025 г.
- ^ Нашыя філіі (рас.) // ААТ «Булачна-кандытарская кампанія «Домачай», 2025 г. Праверана 13 ліпеня 2025 г.
- ^ Пра нас (рас.) // ААТ «Булачна-кандытарская кампанія «Домачай», 2025 г. Праверана 13 ліпеня 2025 г.
- ^ Фірмовыя крамы (рас.) // ААТ «Булачна-кандытарская кампанія «Домачай», 2025 г. Праверана 13 ліпеня 2025 г.
- ^ Экскурсіі (рас.) // ААТ «Булачна-кандытарская кампанія «Домачай», 2025 г. Праверана 13 ліпеня 2025 г.
- ^ Больш за 920 тыс. чалавек прынялі ўдзел у Беларусі ў мерапрыемствах месяца прамысловага турызму // Беларускае тэлеграфнае агенцтва, 7 красавіка 2025 г. Праверана 13 ліпеня 2025 г.
- ^ Выхаваўча-аздараўленчы летнік «Зара» (рас.) // ААТ «Булачна-кандытарская кампанія «Домачай», 2025 г. Праверана 13 ліпеня 2025 г.
- ^ Подавыя хлябы (рас.) // ААТ «Булачна-кандытарская кампанія «Домачай», 2025 г. Праверана 13 ліпеня 2025 г.
- ^ Формавыя хлябы (рас.) // ААТ «Булачна-кандытарская кампанія «Домачай», 2025 г. Праверана 13 ліпеня 2025 г.
- ^ Булачныя вырабы (рас.) // ААТ «Булачна-кандытарская кампанія «Домачай», 2025 г. Праверана 13 ліпеня 2025 г.
- ^ Караваі (рас.) // ААТ «Булачна-кандытарская кампанія «Домачай», 2025 г. Праверана 13 ліпеня 2025 г.
- ^ Тарты (рас.) // ААТ «Булачна-кандытарская кампанія «Домачай», 2025 г. Праверана 13 ліпеня 2025 г.
- ^ Пірожныя (рас.) // ААТ «Булачна-кандытарская кампанія «Домачай», 2025 г. Праверана 13 ліпеня 2025 г.
- ^ Печыва. Слодычы мучныя (рас.) // ААТ «Булачна-кандытарская кампанія «Домачай», 2025 г. Праверана 13 ліпеня 2025 г.
- ^ Сухары і сушкі (рас.) // ААТ «Булачна-кандытарская кампанія «Домачай», 2025 г. Праверана 13 ліпеня 2025 г.
- ^ Пернікі (рас.) // ААТ «Булачна-кандытарская кампанія «Домачай», 2025 г. Праверана 13 ліпеня 2025 г.
- ^ Заедкавыя вырабы (рас.) // ААТ «Булачна-кандытарская кампанія «Домачай», 2025 г. Праверана 13 ліпеня 2025 г.
- ^ Кукурузныя палачкі (рас.) // ААТ «Булачна-кандытарская кампанія «Домачай», 2025 г. Праверана 13 ліпеня 2025 г.
- ^ Іншыя вырбы (рас.) // ААТ «Булачна-кандытарская кампанія «Домачай», 2025 г. Праверана 13 ліпеня 2025 г.
- ^ а б в г Нашая гісторыя (рас.) // ААТ «Булачна-кандытарская кампанія «Домачай», 2025 г. Праверана 13 ліпеня 2025 г.
- ^ Натальля Кавалёва. «Магілёўскі пачастунак» // Газэта «Голас Касьцюкоўшчыны», 9 красавіка 2014 г. Праверана 13 ліпеня 2025 г.
- ^ БелТА. Магілёўская кампанія «Домачай» асвоіла вытворчасьць пшанічнага соладу // Магілёўскі абласны выканаўчы камітэт, 4 красавіка 2022 г. Праверана 13 ліпеня 2025 г.
- ^ Амсьціслаўская газэта «Сьвятло кастрычніка». У мсьціслаўскім «Домачаі» пачалі выпускаць мясцовую пітную ваду // «Магілёў Мэдыя», 8 жніўня 2023 г. Праверана 13 ліпеня 2025 г.
- ^ Тэлеканал «Магілёў». Новую прадукцыю выпусьціла булачна-кандытарская кампанія «Домачай» // Магілёўскі абласны выканаўчы камітэт, 12 студзеня 2024 г. Архіўная копія ад 11 студзеня 2024 г. Праверана 13 ліпеня 2025 г.
- ^ Магілёўскі хлеб – у Амэрыку і Германію – «Свая зямля» // Першы нацыянальны канал Беларускага радыё, 23 сьнежня 2024 г. Праверана 13 ліпеня 2025 г.
- ^ Аляксандра Анцэлевіч. Як беларускі хлеб застаецца смачным і карысным // Газэта «Зьвязда», 30 траўня 2025 г. Праверана 13 ліпеня 2025 г.
Вонкавыя спасылкі
[рэдагаваць | рэдагаваць крыніцу]- Замовіць вырабы (рас.) // ААТ «Булачна-кандытарская кампанія «Домачай», 2025 г. Праверана 13 ліпеня 2025 г.
- Напісаць нам і навіны (рас.)
- Булачна-кандытарская кампанія «Домачай» // Беларускі экскурсійны партал, 2025 г. Праверана 13 ліпеня 2025 г.
 |
Гэта — накід артыкула пра Беларусь. Вы можаце дапамагчы Вікіпэдыі, пашырыўшы яго. |