理性主義

18 世紀法國哲學家笛卡兒嘅油畫畫像

理性主義（粵音：lei5 sing3 zyu2 ji6；參見英文：rationalism）係一種哲學觀點主義，屬於知識論。根據理性主義嘅睇法，知識主要係由理智同理性而嚟嘅。呢種思想嘅代表人物有法國哲學家笛卡兒呀噉。

基本定位

睇埋：知識論

笛卡兒："Cogito ergo sum."（拉丁文，我思故我在）

根據二十世紀前嘅西方哲學思想，人嘅體驗可以嚟自兩大來源：

1. 外：感官，即係包括視覺、聽覺、味覺、嗅覺同埋觸覺嘅感覺，畀人能夠感受周圍嘅世界；
2. 內：心靈內部嘅思緒；

知識論上有兩種重要嘅觀點：經驗主義提倡，知識主要（甚至完全）係嚟自 1 嘅；呢種觀點成日會攞嚟同理性主義對比，理性主義個基本諗頭係主張，知識主要（甚至完全）係嚟自 2 嘅。

形式科學

睇埋：形式科學、證明同數學證明

有關理性主義嘅體現可以睇吓諸如數學同邏輯等嘅形式科學，點樣純靠理性思考嚟求知。

數學中嘅證明做法就係噉。舉例說明，依家要思考

「假設 $n\in \mathbb {Z}$（$\mathbb {Z} =$ 整數）係一個單數，噉 $n^{2}$ 唔會係一個雙數。」

呢句命題，可以用反證法證明。條思路如下：

假設 $n\in \mathbb {Z}$ 係一個單數，再假設 $n^{2}$ 係一個雙數。

即係對應某啲自然數 $k\in \mathbb {Z}$，$n=2k+1$（單數嘅定義）。計吓

${\begin{aligned}n^{2}&=(2k+1)^{2}\\&=4k^{2}+2k+1\\\end{aligned}}$

好明顯得出個結果係 $n^{2}$ 唔係一個雙數，條假設自相矛盾－「如果 $n\in \mathbb {Z}$ 係一個單數，$n^{2}$ 可以係一個雙數」呢句嘢會引致矛盾，所以假設 $n\in \mathbb {Z}$ 係一個單數，噉 $n^{2}$ 唔會係一個雙數。

好似數學證明噉嘅過程，原則上可以完全淨係靠個腦（理性）嚟做。相對嚟講，研究者亦可以唔用噉嘅證明方法，而係將啲數遂個遂個攞嚟睇（好似經驗主義噉）睇吓有冇可能出現「有個單數 m，m 係一個雙數」噉嘅情境，但數有無限個咁多，無論佢攞幾多個數嚟做呢樣嘢，佢都「證明」唔到啲乜。因為噉，啲人認為經驗主義响呢度冇用，要用好似理性主義嘅方法，靠演繹推理先可以得到知識。

睇埋

• 經驗主義
• 先天知識
• Tabula rasa
• 思想實驗

拎

• （英文） 理性主義 vs. 經驗主義，史丹福哲學百科全書