研究問題

研究問題（參見英文：research question / RQ）係研究嘅起點。簡單講，研究問題就係一條條明確、具針對性、值得解答嘅問題，旨在引導成個研究過程。學者、科學家等嘅人做親咩研究，都實要搞清楚自己條研究問題係乜先，亦要喺研究計劃書嗰度向人講明自己嘅研究問題。

研究問題之所以咁重要，係因為佢哋會影響研究設計、數據收集方法、數據分析策略，甚至連結論都會受制於當初問咩問題。研究問題清晰，後續分析就會聚焦，成果就會有說服力。相反，如果研究問題含糊得滯，或者本身問得唔切題，就算技術做得幾好，出嚟嘅結論都可能唔夠說服力。

例子

唔同學科有唔同形式嘅研究問題。例如

• 喺經濟學入面，研究問題可以係：「最低工資提升會唔會令青年嘅失業率上升？」呢條問題有因果關係、有政策上嘅意義，亦可以透過數據分析回答。
• 喺地理學，問題可能係：「過去十年嘅城市擴張對綠化地帶有咩影響？」研究者可以用空間數據去分析土地嘅變化。
• 喺生態學，問題可能係：「引入外來物種會唔會降低本地物種嘅多樣性？」

呢啲都係具體、可研究、對社會或科學嚟講有價值嘅問題。

計劃

寫研究計劃書嗰時，做研究嘅人要講清楚自己想探究乜嘢研究問題。類似噉：

例子：

本研究旨在探討社會階層對大學生學習動機嘅影響。雖然過往已有研究指出，家庭背景會影響學生喺教育制度中嘅表現，但針對本地高等教育環境中，社會階層點樣影響學習動機，仍然缺乏系統性分析。現時學界對「學習動機」嘅研究多集中喺心理因素層面，例如自我效能感、成就目標取向等，但對社會結構因素例如家庭收入、家長學歷、社會資本等點樣影響學生嘅內在學習動機，了解仍然有限。

因此，本研究提出以下研究問題：在港嘅大學生當中，社會階層因素（例如家庭收入、父母教育程度）會唔會顯著影響學生嘅學習動機？如果會，影響具體體現喺邊啲層面？呢個研究問題唔單止有助我哋理解學習動機背後嘅社會條件，亦可以為教育政策制定提供實證參考。

噉嘅研究，可見於教育學或者社會學等嘅領域。

假說

睇埋：假說同假說檢定

研究問題通常會同假說（參照英文：hypothesis）一齊出現，但兩者並唔一樣。研究問題係「想問啲乜」而假說就係針對研究問題作出嘅預測或者初步答案。例如若果研究問題係

「氣候變化會唔會影響候鳥嘅遷徙時間？」

噉假說就可能會係

「氣候變暖會令候鳥提早遷徙。」

研究過程入面，研究者會檢驗假說係咪同證據相符，從而回應當初嘅問題。

又例如

• 喺心理學研究，研究問題可以係：「性格特質會唔會影響一個人嘅主觀幸福感？」

  對應嘅假說可能係：「外向度高嘅人傾向報稱較高嘅幸福感。」研究者可以用標準化人格問卷同幸福感評估量表嚟進行量化分析。

• 喺公共衛生，研究問題可以係：「空氣污染程度同兒童呼吸系統疾病之間有冇關係？」

  對應嘅假說可能係：「住喺空氣污染度較高地區嘅兒童，呼吸系統疾病發病率較高。」呢個假說可以透過環境數據配合健康相關嘅統計資料去檢驗。

再睇

• 研究
• 論證
• 學術寫作
• 實驗設計