蓋勒·葛林戴華德

蓋勒·葛林戴華德 （Gellert Grindelwald）
《哈利波特》嘅角色
尊尼·特普用葛林戴華德嘅造型喺聖地牙哥動漫展嗰度出現。
首次出場	哈利波特：神秘的魔法石（淨係提過） 哈利波特：死神的聖物1（正式登場）
尾次出場	怪獸與鄧不利多的秘密
下落	畀佛地魔殺死咗
作者	J·K·羅琳
扮演	青年：占美·金寶·鮑華（７上、前傳） 中年：尊尼·特普（怪獸１、怪獸２） 　　　 麥斯·米基辛（怪獸３） 老年：米高·伯恩（７上）
配音	唔清楚（粵語配音）
詳細信息
性別	男性
親戚	魔法史學家芭蒂達·巴沙特Bathilda Bagshot（姑婆）
國籍	英國

蓋勒·葛林戴華德（英文：Gellert Grindelwald，約1883年-1998年3月）係英國作家J·K·羅琳嘅《哈利波特系列》裡面嘅一個虛構角色。佢個名第１次出現係喺第１集小說裡面，主角哈利·波特第１次得到阿不思·鄧不利多嘅朱古力蛙巫師卡，卡片背面記載嘅事蹟就係「喺1945年打敗黑巫師葛林戴華德」。不過小說嘅之後第２-６輯都無再提過佢。直到喺電影《哈利波特：死神的聖物1》入面，佛地魔曾經向葛林戴華德問過接骨木魔杖嘅下落。

喺小說同戲入面，根據麗塔·史譏喺鄧不利多過咗身之後推出嘅相關未經授權嘅傳記—《阿不思·鄧不利多的人生與謊言The Life and Lies of Albus Dumbledore》入面提到，葛林戴華德喺超強嘅黑巫師佛地魔崛起之前係「史上最勁黑巫師名單」嘅榜首。

葛林戴華德曾經喺德姆蘭學院讀書，但後尾因為做咗太過危險而邪惡嘅黑魔法實驗而畀人踢出校。１６歲嘅佢後嚟去到高錐客洞探佢嘅姑婆—芭蒂達·巴沙特Bathilda Bagshot，仲成個夏天都同佢一齊，佢因為咁而識咗後生嗰陣嘅阿不思·鄧不利多，呢兩個有天份同才華嘅巫師眨吓眼就做咗老友。葛林戴華德同鄧不利多計劃利用死神聖物嘅力量嚟領導巫師世界嘅革命，同埋去推翻《國際保密法》，去建立一個由智慧同強大嘅男女巫師領導嘅新全球秩序。葛林戴華德後來捲入咗同阿不思仲有阿波佛嘅三方對決入面，最後搞到鄧不利多兩兄弟嘅細妹—阿蕊安娜Ariana死咗之後，佢哋兩個人嘅關係就咁完咗仲各行各路。葛林戴華德離開咗英國之後，佢喺出名嘅魔杖製造師葛果羅威Gregorovitch嗰度偷咗被譽為魔法力量最強嘅接骨木魔杖，仲開始自己一個去完成曾經同鄧不利多一齊起計劃嘅嗰場革命。

葛林戴華德係個複雜嘅人物，佢有天賦才華，同時亦都非常之理想主義，佢會不惜一切嘅代價去實現自己嘅目標。佢走法律罅去實現佢嘅改革，仲同佢啲追隨者一齊犯咗成呎厚咁多嘅罪，包括幾單謀殺案。佢嘅暴行肆虐美國去到歐洲，最後仲喺歐洲大陸中部起咗一座堡壘（紐蒙迦德監獄）嚟做佢權力嘅基礎。1945年，已經喺權力頂峰嘅葛林戴華德由於佢對巫師世界為禍得太犀利，搞到鄧不利多冇得唔站出嚟同佢做一場終極決鬥最後仲將佢打低咗。葛林戴華德跟住就將自己韞住喺佢自己起嘅堡壘（紐蒙迦德）入面。佛地魔喺幾廿年後嘅1998年去到紐蒙迦德嚟搵接骨木魔杖嘅下落嗰陣時，葛林戴華德因為唔肯畀消息佛地魔，結果畀對方殺死咗。

葛林戴華德嘅名喺《哈利波特》系列裡面第１次出現喺第１輯小說入面，呢個角色喺戲裡面直到《哈利波特：死神的聖物1》先至再次畀人提到，喺入面佢就做咗鄧不利多背景故事嘅重要部分。

人物性格同特徵

名嘅來源

• 蓋勒·葛林戴華德Gellert Grindelwald個名裡面嘅蓋勒Gellert係源於匈牙利語「Gerard」，後者源自日耳曼語嘅矛ger同埋勇敢/頑強hard。聖蓋勒St. Gellert係個响意大利出世，仲喺匈牙利做傳教士同殉道者。
  • 「Grindel」喺古德語入面嘅意思係閃電，喺拼寫上面亦都同傳說中畀貝奧武夫打低嘅妖怪格倫戴爾好似；「Wald」喺德語入面係「森林」嘅意思；而葛林戴華德Grindelwald亦都係個喺瑞士嘅滑雪勝地嘅名。「Grind」喺德語入面亦可以指係「grinsen」，即係咧嘴或燦爛嘅笑容。單詞「grindel」或「grendel」出現喺包括英語在內嘅好多日耳曼語系嘅早期語言入面。
  • 「Grindill」喺古斯堪嘅納維亞語入面嚟自「風暴」，亦都可以指「咆哮」，又或者發出好響同令人恐懼嘅吶喊聲。
  • 「Grendel」喺丹麥傳說入面係一隻得人驚同殺人嘅人形怪物。佢後來畀斯堪嘅納維亞英雄貝奧武夫打低咗，呢個事跡亦都喺同名嘅中世紀故事入面被記錄咗落嚟。

• 蓋勒特山係一座喺匈牙利布達佩斯，仲俯瞰多瑙河嘅高山。蓋勒特山係用聖蓋勒嚟起名，後者喺呢座山上面被掟落去而跌死。蓋勒山洞喺山裡面，面向住蓋勒酒店同埋多瑙河。

• 有趣而純屬巧合嘅係，蓋勒Gellert呢個名同另一個名格雷特Gelert好似，後者係北威爾斯傳說入面（有現實依據）一隻忠犬嘅名。根據當地嘅神話，格雷特係盧埃林王子最忠實嘅伴侶，但畀人誤認為係殺死王子嘅BB王子繼承人嘅罪魁禍首。佢嘅「墳墓」係英國格溫內思郡貝德格勒特字面意思係格雷特嘅墳墓嘅一個景點，呢個傳說亦都喺嗰度流行。

外表

葛林戴華德有一頭金色頭髮，眼睛呈藍色，佢喺後生嗰陣仲有一張「快樂狂放」嘅樣。哈利·波特認為嗰個係「一種弗雷同喬治方式嘅惡作劇成功嘅得意神態」。

當佛地魔喺紐蒙迦德監獄嘅頂層監倉裡面搵到佢嗰陣，當時佢即將走到去生命嘅盡頭，葛林戴華德嗰陣時年老嘅身體已經非常之虛弱，十分瘦弱到好似得返棚骨咁樣。佢塊面變到好似骷髏咁樣，雙眼深陷喺眼窩入面，而佢棚牙幾乎甩晒咁滯。

性格

葛林戴華德非常之聰明，而且有魔法嘅天份。佢後生嗰時係個傑出而令人着迷嘅巫師，大多數遇見過佢嘅人都係咁樣認為——就連阿不思·鄧不利多本人都承認葛林戴華德非常之迷人，甚至鍾意咗佢。呢個亦都成為咗鄧不利多由一開始就對葛林戴華德危險嘅魔法行為隻眼開隻眼閉嘅其中一個原因。葛林戴華德份人好理想主義，後來進展去到殘酷嘅程度；佢脾氣亦都唔好——當阿波佛反對佢同阿不思嘅計劃，仲試吓去說服佢阿哥放棄嗰時，葛林戴華德就「冇咗控制」，用酷刑咒打中阿波佛；後來當葛林戴華德同紐特·斯卡曼德決鬥嗰時，佢好快就制服咗對手，但係佢選擇用魔杖尖端發射嘅閃電嚟折磨佢哋，而唔係直接殺死佢哋。

葛林戴華德有天才級嘅智慧同埋冷酷無情嘅性格，佢份人高度自我中心，佢認為阿不思係同佢自己平等嘅，佢亦會讚揚默然者魁登斯，不過佢對於嗰啲水平低過自己嘅人幾乎冇興趣同耐性，就好似冇咁有才華同智慧嘅阿波佛同埋精神失常嘅阿蕊安娜，葛林戴華德會對佢哋兩個睄saau3都唔睄吓。佢反而能夠發現嗰啲有天賦才能嘅人嘅能力，仲能夠同佢哋建立起緊密嘅聯繫，就好似魁登斯咁樣。佢能夠表現出極強嘅操控能力，畀佢發現嘅嗰啲有天份才能嘅人可以畀佢利用，就好似佢用人哋從來未試過嘅方法嚟引誘魁登斯，口口聲聲話可以幫佢重新融入魔法社會，搞到魁登斯畀佢無情咁利用，就算喺魁登斯用默然者嘅狀態變得十分之危險嗰時，佢都仲係要試吓去繼續利用對方。另外，葛林戴華德喺佢認為魁登斯唔再有利用價值之後就無情咁將佢拋棄，仲認錯佢做爆竹，仲喺美國魔法國會MACUSA主席決定畀正氣師消滅佢嗰陣時表現出極之嬲。

葛林戴華德對自己嘅行為都有一定程度嘅約束，至少佢能夠理解到死亡對人哋造成嘅影響。例如，喺佢同鄧不利多兄弟嘅決鬥搞到阿蕊安娜死咗之後，佢驚到要著草；當佢好想要接骨木魔杖嗰時，佢並冇將葛果羅威殺死，而只係單純咁打暈咗對方。呢個講明佢並唔想用殺戮嚟做達成目的嘅手段。佢可能亦都考慮到，如果佢殺咗葛果羅威嘅話，咁啲巫師就會更加信葛果羅威之前話佢自己有接骨木魔杖嘅講法，因為呢種魔杖主人嘅轉變方式就同傳說入面所講嘅一樣。另外，佢唔肯向佛地魔透露任何有關接骨木魔杖嘅消息，部分原因係為咗阻止佛地魔闖入去鄧不利多嘅墳墓，咁樣又或者係因為悔恨而想做啲嘢彌補。當然，佢亦都可能淨係想取笑吓佛地魔。

作為一個激進的精英主義者，葛林戴華德能夠為咗實現目標而精心編制計劃，仲能夠精確咁模仿並扮成美國魔法國會魔法安全主管兼魔法執行部司長嘅博知維·格雷維斯而唔會畀人懷疑。葛林戴華德係個極端嘅理想主義者，佢認為只要達到咗佢嘅遠期目標，就算犧牲上百個無辜資嘅人亦都變得唔緊要。事實上，葛林戴華德嘅理想主義甚至促使佢喺紐約撕破自己嘅偽裝，直接咁表達佢對將魔法世界收埋嘅厭惡，仲開始襲擊嗰啲啱啱攻擊過魁登斯嘅嗰啲正氣師。葛林戴華德喺佢畀紐特·斯卡曼德制服咗之後，佢仍然對自己嘅行為無動於衷，仲囂張咁質疑美國魔法國會主席能唔能夠韞得住自己。

葛林戴華德喺畀人打敗咗之後，佢對啲嘢嘅觀點可能變咗些少，後來仲悔恨佢自己之前所犯嘅罪。當手無寸鐵嘅葛林戴華德喺韞住佢嘅監獄入面去面對唯一強大過佢嘅黑巫師—佛地魔嗰陣時，佢完全看唔起佛地魔，佢將對方睇成係個力量強大嘅白痴，根本完全唔知道咩先係重要。佢好明顯然喺漫長嘅牢獄生涯入面冇咗求生意志，佢亦知道自己一定死梗，但係佢都仲係公然咁挑釁仲去串佛地魔，刺激對方去殺死自己。事實上，呢個都顯露出佢後生嗰陣時「快樂狂放」嘅性格，喺葛林戴華德最後同佛地魔所講嘅嘢裡面可以睇得出佢已經睇透生死，仲認為「死亡不過係另一場偉大嘅冒險」，就好似佢嘅舊朋友阿不思·鄧不利多咁樣。

魔法技能

葛林戴華德喺讀書嗰陣就已表現出佢非凡嘅天份，成年之後更加係咁樣。佢嘅魔法能力可以同阿不思·鄧不利多同埋佛地魔嚟去比。喺佛地魔崛起之前，佢被認為係有史以嚟最強大嘅黑巫師。作為接骨木魔杖前主人嘅葛林戴華德，佢嘅魔法能力喺呢種魔法物品嘅強大力量加持之下得到咗進一步嘅提升。就算佢盡力去抑制自己嘅能力，仲用咗人哋（博知維·格雷夫）支魔杖嗰時，葛林戴華德依然仲係夠晒強大同埋係危險嘅巫師。

• 魔法天賦：葛林戴華德喺德姆蘭學院讀書嗰陣時就已經係個好有才華而技藝精湛嘅學生，佢同阿不思·鄧不利多不相伯仲，呢個亦都令到呢兩個後生仔做到朋友。葛林戴華德喺後生嗰陣令到歐洲大多數巫師覺得驚，直到喺最後一場傳奇決鬥入面畀舊朋友鄧不利多打敗。雖然葛林戴華德喺決鬥入面被打敗，仲冇咗接骨木魔杖，但當時嗰場決鬥持續咗好長時間，仲正喺巔峰時期嘅鄧不利多亦都只係「略勝一籌」。除咗咁樣之外，葛林戴華德仲對魔法有深入嘅認識同理解，佢會試吓理解所有同呢啲嘢有關嘅一切。呢個亦都令佢喺晚年面對佛地魔嗰時仍然能夠用從容不迫嘅態度嚟嘲笑佢。喺佢嘅角度睇嚟，佛地魔只不過係個有強大魔法力量嘅白痴嚟嘅啫；另外，葛林戴華德仲做咗接骨木魔杖嘅主人，直到佢同鄧不利多嘅決鬥入面先至冇咗呢樣嘢。呢個就表明咗葛林戴華德比佛地魔可以更好咁理解魔杖嘅原理，因為佛地魔從來都冇真正咁擁有過呢樣嘢。

• 天資聰穎：葛林戴華德唔單止係個強大嘅巫師，佢仲擁有難以置信嘅智慧。佢同阿不思·鄧不利多差唔多咁聰明，而鄧不利多就被認為係霍格華茲最優秀嘅學生。事實上，葛林戴華德同鄧不利多嘅才華係互補不足嘅。根據佢姨婆—芭蒂達·巴沙特嘅講法，就算鄧不利多成日都同葛林戴華德碰撞吓智慧，佢有時仍都會用貓頭鷹來送封信畀葛林戴華德，將佢把自己最新嘅諗第一時間話佢知。葛林戴華德喺成年之後為咗達到其目的能夠精心設計咗一套複雜嘅計劃，比如捉住美國魔法國會MACUSA主席皮奎利Picquery嘅左右手—博知維·格雷夫Percival Graves，仲假借佢嘅身份潛入去MACUSA。除咗呢個之外，佢仲可以完美咁模仿格雷夫嘅美國口音，仲履行佢嘅各項職責。佢喺嗰段時間仲喺度搵默然者嘅真實身份而冇引起周圍其他人嘅懷疑。

• 領導能力：為咗推翻《國際巫師聯合會保密法》，葛林戴華德嘅巫師軍隊喺佢嘅領導下响歐洲發動咗持續幾年嘅戰爭；而且佢能夠發現嗰啲有天份嘅人嘅能力，佢極強嘅操控能力，令到畀佢發現嘅嗰啲有天份嘅人畀佢利用。

• 個人魅力：葛林戴華德喺後生嗰陣已經可以好容易就操控到其他人。佢成功吸引到阿不思·鄧不利多嘅注意仲同佢做咗好朋友，佢哋一齊去搵死神聖物，仲策劃去發動巫師革命，直至阿波佛站出嚟去阻止阿不思；喺假扮成博知維·格雷維斯嗰陣，佢仲成功呃到魁登斯·巴波嘅信任，仲利用對方去搵默然者嘅下落；佢成功做到魁登斯心目中嘅導師，仲用虛情假意嘅信任同支持嚟控制魁登斯；葛林戴華德亦都成功召集咗一批狂熱嘅追隨者，佢哋喺葛林戴華德嘅領導下响歐洲進行咗長達幾年嘅恐怖統治，仲試吓去推翻《國際巫師聯合會保密法》。

• 應變能力：葛林戴華德成功咁隱藏佢嘅真實身份，佢用博知維·格雷夫嘅身份滲透入去MACUSA，佢完美咁模仿博知維嘅性格特徵，仲能夠代佢履行各項職責而唔畀人發現。

• 魔咒：葛林戴華德可以好純熟咁運用魔咒。阿不思·鄧不利多曾經指葛林戴華德喺唔使隱形斗篷都施展到滅幻咒令自己隱形；葛林戴華德施展到強大嘅滅幻咒嚟達到咁樣嘅狀態，而呢個係十分之難嘅技巧，更何況係葛林戴華德喺１７歲嗰陣就已經做得到。所以，隱形斗篷對於葛林戴華德嚟講係死神聖物入面佢最冇興趣嘅嗰件，繼續搵呢樣嘢只係為咗集齊晒３件傳奇文物嘅啫；葛林戴華德嘅鐵甲咒都好強大，面對大量正氣師施展攻擊魔法嗰陣時都仲能夠抵禦魔法攻擊；另外，葛林戴華德都識得用酷刑咒，佢曾經對阿波佛、紐特同埋麻瓜雅各·科沃斯基身上去用；佢亦都識得使用氣象咒，佢曾經用嚟打低所有飛天掃把上面嘅正氣師。

• 變形學：葛林戴華德精通變形術，包括人體變形，佢可以唔使變身水嘅情況下都可以變成任何人，佢可以長時間假扮成博知維·格雷夫而唔會引起懷疑。

• 決鬥經驗：葛林戴華德係個經驗豐富嘅決鬥者。佢喺德姆蘭讀書嗰陣已經全面咁學咗各式戰鬥魔法，嚟到令佢嘅潛質互相匹配到佢嘅能力，能夠做到個自信、專注、有條理而且多才多藝嘅巫師。就算佢能夠用魔法造成好大嘅破壞，但係佢更加願意用傳統而正式嘅方式同對手去對抗，用「更公平嘅戰鬥」嚟打低對手。佢對魔咒嘅熟練程度係顯而易見嘅，佢會輕易咁用魔法嚟做反擊，仲消磨對方嘅意志，喺報復之前先畀佢哋敬畏自己強大嘅力量。青年時期嘅佢能夠憑住佢一個嘅力量去同阿不思仲有阿波佛兩個人同時去決鬥，並喺歐洲大陸實行恐怖統治嗰時殺害咗大量巫師；佢可以好快咁整暈葛果羅威嚟做咗接骨木魔杖嘅主人；喺扮成博知維·格雷夫嗰陣，佢同紐特·斯卡曼德仲有蒂娜·金坦嘅每場一對一嘅決鬥入面贏咗，可以輕易咁制服佢哋兩個，甚至可以輕易咁同幾個訓練有素嘅MACUSA正氣師去戰鬥。葛林戴華德最後甚至能夠同正喺巔峰時期嘅阿不思·鄧不利多去決鬥，佢哋兩個嘅對決被認為係魔法歷史上最偉大嘅一場決鬥。不過，就算葛林戴華德當時擁有咗被譽為無與倫比嘅接骨木魔杖，但係佢都仲係無辦法打贏阿不思，阿不思喺事後指自己比葛林戴華德「略勝一籌」。

• 魔法史：葛林戴華德對魔法石同埋魔法傳奇故事都有好深嘅了解，特別係關於死神聖物同埋魔杖學嘅部分，例如佢知道死神聖物裡面嘅隱形斗篷嘅原有者—伊諾特·皮福雷Ignotus Peverell埋葬喺高錐客洞。

• 占卜學：葛林戴華德係個先知，佢可以預知麻瓜世界未來會爆發二戰；佢喺巫師世界入面預見到強大嘅默然者同魁登斯·巴波有關聯。不過，佢喺呢個領域上並唔係專家，因為佢由一開始就解讀錯呢個預言，仲認為魁登斯可以幫到佢搵到嗰個細路，而冇意識到魁登斯就係嗰個細路；但係要注意嘅係，魁登斯係唯一已知生存超過１０歲嘅默然者，葛林戴華德可能因為咁而冇辦法預見到呢一點。

• 黑魔法：葛林戴華德喺讀書嗰陣就已經對黑魔法極之有天份同興趣。佢喺德姆蘭讀書嗰時曾經喺自己嘅同學身上做啲同黑魔法有關嘅實驗。雖然佢好後生，不過佢嘅實驗幾乎都係死得人嘅。佢嘅行為最後搞到學校頂佢唔順就將佢踼出校。葛林戴華德喺成年之後幾乎涉足晒黑魔法嘅各個領域，仲喺佛地魔出現之前排喺古今最危險嘅黑巫師名單上面嘅首位。葛林戴華德擅長用酷刑咒，佢都曾經喺阿波佛身上用過呢個咒語。葛林戴華德後嚟喺扮成博知維·格雷夫嗰陣，佢仲曾經用嗰個咒語嚟折磨紐特·斯卡曼德。

• 治療魔法：葛林戴華德對治療魔法有一定嘅了解，佢可以單單透過掂吓就可以醫返好魁登斯·巴波手上面嘅傷痕。

• 現影術：葛林戴華德可以喺任何反現影術嘅地方去用現影術。

• 鎖心術：葛林戴華德係個出色嘅鎖心者，佢嘅鎖心術強大到就連喺破心術上面有高深造詣嘅黑巫師佛地魔都無辦法睇得透佢嘅思想，所以就無辦法喺對方身上攞到接骨木魔杖嘅消息；喺扮成博知維·格雷夫嗰陣，佢能夠完全隱藏咗自己嘅真實諗法，就連擅長破心術嘅奎妮·金坦亦都無辦法識穿佢。

• 無杖魔法同埋無聲咒語：葛林戴華德好擅長用無杖魔法同埋無聲咒語，呢兩樣嘢就算係單獨去用都已經係好高深嘅魔法。葛林戴華德成日同時去用呢兩樣嘢，呢個更加顯現到葛林戴華德嘅魔法實力。佢可以單單透過手勢就產生到強大嘅衝擊波，或者用呢樣嘢嚟壓制住其他人。例如，佢只係揚吓手就可以喺紐特手上將佢嘅魔法行李箱搶走，仲同時搶埋佢支魔杖。佢仲可以透過掂嘅方式嚟治療魁登斯手上面嘅傷痕。

資產

• 葛林戴華德嘅頸鍊：呢個係一串帶住死神聖物標誌嘅頸鍊，葛林戴華德將呢樣嘢交畀魁登斯·巴波，等佢可以透過掂嘅方式喺召喚自己。
• 葛林戴華德嘅魔杖：葛林戴華德最初嗰支魔杖係１５英寸長嘅接骨木魔杖，杖芯係騎士墮鬼馬嘅尾羽毛。呢支魔杖喺佢搶走接骨木魔杖之前用緊嘅。佢曾經用呢支魔杖喺德姆蘭學院 牆上面刻咗死神聖物嘅標誌，仲用嚟同阿不思仲有阿波佛去三方決鬥。
• 接骨木魔杖：葛林戴華德喺葛果羅威手上搶走呢支魔杖，不過最後喺佢同阿不思·鄧不利多嘅終極決鬥裡面冇咗呢支魔杖嘅擁有權。
• 博知維·格雷夫嘅魔杖：葛林戴華德喺假扮成博知維·格雷夫嗰陣時，佢曾經去用對方嘅魔杖。

相關情節

葛林戴華德喺於1883年左右出世，佢曾經喺當時出晒名畀學生用黑魔法嘅德姆蘭學院讀書，仲受到實力同黑暗相關嘅學校文化嘅影響得好深。葛林戴華德係個好有才華，並且好有吸引力嘅巫師，佢迷人嘅性情同埋「快樂狂放」嘅性格令佢同好多人一樣感受到黑魔法嘅吸引。葛林戴華德喺讀書嗰陣時對歷史、傳說同埋魔法器物嘅力量都有好深嘅興趣，呢個令佢迷上咗死神聖物，佢甚至將死神聖物嘅標誌當做代表自己嘅符號。由於嗰間學校嘅文化畀學生去學黑魔法，所以當葛林戴華德致力喺做黑魔法研究嗰時並未畀校方阻攔過；不過直到佢１６歲嗰年（1899年），因為佢嗰啲實驗幾乎搞到佢啲同學死咗，德姆蘭嘅師長終於無辦法對佢做嘅嗰啲危險而邪惡嘅實驗睇到當睇唔到之後就將佢踢咗出校，而佢曳仔嘅性格同埋佢蔑視規則嘅制度亦都可能係德姆蘭將佢踢出校提供咗某個程度嘅幫手。葛林戴華德喺離校前，佢喺德姆蘭嘅一幅牆上面留低咗死神聖物嘅標誌。

葛林戴華德喺離開咗德姆蘭之後嘅動向相當之神秘，根據可以查到嘅相關記錄淨係可以推測佢「花咗幾個月嘅時間去遊歷各地」嚟繼續做研究。對死神聖物好有興趣嘅葛林戴華德為咗探索呢樣嘢嘅消息而去到英國嚟到高錐客洞去調查死神聖物嘅原有者皮福雷三兄弟嘅墳墓，葛林戴華德首先去拜訪佢嘅姑婆—嗰個出名嘅魔法史學家芭蒂達·巴沙特Bathilda Bagshot，仲留喺嗰度同佢住咗一排。葛林戴華德喺嗰度遇到當時啱啱做咗孤兒嘅阿不思·鄧不利多，仲同佢做咗好朋友，後嚟仲同佢建立咗一段浪漫關係。呢兩個後生嘅巫師互相認識咗之後因為大家都有共同嘅文化、理想同抱負而擦出咗火花。佢哋好明顯越行越近，佢哋大家發展出柏拉圖式嘅感情。後來佢哋兩個計劃建立一個新嘅世界秩序—一個由巫師統領晒全人類，仲將麻瓜當成奴隸嘅計劃，巫師喺嗰度會「為咗更遠大嘅利益」而統治麻瓜，呢句說話後來成為咗葛林戴華德作為佢喺恐怖統治嗰陣所犯咗嘅暴行甩身嘅藉口。佢哋兩個計劃一齊努力去搵死神聖物，佢哋仲鎖定咗死神聖物做首要目標。葛林戴華德除咗希望攞到接骨木魔杖之外，佢仲想攞到重生石去籌組佢嘅陰屍大軍嚟征服全世界。不過，葛林戴華德所諗嘅「偉大計劃」同鄧不利多只係希望保護自己愛嘅人喺動機上截然唔同...... 後尾鄧不利多更加為咗照顧年幼嘅細佬妹而擱置咗佢哋兩個走訪世界嘅計劃。

嗰個系列嘅作者羅琳喺佢網站嘅問答環節入面暗示話，鄧不利多曾經鍾意咗葛林戴華德，因為咁而令佢自己「冇晒道德指標」，不過羅琳並冇講明呢份感情係咪得到咗回報。就算呢件事後尾喺《怪獸與牠們的產地》系列電影裡面澄清咗，葛林戴華德確實回應咗呢啲感受，喺口頭上得到證實。不過，阿不思嘅細佬阿波佛反對佢哋嗰啲計劃，佢因為擔心佢哋兩個人嘅雄心壯志會令自己同佢哋兩兄弟嗰個曾經受過傷而且有殘疾嘅細妹—阿蕊安娜·鄧不利多會被遺棄，佢因為咁而嚴厲咁鬧阿哥既揼低頭家又唔湊個妹，仲同葛林戴華德發生衝突。佢哋嘅鬧交後來搞到阿不思、阿波佛同葛林戴華德三個人發生決鬥，決鬥裡面意外發出嘅魔咒最終波及到其他人，搞到無意中介入嘅阿蕊安娜畀人殺死咗。葛林戴華德因為驚畀人報復而走佬，所以佢同鄧不利多嘅關係就咁完咗，佢哋兩個自此就各行各路。

葛林戴華德跟住之後就喺好出名嘅魔杖製造師葛果羅威Gregorovitch嗰度偷咗支接骨木魔杖嚟做咗其中一件死神聖物嘅主人。佢攞到接骨木魔杖嘅強大力量之後從此就為禍一時，佢跟手就犯咗好多得人驚嘅行為，包括殺死咗包括維克多·喀浪阿爺在內嘅好多人，佢同時又用死神聖物嘅標誌嚟做自己嘅記號去征服世界，喺避開英國嘅同時又恐嚇住歐洲嘅巫師世界。葛林戴華德嘅行為據透露搞到好多人死咗，仲對德姆蘭嘅學生造成咗極大嘅影響，裡面包括咗維克多·喀浪。

葛林戴華德崛起之後，鄧不利多因為驚去面對佢阿妹嘅死同埋可能係佢自己意外殺死佢呢個事實而唔想見葛林戴華德，而葛林戴華德一直無辦法面對佢嘅昔日老友兼舊情人，令到兩邊都推遲咗幾年之後先至再見番面。呢兩位巫師都非常聰明，戰鬥技巧亦都十分之高超，不過葛林戴華德對巫師世界為禍太甚，搞到鄧不利多冇得唔出面去對付佢。當佢哋嘅戰鬥最終要發生嗰陣，據嗰啲目擊者事後講，冇其他巫師決鬥可以同呢次去比。當時擁有據稱無與倫比嘅接骨木魔杖嘅葛林戴華德最終喺傳奇咁樣嘅決鬥入面輸咗畀鄧不利多。自從鄧不利多打贏咗葛林戴華德之後，接骨木魔杖嘅忠誠因為咁轉咗落去鄧不利多身上，而被打輸咗嘅黑巫師最終被韞住喺自己去起嘅紐蒙迦德監獄最頂層嘅監倉裡面。佢一直吽喺嗰度，喺監獄嘅蹂躪之下個人變到殘晒又冇牙，直至佛地魔因為搵死神聖物—接骨木魔杖而去到嗰度。葛林戴華德面對住同自己一樣咁強大嘅佛地魔，佢一啲畏懼都冇仲迎接死亡嘅來臨，佢話畀佛地魔知自己從來都冇擁有過嗰支魔杖，嬲到震嘅佛地魔於是就殺死咗佢。如果唔係佛地魔橫空出世嘅話，葛林戴華德肯定係巫師世界入面嘅首席黑巫師。

哈利波特系列

葛林戴華德個名第１次喺第１輯小說同電影裡面被提到，哈利·波特當時喺攞到佢成世仔第１張朱古力蛙巫師卡片，嗰張朱古力蛙巫師卡片嘅正面係阿不思·鄧不利多，而背面上所記載嘅係簡略咁記載住佢喺1945年將葛林戴華德打低嘅事蹟。葛林戴華德嘅角色喺戲入面直到《哈利波特：死神的聖物1》先至再被提到，佢喺裡面作為鄧不利多背景故事嘅重要部分。

喺《哈利波特：死神的聖物》裡面，由麗塔·史譏寫有關佢嘅傳記—《鄧不利多的人生與謊言The Life and Lies of Albus Dumbledore》先至逐漸咁揭開葛林戴華德同鄧不利多嘅過去。喺小說裡面嘅一章《英皇十字車站》入面，哈利向鄧不利多暗示話，葛林戴華德透過向佛地魔講大話嚟阻止對方闖入去鄧不利多嘅墳墓仲攞走咗支接骨木魔杖，佢可能一直喺度試吓去彌補佢嘅罪。佛地魔為咗攞到接骨木魔杖而搵到葛林戴華德，而葛林戴華德寧願死都唔肯透露接骨木魔杖已經畀鄧不利多攞到呢件事，結果喺監倉牢房裡面畀佛地魔殺死，哈利認為呢個係葛林戴華德為咗保護鄧不利多所做嘅舉動。電影同小說唔同嘅係，葛林戴華德向佛地魔透露咗接骨木魔杖嘅下落。

怪獸系列前傳

葛林戴華德亦都有出現喺怪獸系列電影入面，頭兩輯由尊尼·特普去做佢嘅角色。葛林戴華德第１次出現喺《怪獸與牠們的產地》裡面，佢試圖去當選做國際巫師聯合會嘅最高領袖，因為咁就引發咗葛林戴華德同鄧不利多一連串嘅衝突。就算喺故事嘅大部分時間入面佢都假扮成由哥連·費路做嘅美國正氣師博知維·葛雷夫，同時佢正喺度搵緊個闇黑宿主，後尾佢先至知嗰個就似魁登斯·巴波。喺嗰個系列嘅之後故仔入面，葛林戴華德同鄧不利多喺佢哋後生嗰陣時就立咗永遠唔傷害大家嘅血盟，葛林戴華德喺尋求間接殺死佢前度嘅手段嗰陣將嗰個血盟放喺一個細樽仔裡面。後尾佢哋嘅血盟喺佢哋嗰場傳奇對決入面打爛咗。喺眾人圍攻佢嗰陣，葛林戴華德話自己過去唔係，而家亦都唔會係佢哋嘅敵人，然後喺岩架上面跳咗落嚟利用消影術逃走咗。

其他資料

• 根據《哈利波特》系列嘅作者J.K·羅琳喺１篇訪問入面話，鄧不利多確實係個雙性戀者，鄧不利多同葛林戴華德之間存在住戀人嘅關係。
  • 2016年羅琳喺《怪獸與牠們的產地》電影嘅改編計劃入面話，鄧不利多同葛林戴華德之間嘅恩怨來往展現咗喺呢個系列裡面。

• 羅琳喺2007年話，佢希望喺故事裡面安排麻瓜世界戰爭進行嘅同時，仲有一場全球性嘅巫師戰爭正喺度進行緊，所以故事裡面葛林戴華德喺1945年被打敗並唔係個巧合；納粹德國喺現實中嗰一年打仗輸咗，同埋希特拉自殺。

• 喺哈利波特系列電影入面，占美·金寶·鮑華同埋米高·伯恩分別做後生同埋老年嘅葛林戴華德。

• 喺怪獸系列電影入面繼續由占美·金寶·鮑華做後生嗰陣嘅葛林戴華德，而中年嘅葛林戴華德就由尊尼·特普去做。尊尼·特普喺同羅琳傾過劇本之後就好快構思出嗰個角色嘅形象：係個「反社會份子、詩人同埋搖滾巨星」形象嘅結合體；電影入面嘅葛林戴華德雙眼唔同顏色，用嚟象徵嗰個角色嘅兩面性格。導演大衛·葉斯指葛林戴華德同佛地魔係兩個好唔同嘅反派，「如果同佛地魔有唔同意見嘅話，佢會即刻殺咗你，但係葛林戴華德可以喺５分鐘內說服你放棄立場而加入去佢嘅陣營」；葉斯另外亦指出：「葛林戴華德代表咗人類歷史陰暗嘅一面」。喺嗰個系列入面飾演魁登斯嘅演員艾薩·米勒就話，葛林戴華德同歷史上嘅好多獨裁者都有共同點。

• 2018年7月，尊尼·特普為咗宣傳嗰個系列嘅第２輯電影《怪獸與葛林戴華德之罪》，佢用葛林戴華德嘅造型喺聖地亞哥國際漫畫展上面發表咗好短嘅演講。

• 2020年11月，華納兄弟宣布丹麥影星麥斯·米基辛嚟緊將會喺《怪獸與鄧不利多的秘密》入面頂替尊尼·特普去做蓋勒·葛林戴華德嘅角色；後者因為個人醜聞畀華納兄弟要求辭演。