霍格華茲魔法與巫術學院

霍格華茲
作者	J·K·羅琳
虛構宇宙／ 系列	哈利波特 魔法世界
類型	學校
首次出場	哈利波特：神秘的魔法石（1997）
創立年份	９—１０世紀之間
座右銘	永遠唔應該去攪醒沉睡緊嘅龍。Draco dormiens nunquam titillandus
地點	蘇格蘭

霍格華茲魔法與巫術學院（英文：Hogwarts School of Witchcraft and Wizardry），簡稱霍格華茲，係英國作家J·K·羅琳嘅魔幻小說《哈利波特》系列入面嘅主要地點。霍格華茲係一間歷史悠久嘅虛構魔法寄宿學校，畀英國１１—１７歲嘅後生巫師同女巫入去讀書兼寄宿，嗰度亦都係《哈利波特》頭６輯小說嘅主要設定，亦都係《魔法世界》媒體系列嘅主要場景。喺嗰個系列嘅世界，霍格華茲係歐洲三大魔法學校之一。

喺小說入面，霍格華茲被形容做一間男女校嘅中學寄宿學校，招收１１—１８歲嘅細路。根據羅琳所講，喺英國任何一個展現魔法能力嘅細路都會被邀請去呢間學校讀書。《魔法世界》嘅網站指出，霍格華茲係由高錐客·葛萊分多、海加·赫夫帕夫、羅威娜·雷文克勞同埋薩拉查·史萊哲林喺９—１０世紀之間喺蘇格蘭高地創立嘅。羅琳為咗講下霍格華茲喺任何一個時間有幾多學生報讀而提供咗唔同嘅描述。

羅琳喺1999年嘅一個訪問入面話佢諗住霍格華茲係一個為孤兒哈利·波特提供安全嘅地方。佢話因為好多重要嘅劇情事件都發生喺夜晚，所以佢就將霍格華茲變成間寄宿學校。

喺2008年線上投票《蘇格蘭最佳教育機構》裡面，霍格華茲當選排名第３６位，排名比愛丁堡嘅洛雷托學校仲要高。有幾位作家話羅琳嘅「霍格華茲」呢個名係嚟自傑弗里·威蘭斯喺1954年嘅書《如何成為頂級How to Be Topp》。呢本書形容咗一個叫做「霍格華茲」嘅虛構戲劇，同埋一個叫做霍格華特Hoggwart嘅虛構學校校長。不過羅琳話，佢自己可能係唔知情咁樣由霍格草hogwort呢種植物嘅名衍生出嚟。

城堡同場地

喺佛羅里達州奧蘭多冒險島樂園遊樂場嘅霍格華茲城堡版本。

霍格華茲係喺蘇格蘭高地嘅寄宿學校，學生嘅年齡由１１—１７歲。學校係山湖旁邊嘅城堡，雖然呢間學校嘅精確地點喺小說裡面冇仔細咁講，不過《哈利波特：阿茲卡班的逃犯》戲入面就話嗰度嘅位置喺杜夫敦隔離，而嗰間學校嘅學生一定要搭火車先至可以去到。雖然學校喺蘇格蘭，不過學校嘅招生範圍可以遠到去廣泛啲嘅不列顛群島，所以愛爾蘭嘅學生都可以入讀。

霍格華茲嘅學生可以透過一列叫做霍格華茲特快列車嘅蒸汽動力火車往返霍格華茲。羅琳將霍格華茲嘅視覺形象形容做：

「

一個好鬼大、可以四周圍漫步，有啲西洋塔同埋城牆，係個睇落去幾恐怖嘅城堡。就好似衛斯理一家嘅洞穴屋咁樣，因為呢樣嘢需要魔法嘅支撐先至做得到，並唔係麻瓜起得到嘅建築物。

」

霍格華茲係一間魔法男女校，教育唔係強制性嘅，有啲學生正係第７輯入面講到嘅家庭教育。羅琳最初話霍格華茲有大約1,000個學生，佢後嚟就話嗰度大約有600個學生，同時佢又承認呢個數字仍然同哈利波特嗰屆嘅人數唔一致，因為佢喺嗰屆創造咗４０個角色。

霍格華茲有好多魔法同咒語保護嚟令麻瓜睇唔到，更加唔可能搵得到。就算麻瓜嚟到霍格華茲校門前面，佢哋亦都只係睇到廢墟同埋一堆危險警告牌，而且會諗起啲非常之緊急嘅事，因為嗰度施展咗好強大嘅麻瓜驅逐咒。喺2000年出版嘅《哈利波特：火盃的考驗》入面就解釋咗非魔法人類嘅麻瓜係唔會睇得見霍格華茲，因為嗰度被施展咗好多保護魔法。成年嘅巫師同女巫可以用唔同嘅方法去到學校，比如係飛天掃把或者係呼嚕粉，亦都可以搭騎士巴士或者用現形術嚟喺學校附近嘅地點現影再行返去學校，不過學校裡面受到反消影咒嘅約束，所以巫師同女巫一般都唔可以喺霍格華茲校園裡面用嗰個方法（校長除外）。除非校長解除呢個魔法，如果唔係無論巫師嘅法力再強大都好，都用唔到消影術（除咗阿不思·鄧不利多）。

學校嘅校園裡面有斜坡草坪、花壇、菜園同溫室，仲有其他附屬建築物，同埋有一個可以玩巫師運動魁地奇嘅標準球場。學校裡面有間貓頭鷹屋，飼養住由嗰間學校同埋學生嘅貓頭鷹。

自然環境方面，學校隔離有一個叫做禁忌森林the Forbidden Forest嘅森林區域，仲有個叫做黑湖The Black Lake嘅湖泊——嗰度係人魚、滾帶落同埋巨型魷魚嘅棲息地。巨型魷魚唔會攻擊人類，佢哋仲會喺學生浸親嗰陣做救生員，喺《哈利波特：火盃的考驗》就出現咗呢個景象。

學校裡面嘅某啲空間喺移動樓梯隔離，嗰啲地方都可以喺主樓梯去到。就算學校封鎖住，嗰度都有幾條隱藏嘅秘密通道可以通去學校出面。

通訊方面，喺霍格華茲，麻瓜嘅電子儀器同設備（包括電腦、電視、收音機唔計「巫師收音機」、手提電話等等）都唔會用得到，因為空氣入面充滿住強烈嘅魔法磁場干擾住啲電子嘢。羅琳解釋巫師收音機用到係因為呢樣嘢唔係依靠電力，而係用魔法嚟提供能量嘅。

學院

霍格華茲校徽

霍格華茲係由兩個巫師同女巫喺1,000年前（１０世紀）創立嘅，佢哋分別係：高錐客·葛萊分多、海加·赫夫帕夫、羅威娜·雷文克勞同埋薩拉札·史萊哲林。佢哋成立霍格華茲嘅目的係想教育後生嘅巫師同女巫，同時對佢哋起到一個保護嘅作用，唔好受到麻瓜嘅迫害。自成立以嚟，大部份英國境內有魔法能力嘅細路都喺霍格華茲接受教育，而校園亦都受到魔法嘅保護，麻瓜就算入咗嚟到都只係會睇到一片廢墟同埋幾個警告牌。後來，薩拉札·史萊哲林喺創立咗霍格華茲之後因為淨係想收純血血統嘅學生而同其他創立者發生磨擦，因為佢哋唔同意咁樣做。史萊哲林後來離開咗學校，但係佢秘密咁喺學校地牢起咗個密室出嚟，令佢自己真實嘅繼承人，又或者係史萊哲林嘅繼承人返到去學校就可以將秘室打開嚟將好得人驚嘅蛇妖解放出嚟，去清洗學校裡面所有麻瓜出身嘅學生。

霍格華茲裡面有４個學院，每個學院都用學校其中１位創辦人嘅姓氏嚟命名。每個學院喺成個學年入面都會根據學生上堂嘅表現或者違規行為而攞分或者扣分，喺學期尾聲嗰陣競逐去爭學院盃，年尾總數最高嘅學院就會贏，仲會喺跟住下學年响禮堂嘅旗幟就會展示嗰個學院嘅顏色；每個學院都有自己嘅魁地奇球隊去競逐學校嘅魁地奇盃。這兩項比賽形成咗各學院之間嘅競爭。每年，每個學院唔同年級嘅學生都會共用宿舍同課室，學院嘅宿舍同共用房間淨係畀嗰個學院嘅師生先可以入去。除咗罕見例外，其他學院嘅學生係無辦法入去嘅。霍格華茲嘅學院係啲學生去學習同生活嘅社區，每個學院都直屬霍格華茲裡面嘅１位教授做佢哋嘅學院導師。學院導師負責向學生傳遞重要嘅信息，如果某學院嘅學生犯咗大錯就需要接受由嗰個學院嘅導師嚴厲嘅懲罰。如果霍格華茲面臨住緊急狀況，亦都要由校長指揮學院導師去帶領學生度過危機。由於「學院」呢個系統嘅概念喺好多其他國家並唔存在，亦都冇詞語可以去充分咁表達所屬學院嘅重要性、忠誠，仲有對所屬學院贏到獎項嘅自豪感，所以呢個系列小說外語版嘅翻譯者比較難去翻譯「學院」呢個概念。

喺霍格華茲啱啱成立嗰陣，４位創辦人會親自為佢哋嘅學院揀學生，佢哋都擔心自己死咗之後會點樣揀學生，於是葛萊分多將自己頂帽除咗落嚟，佢哋每個人都將自己嘅意念加入去成為分類帽度，畀佢去透過判斷每個學生嘅資質嚟分配去到啱嘅學院。當一年級嘅新生去到霍格華茲嗰陣，呢頂有魔法嘅分類帽就會戴喺佢哋個頭上面嚟決定派佢哋入去邊個學院。分類帽會測試佢哋嘅心態，仲會根據佢哋嘅能力、性格同喜好嚟將佢哋分配去某個學院，不過學生嘅個人意願亦都有可能會影響結果。最明確嘅例子是在第１輯小說同戲入面，分類帽話畀哈利·波特知佢第日响史萊哲林學院嘅話會有更好嘅發展，不過哈利強烈要求唔好派佢去史萊哲林，所以分類帽最終派佢去葛萊分多學院。

每個學院都會由霍格華茲嘅其中一位教授嘅管理。以下係４個學院嘅描述：

• 葛萊分多：呢個學院重視勇氣、膽量同騎士精神；根據羅琳嘅講法，葛萊分多學院大致對應火嘅元素。學院嘅代表顏色係對應火元素嘅紅色同金色，學院吉祥物係獅子，而學院負責人係米奈娃·麥，直到她升職做校長。學院嘅幽靈係尼古拉斯·德米西·波普頓爵士，人人都叫佢做「差啲無頭嘅尼克」。葛萊分多嘅宿舍喺一座高塔入面，學生一定要喺肥女士嘅畫像前講出密碼先至可以入到去宿舍。
• 赫夫帕夫：呢個學院重視努力、耐心、正義同埋忠誠。根據羅琳嘅講法，赫夫帕夫學院大致對應地嘅元素。學院嘅代表顏色係對應土元素嘅鮮黃色同黑色，學院吉祥物係黑獾，而學院負責人係帕莫娜·芽菜。學院嘅幽靈係快活嘅肥修士。赫夫帕夫宿舍嘅入口收埋喺廚房走廊裡面嘅一堆大桶後面嘅凹位。
• 雷文克勞：呢個學院重視知識、學習、智慧同埋創造力。雷文克勞嘅代表顏色係對應空氣元素嘅藍色同埋古銅色電影裡面係藍色同灰色，吉祥物係一隻鷹，不過喺《哈利波特系列電影》同埋《怪獸系列電影》就係渡鴉，而學院負責人係孚立維教授。雷文克勞學院嘅宿舍喺霍格華茲西翼嘅雷文克勞塔，學生需要解開一個謎題先可以入到去。
• 史萊哲林：呢個學院重視野心、精明、領導能力同足智多謀。史萊哲林嘅代表顏色係對應水元素嘅綠色同銀色，，吉祥物係一條銀蛇，學院嘅負責人係賽佛勒斯·石內卜，直到佢做咗校長嗰時就任命赫瑞司·史拉轟嚟繼任。史萊哲林嘅宿舍係要喺地牢入面嘅石牆前面講密碼先就可以入去，咁樣就會令到嗰度隱藏嘅門打開。

每個學院喺每個都會揀兩個５年級嘅學生做級長，呢個職位畀到佢哋有一定嘅特權同埋權力，亦可以因為同學違規而將佢哋罰留堂。級長嘅領袖—男女生長係由７年級嘅學生入面揀出嚟。霍格華茲３年級或以上嘅學生可以畀佢哋去附近嘅巫師村落活米村參觀。

校園生活

入學前

根據小說，霍格華茲嘅入學係有選擇性嘅：有魔法天份同能力嘅細路就會自動有機會，但作為「爆竹」嘅細路（即係父母都係喺巫師家庭出世而且有魔法能力，但係細路本身就唔識用魔法）就做唔到嗰度嘅學生，但仍可以喺學校裡面做嘢，就好似雅各·飛鼠咁樣。霍格華茲裡面有一支魔法羽毛筆可以檢測到有魔法能力細路嘅誕生，仲將佢哋嘅名寫喺一本大型羊皮紙造嘅黑色龍皮書上面，不過學校唔搞入學試，因為嗰間學校相信「冇所謂你嘅魔法唔夠，你一係有魔法，一係冇魔法」。

霍格華茲嘅教授每年都會檢索大型羊皮紙造嘅書嚟向就嚟踏入１１歲嘅合資格學生出信，去接受或者去推霍格華茲嘅錄取資格，而呢啲信一定要喺７月３１號寄出。信入面亦都包括用品清單好似係咒語教科書、校服、同埋其他學生需要嘅嘢。就嚟入讀霍格華茲嘅學生通常預期喺倫敦查令十字路附近嘅一條隱蔽嘅街入面，有一間叫做破釜酒吧嘅巫師酒吧後面，只要搵到目的地—斜角巷，就會買得晒所有必需嘅嘢。負擔唔起購買物資嘅學生可以喺學校攞到經濟援助，就好似嘅孤兒湯姆·瑞斗細個嗰陣咁樣。至於送遞去到麻瓜家庭裡面嗰啲魔法能力學生嘅信，佢哋可能唔知道自己嘅能力又唔熟悉巫師世界嘅嘢，所以畀佢哋嘅信通常會由霍格華茲做嘢嘅職員親自去送，職員會親自向嗰個學生嘅父母或者監護人解釋有關巫師社會嘅情況，仲會就住呢個消息幫佢哋打氣。佢哋仲會幫嗰個屋企，仲陪佢哋入去斜角巷去買需要用嘅嘢。

霍格華茲嘅校服包括１件黑色長袍、黑色帽、１對防護手套、黑色冬季披風配銀色固定部件。每套校服一定要包含住著嗰個人嘅名牌。一年級學生唔准有自己嘅掃把，哈利·波特憑住佢喺魁地奇比賽入面做追蹤手嘅卓越表現而有例外。

霍格華茲每個學生都可以帶貓、蟾蜍、老鼠或者貓頭鷹呢啲寵物去到學校。除咗錄取信之外，一年級嘅新生仲會收到所需物品清單，入面包括魔杖、教科書、１個標準晒士嘅錫鑞質釜、１套黃銅秤、１組玻璃或者水晶管形樽、１組用喺魔藥學嘅基本藥水成分，同埋用喺天文學嘅望遠鏡。

入學後

霍格華茲嘅學生都會喺每個學年嘅９月１號搭嗰間學校主要嘅交通工具—霍格華茲特快列車，學生會由倫敦嘅英皇十字車站裡面虛構而且隱藏嘅9¾月台上車，火車會喺挨晚一段時間之後去到霍格華茲附近嘅車站—活米村火車站。１年級新生喺嗰度會由獵場看守人魯霸·海格陪住一齊撐船神奇咁穿過湖入面去到近霍格華茲嘅入口嚟模擬學校創辦人當年抵達湖岸嘅艱辛；而２-７年級嘅學生就可以一種叫做騎士墜鬼馬嘅魔法生物嚟拉郁嘅馬車去到城堡，高年級嘅學生會早啲去到學校。

當１年級新生第１次去到學校嗰時，佢哋就需要喺入口大堂嘅一間房仔裡面等高年級嘅學長同學姐仲有啲教授坐低晒先至入去禮堂，學校嘅副校長就會喺期間接見佢哋去講解學校４個學院同埋學院分數嘅加減制度。跟住佢哋就會入去禮堂進行由分類帽分配佢哋去所屬學院嘅儀式。佢哋會喺嗰度聽到由分類帽唱出形容學校４個學院嘅歌。分類帽每年都會唱一首新歌，如果學校有危險，分類帽就會喺新歌裡面提供忠告。分類帽唱完歌之後，每個學生就要戴上佢，分類帽就會向全校宣布新生會派去邊間學院。一場豪華嘅開學盛宴喺分類儀式完成晒之後就會開始。

喺晚宴之後，一般都係由校長去講入學事務仲帶領去唱校歌。最後，１年級新生會喺級長嘅帶領之下行到佢哋自己嘅宿舍。新學期嘅課堂會喺開學第２日開始。

飲食

霍格華茲裡面家庭小精靈嘅職務係為所有教職員同學生提供所有嘢食。佢哋會特別喺節日烹調各式各樣款式嘅美食。各種美食都喺交誼廳下層嘅廚房裡面準備，廚房入面有４張長枱，直接同樓上４個學院嘅餐枱對齊，用餐嗰陣食物係用魔法運送去到學生睇得見嘅位置。

日常生活

霍格華茲嘅禮堂兼餐廳係喺英國華納兄弟利維斯登工作室嗰度拍攝嘅。

霍格華茲每日嘅生活喺禮堂食早餐開始，每個學院嘅學生都可以喺佢自己學院嘅枱上面食嘢同埋做社交活動，又或者做功課。校長會同其他教授一齊喺禮堂盡頭嘅高枱上面食飯。貓頭鷹會喺早餐嗰陣幫學生送郵件嚟，通常係《預言家日報》、父母同朋友嘅來信，又或者係嚟自屋企嘅包裹。開始上堂嗰時會喺上午９點正響一下鐘聲。

啲學生喺上晝會有兩個時間比較長嘅堂，中段會有個短暫嘅休息時間，畀佢哋去下一堂。佢哋會喺午餐之後嘅１點鐘開始上堂，下午茶時間左右會有個休息時間，然後先至開始下一堂。嗰堂大約一個鐘，偶爾會有兩個鐘嘅孖堂時間。所有嘅堂都會喺５點左右完。一年級學生會喺星期五嘅下晝休息，而６年級同７年級嘅學生喺一個禮拜內會有幾段空閒時間。啲學生到咗黃昏時間就會喺交誼廳食晚餐，然後預計佢哋會留喺各自學院嘅公用空間裡面。天文學嘅堂就會喺夜晚响占星塔裡面進行。

４間學院都有秘密入口，通常淨係得嗰個學院嘅成員知道，過到關先至可以畀入去。裡面就係嗰個學院嘅公用空間，擺放住扶手椅同梳化畀學生休息，同埋有枱畀佢哋溫書同做功課。冬天有壁爐保持間房嘅溫暖，畀啲學生可以喺夜晚放鬆身心或者做完功課，佢哋亦都可以喺睡房做功課。每個交誼廳同成個校園裡面嘅策略點都有壁報板提醒學生要注意嘅事。啲學生一定要喺佢哋嘅宿舍裡面瞓覺，或者係各個學院公用空間分支出嚟嘅房。每個學院嘅宿舍至少有兩間房：男生房同女生房（女生房會有魔法唔准男生入去，但係冇咒語防止相反嘅情況發生）。每個學生都有張帶住床罩嘅４柱大床，床上面有嗰個學院顏色嘅厚重布簾，同埋厚厚嘅白色枕頭。每張床旁邊都有張矮枱仔，而每個宿舍都設有一個水罐同埋高腳杯嘅托盤。

霍格華茲３年級以上嘅學生喺指定嘅周末，只要有家長簽咗名嘅同意書回條，就可以去到學校附近嘅巫師村落—活米村裡面去過休閒時光，佢哋可以喺嗰度放鬆一下同埋去吓嗰度嘅酒吧、餐廳同舖頭。嗰條村同學校嘅關係似乎幾好，而村裡面嘅人同學生都相處融洽。啲師生最鍾意活米村嘅地方包括：蜂蜜公爵糖果店、桑柯惡作劇商店、好似風雅氏高級巫師服飾商店咁嘅服裝店、被認為係英國最鬧鬼建築物嘅尖叫屋、例如係三根掃帚旅館酒吧同埋豬頭酒吧咁樣嘅酒吧，仲有泥腳夫人茶館。

其他

• 魁地奇係巫師世界裡面普遍嘅體育運動項目，但係１年級嘅學生通常加入唔到魁地奇球隊。佢哋需要去上飛行教練胡奇夫人教嘅飛行課。
• 萬聖節係霍格華茲裡面重要嘅節日，教職員都會用萬聖節嘅嘢嚟幫禮堂去裝飾。小說裡面幾乎每次大事件都喺萬聖節嗰陣發生。
• 學生喺聖誕節假期嗰陣時可以揀返屋企，而揀咗留低喺學校嘅學生就有機會去參加聖誕節餐宴。教職員喺禮堂裡面會用聖誕樹同其他嘢嚟裝飾；下學期會喺聖誕節假期完咗之後開始。
• 吉德羅·洛哈喺哈利·波特２年級嗰陣曾經搞過情人節嘅慶祝活動，不過呢個活動喺佢離開咗學校之後就未有繼續。
• 復活節假期唔會好似聖誕節咁樣令人開心，因為學生會畀超多嘅功課同準備學期尾嘅考試而壓到佢哋抖唔到氣。
• 魔法部喺暑假嗰陣唔准未成年嘅學生喺學校出面用魔法，但如果學生喺成年巫師嘅屋企裡面施展魔法就唔會畀魔法部發現到—因為魔法部淨係可以探測到魔法喺邊度出現，而唔可以知道係邊個放嘅。直到學生去到巫師世界嘅法定年齡（17歲）就唔再受呢個限制。

課程

内文：霍格華茲科目

天文學、符咒學、黑魔法防禦術、草藥學、魔法史、魔藥學同埋變形術都係１-５年級嘅必修科，仲有以及１年級嘅飛行學。學生喺２年級學期尾嗰陣時都一定要為佢哋３年級課程入面加多兩科以上做選修科。佢哋有５個選修科可以揀，包括：奇獸飼育學、古代神秘文字研究、麻瓜研究、算命學同埋占卜學。

１-４年級嘅學生一定要通過學期尾嘅主修科考試合格咗先至可以升班。學生喺５年級嗰時一定要去考簡稱做普等試O.W.Ls嘅普通巫術等級測驗Ordinary Wizarding Levels；學生喺７年級嗰時就需要去考簡稱做超勞試N.E.W.Ts嘅超級疲勞轟炸式巫術測驗Nastily Exhausting Wizarding Tests。兩者都係用英國中學嘅教育制度嚟做藍本，就好似超勞試對應英國高考。

師資

内文：霍格華茲教職員

霍格華茲揀教授嘅標準係唔清楚嘅，不過似乎係根據校長嘅喜好嚟決定。只要校長認為一位巫師或女巫有某個科目嘅專長就可以任命佢做老師，仲畀佢哋有教授嘅銜頭。而家學校裡面有１２個教授，佢哋冇終身任期，而係可以由校長炒魷或者佢哋自己劈炮唔撈而離職。所有教授都係由校長同副校長負責監督。

架構

成個故事系列開始嗰陣嘅校長係一位好睿智嘅巫師阿不思·鄧不利多。根據小說裡面咁講，佢成頭白頭髮，有對醒目嘅眼，不過佢嘅幽默感比較奇怪（有啲人認為佢瘋瘋癲癲咁樣）。佢似乎對學校嘅嘢無所不知，呢樣嘢令到霍格華茲成為巫師世界裡面嘅一個安全避風港，佢仲成日對哈利·波特幫吓手。霍格華茲學校理事會嘅１２個理事係可以投票去暫停校長嘅職權，而跩哥·馬份嘅老豆—魯休思·馬份曾經係嗰１２個理事之一，佢曾經試過１次罷免鄧不利多嘅校長資格，不過後尾佢被揭發出言恐嚇其他１１個理事嚟迫佢哋投票罷免校長，魯休思·馬份因為咁就被逐出學校理事會。每個霍格華茲教職員或者教授專門去研究一個學科，其他職員包括學校護士、圖書館管理員、鎖匙管理員......等等。

霍格華茲嘅校訓係「眠龍勿擾」（拉丁文：Draco dormiens nunquam titillandus），字面上意思係永遠唔應該去攪醒沉睡緊嘅龍，實際上意思係避免去惹是非。

紀律

霍格華茲對學生嘅懲罰除咗扣學院嘅分數之外，學生如果喺學校裡面嘅行為嚴重不當嘅話可以畀教職員罰留堂。霍格華茲裡面每個課室都有４個代表學院嘅玻璃沙漏，玻璃沙漏裡面有唔同顏色嘅寶石代表唔同嘅學院（紅寶石代表葛萊分多；黃寶石代表赫夫帕夫；藍寶石代表雷文克勞；綠寶石代表史萊哲林）。當某個學生做錯事搞到自己嘅學院被扣分，設喺玻璃沙漏裡面嘅寶石就會被抽走，學生做好事加分嘅話都係用同樣嘅方式嚟加落去，啲教授都需要用魔法將啲寶石喺空氣裡面抽出嚟。

根據學校嘅管理員雅各·飛鼠所講，留堂係意味住學校近年先至出現嘅一種體罰方式；亞瑟·衛斯理自己話佢嘅身體仲留低阿破·普格時期（雅各·飛鼠嘅上一任管理員）所造成嘅實際疤痕。不過喺而家嘅年代，留堂通常係涉及去幫教職員或者學院去處理沉悶嘅工作。對於學生犯咗更嚴重嘅罪，佢哋有可能被停學或者甚至畀學校踢出校。目前已知被踢出校嘅學生淨係得魯霸·海格同埋紐特·斯卡曼德。

啲教授似乎都可以用留堂嚟懲罰嗰啲唔受罰或者成績唔理想嘅學生。學院負責人在紀律事宜上有最終的決定權。每個學院都會揀兩個５年級學生嚟做級長，仲賦予佢哋特權同責任，仲有紀律上嘅責任。級長作為學生嘅領導，５年級學生裡面揀出嚟嘅男級長同埋女級長，佢哋有權對同學嘅違規行為罰對方留堂。喺課室出面執行嘅懲罰主要由學校管理員雅各·飛鼠喺各級級長嘅幫手之下負責。

校內地點

隱藏魔法石嘅地點

霍格華茲３樓嘅禁區可以由隨時會郁嘅樓梯經過走廊嘅活板門入到去，魔法石由幾個教授設置嘅７種魔法挑戰嚟保護：

• 由魯霸·海格設置嚟看守活板門嘅三頭巨犬—毛毛；
• 由芽菜教授去種嘅魔鬼網；
• 由孚立維教授設置有幾廿條鎖匙嘅房，教授用咒語令啲鎖匙生啲翼嚟飛到去接近天花板嘅高度，啲鎖匙裡面淨係得一條對翼最爛溶溶嘅鎖匙可以解鎖通去下個部分嘅門。不過，喺電影改編入面嗰幾廿條鎖匙會攻擊去搵魔法石嘅人；
• 跟住落嚟去到由麥教授設計嘅巨型巫師棋棋盤。如果要通過去對面嘅話就一定要喺巫師棋局裡面打贏棋手。玩家如果喺比賽輸咗嘅話，佢嘅性命將會有危險。榮恩·衛斯理同埋奎若教授係少數能夠喺呢場巫師棋局嗰度贏到嘅人。
• 奎若教授嘅挑戰係巨型山怪嘅房。奎若教授喺小說裡面將自己嘅巨型山怪打入嚟去到最後嗰間房，所以哈利佢哋３個就唔使對付。巨型山怪喺電影裡面係冇出現過，不過呢樣嘢曾經喺PS1同埋Game Boy Color嘅遊戲入面出現過。
• 跟住就會去到石內卜教授嘅考驗，一定要用教授釀製出嚟嘅一系列魔藥去解決一個有邏輯嘅謎語，而唔係魔法：嗰度有兩道畀火阻隔住嘅門，有一種魔藥畀解謎者用佢去到嗰度嘅方式走；另一種魔藥係畀解謎者繼續去到下一間房。魔藥入面有兩種都係蕁麻酒，而另外３種係毒藥。呢個挑戰並唔會喺電影裡面出現，但係就會出現喺電視遊戲入面。
• 喺最後嘅密室裡面出現嘅係意若思鏡，鄧不利多校長進一步用咗魔法令去搵魔法石嘅人用唔到自私嘅手段先可以得到呢樣嘢，令到去搵魔法石嘅人陶醉喺幻象裡面開心到唔想走。

地底

消失的密室

消失的密室The Chamber of Secrets喺霍格華茲城堡地底好深嘅地方最有可能喺黑湖湖底，嗰度係霍格華茲其中１個創辦人—薩拉扎·史萊哲林喺佢自己離開霍格華茲之前起嚟畀佢嘅古老魔法生物—蛇妖生活嘅地方，史萊哲林喺數百年前目的用嚟清除學校裡面麻瓜出身嘅學生。

呢個密室嘅入口隱藏喺愛哭鬼麥朵响嗰度嘅２樓女生浴室入面，其中一個水龍頭隔離印住蛇嘅雕像，對面有史萊哲林嘅大雕像，一定要用爬說語先至可以打開嚟入去。秘道打開咗之後就會出現咗個黑鼆man4鼆嘅入口，有一條石造好斜仲鋪滿泥濘嘅濕滑通道，嗰度嘅寬度夠晒畀人滑落去。

滑到去底層嘅地下佈滿晒小動物骸骨同埋脫落咗嘅巨形蛇皮，然後再有一條隧道通去一道堅固嘅牆，雕刻住兩條對眼係綠寶石仲纏繞埋一齊嘅蛇。嗰道牆喺爬說語嘅命令之下打開咗一條又長又暗嘅走廊，排滿晒蛇嘅雕像，包括有兩排更多嘅蛇形雕刻，有支好高嘅石柱由地面支撐上到去天花板。喺中間有個睇起上嚟好似古代同馬騮一樣嘅史萊哲林巨碩雕像。喺戲裡面對密室嘅形容係支柱有蛇頭嘅雕刻，而史萊哲林嘅雕刻只是佢嘅頭像。

湯姆·瑞斗喺大概５０年前打開咗呢道密室嘅大門，愛哭鬼麥朵畀佢哋嘅同學奧莉芙·轟碧Olive Hornby嘲笑而自己一個嬲爆爆嗰陣時，佢推開咗廁所門諗住話畀瑞斗知佢自己要走嗰陣，佢因為睇見蛇妖嘅眼而即刻就死咗，佢死咗之後就用幽靈嘅姿態嚟向轟碧報仇。霍格華茲２樓嘅女生浴室到而家仍然運作到，不過因為愛哭鬼麥朵好煩咁出現，同埋喺佢心煩意亂嗰時搞到廁所水浸嘅習慣，搞到嗰個廁所甚少會有學生去用。羅琳喺佢嘅作品《哈利波特從文字到熒幕：完全電影魔法之旅Harry Potter Page to Screen: The Complete Filmmaking Journey》入面透露，密室自從建立以嚟喺未知嘅情況下都有水浸嘅情況。

喺《哈利波特：消失的密室》，有１條巨形蛇妖喺雕像裡面休息，當佢聽到史萊哲林嘅傳人—湯姆·瑞斗召喚佢嗰陣時，佢就喺雕像嘅嘴裡面出嚟。當時已經做咗黑巫師嘅湯姆·瑞斗迫使年紀比較細嘅學生金妮·衛斯理將密室之門打開嚟將巨形蛇妖放咗出嚟，蛇妖攻擊學校裡面嘅師生。２年級學生哈利·波特利用爬說嘴打開咗密室，喺嗰度將蛇妖殺死，仲摧毀咗收埋湯姆·瑞斗１６歲嗰陣喺霍格華茲記憶嘅日記（成個系列後尾先至透露嗰本日記係個分靈體），最後救返金妮·衛斯理條命。

５年之後，妙麗·格蘭傑同榮恩·衛斯理喺《哈利波特：死神的聖物》裡面第２次入到去密室，榮恩模仿哈利打開史萊哲林金匣仔嘅聲音（就算唔係爬說語）嚟再打開密室嘅門。佢哋兩個喺蛇妖骸骨裡面掹甩佢嘅毒牙用嚟摧毀佛地魔用海加·赫夫帕夫嘅金盃嚟整嘅分靈體。

秘道

霍格華茲裡面有７條秘密通道可以用嚟出入學校。雅各·飛鼠淨係知道其中４條，而由雷木思·路平、彼得·佩迪魯、天狼星·布萊克同埋詹姆·波特組成嘅劫盜者同埋衛斯理孖仔就知道晒全部７條秘道，不過通向邊度嘅資料就唔清楚。萬應室可能創造咗第８條秘道出嚟。唯一已知嘅事例就係霍格華茲大戰之前，學校裡面已經形成咗一條可以通去豬頭酒吧嘅秘道。基於萬應室嘅性質，嗰度可能會有幾條秘道通去唔同嘅地方。飛鼠唔知道嗰３條霍格華茲秘道係：

• 喺魔法樹木—渾拚柳地下嘅秘道，可以通去尖叫屋；
• 霍格華茲４樓嘅鏡後面有條秘道，但係衛斯理孖仔將劫盜地圖送畀哈利嗰陣就話嗰條秘道已經冧咗，而家完全塞實晒；而且弗雷同喬治認為，大概從來都冇人行過呢條秘道，因為渾拚柳咁啱就種喺呢個出口嘅上面；
• 黑魔法防禦術課室裡面嘅單眼女巫雕像底下有一條樓梯秘道可以通去蜂蜜公爵糖果店嘅地牢。需要入去秘道嗰時要向住女巫雕像大聲咁講出「咻咻降Dissendium」呢個咒語嚟准佢哋入去嗰條秘道。雕像上面嘅駝峰會打開仲會露出秘道嘅入口；

另外，系列裡面都有講到用兩個消失櫥櫃就可以打開一條秘道，一個出入口喺霍格華茲嘅萬應室，另一個喺波金與伯克氏商店。呢條秘道並唔會顯示喺劫盜地圖上面，因為呢條秘道唔屬於霍格華茲嘅一部分。

除咗出入霍格華茲，學校裡面仲有好多捷徑，呢啲捷徑通常隱藏喺掛毯冚住牆上面嘅窿。

萬應室

霍格華茲城堡８樓有間叫做萬應室the Room of Requirement嘅魔法房，對面掛住張傻巴拿巴斯Barnabas the Barmy正喺度試吓去教山怪跳芭蕾舞嘅巨型掛毯。

呢間房淨係會喺啲人真正有需要嗰時先至會出現，仲會包含晒嗰個人需要嘅任何嘢。如果要令佢出現，嗰個人一定要係咁集中諗住自己嘅需要，仲經過傻巴拿巴斯嘅巨型掛毯同埋用嚟隱藏入口嘅人形花樽來回行３次，然後萬應室就會自動出現喺佢眼前，配備晒佢哋需要嘅任何嘢。

喺《哈利波特：鳳凰會的密令》入面，哈利喺萬應室主持佢帶領嘅學生組織—鄧不利多的軍隊；跩哥·馬份喺《哈利波特：混血王子的背叛》入面就係用呢間房去收埋同修理佢自己個消失櫥櫃，令到嗰樣嘢可以將佛地魔嘅食死人偷偷哋運入去霍格華茲。

禁忌森林

禁忌森林the Forbidden Forest喺霍格華茲邊緣嘅一片又大又黑嘅森林。除非有教職員陪同、奇獸飼育學嘅課堂、極少數嘅情況同埋留堂嘅情況之下，學生係絕對唔准入去。禁忌森林裡面嘅植物種類有山毛櫸、橡樹、松樹、梧桐、紅豆杉、兩耳草同埋刺根嘅矮樹叢。禁忌森林亦都係各種各樣生物嘅家園，裡面有好多都係各種各樣嘅危險生物，有啲係魯霸·海格飼養嘅。

倫敦華納兄弟工作室之旅：哈利波特嘅製片展場加入咗禁忌森林畀啲粉絲第１次去探索。

學校創辦人

霍格華茲據講係由高錐客·葛萊分多、海加·赫夫帕夫、羅威娜·雷文克勞同埋薩拉扎·史萊哲林喺９—１０世紀之間喺蘇格蘭高地創立。

高錐客·葛萊分多

内文：葛萊分多

高錐客·葛萊分多Godric Gryffindor係個中世紀巫師，係霍格華茲嘅４個創辦人之一。佢曾經同薩拉扎·史萊哲林係老友，不過因為史萊哲林認為麻瓜出身嘅學生唔可以喺霍格華茲讀書而搞到佢哋兩個人各行各路。葛萊分多出世嘅地方後嚟為咗用嚟紀念佢嘅成就而畀人叫做高錐客洞。

葛萊分多曾經委託妖精國王萊格納克一世幫自己打造一把劍柄上面鑲嵌咗紅寶石嘅純銀寶劍，不過萊格納克一世喺寶劍製成咗之後好鍾意喜歡把寶劍，於是就想將把寶劍喺葛萊分多嗰度偷返番嚟。佢自己話係葛萊分多喺自己度將寶劍偷走，令自己嘅臣民去攞返畀佢。葛萊分多打走晒所有精靈，仲喺佢哋身上施咗魔法，要佢哋返去話返畀萊格納克知道，如果佢再做咁樣嘅事，葛萊分多就會用呢把劍殺死佢同佢所有嘅臣民。萊格納克冇再試吓將寶劍攞走，不過精靈社會之間就開始流傳葛萊分多偷走寶劍嘅傳說，直到幾百年之後仍然係咁樣。

高錐客·葛萊分多作為當時最偉大嘅４個男女巫師之一，佢同赫夫帕夫、雷文克勞同埋史萊哲林呢幾位男女巫師共同創辦咗霍格華茲。不過，葛萊分多同史萊哲林一齊做咗幾年嘢之後，佢哋兩個嘅關係不斷咁惡化。史萊哲林始終因為唔相信麻瓜出身嘅人，認為霍格華茲唔應該收佢哋做學生，就係因為咁而同其餘３個創辦人產生咗分歧。史萊哲林最後因為說服唔到其餘３個人接受自己嘅諗法而選擇離開學校。但係葛萊分多唔知道嘅係，佢呢個曾經嘅好朋友喺城堡裡面偷偷哋起咗間密室。史萊哲林好期待自己嘅傳人可以再打開密室，將喺裡面嘅蛇妖放出嚟去清除晒嗰啲麻瓜出身嘅學生。

葛萊分多過身嘅時間就唔清楚。

海加·赫夫帕夫

内文：赫夫帕夫

海加·赫夫帕夫Helga Hufflepuff係個中世紀女巫，係霍格華茲嘅４個創辦人之一。佢同好朋友羅威娜·雷文克勞、高錐客·葛萊分多同埋史萊哲林一齊創辦咗霍格華茲。赫夫帕夫嘅學院招收嗰啲忠誠、誠實、公平競爭同勤奮嘅學生，喺佢學院裡面嘅學生或多或少都有呢啲特質。其餘３個創辦人都喺度根據自己嘅要求揀學生嗰陣，赫夫帕夫就將唔啱佢哋要求嘅學生收晒入自己嘅學院，仲對佢哋一視同仁，將自己所識嘅所有知識全部傳授晒畀佢哋。赫夫帕夫學院嘅學生就算係唔合乎其他學院嘅要求，不過佢哋出晒名忠誠同勤奮。赫夫帕夫嘅魅力十足到令個個都鍾意佢，佢仲可以將各種各樣嘅人全部都號召晒嚟去起霍格華茲。

海加·赫夫帕夫最叻係用食物咒，今時今日霍格華茲宴會上嘅主菜仍喺度用佢留低嘅食譜。赫夫帕夫仲畀家庭小精靈去到霍格華茲嘅廚房做嘢，確保佢哋能夠安全，而唔會受到虐待同辱罵。

海加·赫夫帕夫幾時過身就唔清楚。不過赫夫帕夫過咗身之後，屬於佢嘅１件遺物—一個金盃傳到去佢嘅後裔—花奇葩·史密Hepzibah Smith手上。史密話，呢個金盃據講有各種唔同嘅魔力，但係佢就冇點樣試過。湯姆·瑞斗後嚟喺史密手上將嗰個金盃偷走，仲將嗰樣嘢變成咗分靈體。妙麗·格蘭傑喺1998年嘅霍格華茲大戰入面用蛇妖嘅毒牙將做咗分靈體嘅金盃摧毀。

羅威娜·雷文克勞

内文：雷文克勞

羅威娜·雷文克勞Rowena Ravenclaw係個中世紀早期嚟自蘇格蘭河畔嘅女巫，佢同海加·赫夫帕夫係好朋友，雷文克勞有好高嘅智慧同創造力，被認為係當時最偉大嘅其中１個女巫。羅威娜·雷文克勞有黑色嘅長頭髮同埋雙眼都係黑色嘅，外面嘅人認為佢「靚得嚟令人驚咗佢」。

雷文克勞同赫夫帕夫兩個女巫為咗起得成世界上最好嘅魔法學校，佢哋喺993年前後同高錐客·葛萊分多仲有薩拉札·史萊哲林兩個巫師一齊起咗霍格華茲城堡，佢哋仲創辦咗霍格華茲呢間巫師學校，羅威娜·雷文克勞就做咗霍格華茲嘅４個創辦人之一。

有一種歷史學說認為，霍格華茲嘅地點同埋學校名都係由雷文克勞揀嘅，當時佢曾經夢見一隻疣豬帶住佢嚟到一個湖邊嘅懸崖上面。雷文克勞仲幫城堡諗咗個千變萬化嘅平面圖出嚟。雷文克勞會揀嗰啲有聰明才智嘅後生巫師同女巫做自己學院嘅學生，所以雷文克勞學院喺揀學生嗰陣好注重敏銳嘅智慧同創造力嘅頭腦。

羅威娜·雷文克勞有個女—海倫娜·雷文克勞Helena Ravenclaw，佢仲親自喺學校教自己個女去學魔法。海倫娜喺霍格華茲畢業之後因為妒忌自己阿媽嘅智慧，又知道阿媽嗰個王冕可以增加佩戴者智慧嘅魔法特性，所以就將本來屬於阿媽嗰個王冕偷咗去。海倫娜為咗希望自己能夠變得比阿媽更加聰明同更加有名望，於是佢帶住嗰個王冕遠離自己阿媽走到去阿爾巴尼亞。羅威娜·雷文克勞對自己個女嘅背叛覺得好難為情，佢又好在意自己同家族嘅聲譽，所以佢選擇去隱瞞自己個女走咗出去嘅事實，甚至從來都冇同自己嘅好朋友同埋其他學校創辦人透露或提起過呢件事。

羅威娜喺嗰時之後就患咗重病。佢冇計較自己個女叛逆自己，叫鍾意住海倫娜嘅血腥男爵去搵自己個女返去，想見自己個女最後一面。血腥男爵最終喺阿爾巴尼亞嘅森林入面搵到海倫娜，但係佢唔肯返屋企。血腥男爵因為畀海倫娜突然拒愛，加上本嚟就妒忌佢嘅自由而變到非常之嬲，所以就將對方拮死咗。血腥男爵喺意識到自己犯咗嘅錯之後亦都自殺死咗。海倫娜同血腥男爵後尾分別變成咗雷文克勞同史萊哲林學院嘅幽靈。羅威娜最後都冇再見到自己個女。亦都傳說認為，羅威娜嘅早逝亦都係因為佢太過傷心而導致嘅。

薩拉札·史萊哲林

内文：史萊哲林

薩拉札·史萊哲林Salazar Slytherin係個中世紀純血巫師，係霍格華茲嘅４個創辦人之一。佢曾經同高錐客·葛萊分多係好朋友，佢哋仲同羅威娜·雷文克勞、同埋海加·赫夫帕夫一齊創辦咗霍格華茲。不過，史萊哲林因為唔信任麻瓜出身嘅學生，所以唔同意畀佢哋入去霍格華茲讀書。不過，其他創辦人並唔同意佢嘅觀點，佢哋之間嘅分歧不斷咁加大，後來，史萊哲林同葛萊分多之間爆發咗一次激烈嘅嘈交。史萊哲林決定離開學校，佢偷偷哋起咗間收埋咗蛇妖嘅密室（當時其他人並唔知情），就離開咗學校冇再返過嚟。

薩拉札·史萊哲林係最早記錄嘅其中１個爬說嘴，佢擁有控制蛇妖嘅能力，而史萊哲林嘅後裔同樣都有呢種能力。史萊哲林份人精明而有野心。分類帽曾經話佢係「渴望權力嘅史萊哲林」，所以佢似乎會不惜代價嚟攞到佢自己想要嘅嘢。史萊哲林好鍾意嗰啲有野心嘅後生仔，呢啲佢睇重嘅特質亦都正正就係佢自己都有嘅特點。史萊哲林畀人認為佢係當時最偉大嘅其中１位巫師，佢有好多能力，尤其係破心術，呢個亦都令佢做咗高超嘅「破心術大師」。

密室裡面嘅薩拉札·史萊哲林雕像描繪咗「１張馬騮咁樣老態龍鐘嘅樣」，同埋「一把長癩laai4癩嘅鬍鬚，幾乎一直拖到去石頭刻成嘅巫師長袍嘅下擺上面，兩隻灰灃fung1灃嘅獸腳入企喺間房光滑嘅地板上面咁樣。」史萊哲林嘅鬍鬚係白色嘅，睇起上嚟佢嘅後裔魔佛羅·岡特同佢有幾分似樣。

薩拉札·史萊哲林喺中世紀嘅某個時期過身。根據魔法史嘅教授丙斯教授轉述嘅傳說，史萊哲林喺霍格華茲地牢下面起咗間密室，仲放咗一種特別嘅生物入去。等到嗰個密室嘅門又再被打開嗰陣，裡面嘅生物就可以淨化學校，清除晒所有麻瓜出身嘅學生。而密室裡面嘅蛇妖，只有真正嘅史萊哲林傳人先至控制到佢。呢個傳說喺1943年被證實，史萊哲林嘅傳人—湯姆·魔佛羅·瑞斗打開咗密室嘅大門，利用入面嘅蛇妖襲擊咗大量麻瓜出身嘅人，仲搞到其中１個人死咗。

喺1943年畀蛇妖襲擊死咗嘅女學生後嚟變成幽靈返到去學校，人人都叫佢做愛哭鬼麥朵。而密室嘅入口正正就喺佢死咗喺嗰個女生洗手間入面嘅洗手盤下面，嗰個入口淨係可以用爬說語先至開到。瑞斗喺1992年透過自己嘅一個分靈體將密室又再打開。佢利用自己日記裡面屬於佢嗰塊靈魂碎片嚟控制住金妮·衛斯理，仲要佢按自己嘅命令做嘢。就算瑞斗襲擊咗唔少麻瓜出身嘅學生，不過佢最終嘅目的都係要呃哈利·波特入去密室嚟殺死佢。

喺薩拉扎·史萊哲林過咗身之後，佢擁有一個印住字母「Ｓ」字嘅金匣仔傳到落去佢唯一１支仲喺度嘅後裔—岡特家族嘅手上。佛地魔阿媽—魔柔·岡特 Merope Gaunt喺佢窮到燶又潦倒嗰時將呢樣嘢賣畀加拉塔克·伯克Caractacus Burke，跟住就畀鍾意古董嘢嘅花奇葩·史密買咗返去。瑞斗喺發現咗史密嘅呢個金匣仔之後就諗辦法偷咗去，仲喺後嚟整成分靈體，將呢樣嘢收埋喺佢自己細細嗰陣曾經去過嘅一個岩洞裡面。

獅子阿爾發·布萊克喺家庭小精靈怪角嘅幫手之下去到嗰個岩洞將金匣仔偷咗去。獅子阿爾發命令怪角帶住金匣仔離開岩洞仲要諗辦法摧毀佢，不過怪角做唔到。蒙當葛·弗列契喺古里某街12號將金匣仔偷咗去，嗰個金匣仔最終落入去魔法部官員桃樂絲·恩不里居嘅手上，恩不里居成日戴住小金匣喺身，仲話上面嘅「Ｓ」字母係代表塞溫，用嚟證明自己嘅血統純正。

哈利·波特後尾喺恩不里居手上搶返嗰個金匣仔返嚟，仲畀榮恩·衛斯理用葛萊分多寶劍嚟摧毀個金匣仔。去到呢度，金匣仔所帶住嘅分靈體能量就被徹底消滅晒。

電影取景

喺哈利波特系列電影裡面，霍格華茲嘅相關場景主要喺阿尼克城堡、告羅士打座堂、拉科克修道院、牛津大學基督堂學院呢啲地方去拍攝。

歷史

中世紀

學校成立三百幾年後，同法國嘅波巴洞、東歐嘅德姆蘭三間學校一齊搞咗個三巫鬥法大賽，作爲三間學校之間嘅競爭、交流之用。呢個比賽持續搞咗六百幾年，之後因爲一單意外取消咗。喺第四集《哈利波特：火盃的考驗》，即係1994-95學年又搞咗一次，但係因爲喺比賽期間西追·迪哥里死咗，所以又取消咗。

軼事

作者J.K.羅琳指出，喺麻瓜發明出廁所之前，霍格華茲係無廁所嘅，巫師、女巫會「就地解決」，然後「令證據消失」。