Quinto potere
|
C'l artìcul chè 'l è scrit in
Miranduléś |
 Network | ||
| Quinto potere | ||
 La Dunaway e William Holden in na figùra dal film | ||
| Quìnt putēr 1976 | ||
|---|---|---|
| Regìa: Sidney Lumet | ||
| Scritōr: Paddy Chayefsky | ||
| Atōr: Faye Dunaway • Peter Finch • Robert Duvall William Holden • Wesley Addy • John Carpenter Ned Beatty • Arthur Burghardt • Bill Burrows Jordan Charney • Kathy Cronkite • Ed Crowley | ||
| Müsica: Elliot Lawrence | ||
| Léngua: Ingléś | ||
| Dürä dal film: 121 minüt | ||
| Nasiōṅ: Stat Unî | ||
Quinto potere (Quìnt putēr) 'l è 'n film dramàtic dal 1976 ad Sidney Lumet candidâ a déś Prèmi Òscar vinsénd-an quàtar, òṅ par 'l atōr minga prutagunìsta Peter Finch, mòrt soquànt méś prima dla premiasiòṅ. Anc la Faye Dunaway e la Beatrice Straight i aṅ purtâ a cà la statṿa.
Al film, ch'l à fat sù da piò ad vint-a-tri migliòṅ ad dòlar dòp ès'r-an custâ gnanc quàtar, 'l è stâ sarnî in dal 2000 da la National Film Registry dla bibliutéca dal cungrès di Stat Unî p'r èsar tgnû dacàt.
Sunt
[mudéfica la surzéia]Howard Beale (Peter Finch), giurnalìsta stòric dal canàł televiśìṿ UBS, al và in criśi dòp la mòrt ad sò mujēr. Cuma s'a n fus minga asâ, al vîṅ anc a savēr dal sò amìg e presidènt dla diviśiòṅ dal nutìsi Max Schumacher (William Holden) ch'i dirigìnt dla TV i gh'aṅ intensiòṅ ad lasàr-'l a cà par via dl'arbasamènt di ascōlt dal sò prugràma. Al dè dòp Beale al diś in dirèta ch'in dal cōrs dla stmana a vgnir al s masarà davànti a tut durànt al nutisiàri dla sira.
Licensiâ in quàt'r e quàt'r òt, al gh la cava però a cunvìs'r i sò superiōr a finìr la sò caréra in na manéra cum a s dév, śmenténd la nutìsia in dla sò traśmisiòṅ. Durànt la dirèta però chi lò al taca a far di spròlug ch'a gh 'n à par tut. Cal spetàcul lè acsè rabî al fà muntàr sù gl'ascōlt dla réda tant ch'la respunsàbila di prugràma Diana Christensen (Faye Dunaway) la naśa 'l afâr e la s dà da far par mét'r in pē un giurnàł-spetàcul par Beale par far-al pasàr p'r un pruféta mat d'l ètere. Schumacher al n è minga 'd acòrd e 'l pèrt al pòst.
C'n al tèmp però i spetadōr i sa stùfan, inóltar Beale al taca a dar adòs anc a la UBS e a 'l sò presidènt, Arthur Jensen (Ned Beatty). In pinsēr p'r al futûr dla réda, la Diana e 'l sò culéga Frank Hackett (Robert Duvall) i strùlg'n un piàṅ par far-al fóra in dirèta TV.