ទួន (ព្រះរាជា)

ទួនរាប់ជាអាវុធម្យ៉ាងសម្រាប់ប្រើក្នុងសង្រ្គាម មានលក្ខណៈប្រហែលគ្នានឹងលំពែង ប្លែកតែនៅគល់ដងមានភូ។ ទួនហៅជាភាសារាជស័ព្ទថា"ព្រះទម្រង់តោមរ"ឬ"ព្រះទម្រង់ទួន" ឬ"ព្រះទម្រង់អសឡី"។ព្រះទម្រង់ទួននេះមានជា២បែប គឺបែបដងខ្លី និងបែបដងវែង ។ ព្រះទម្រង់ទួនខ្លីមានលក្ខណៈ គឺផ្លែដូចជាផ្លែលំពែង នៅគល់ផ្លែគ្មានក្បាំងទេ តែគេធ្វើមៀនរាងត្រមោងៗ បែបយ៉ាងកន្ទួត បន្ទាប់តពីមៀនមក មានភូសរសៃរោមសត្វ ធ្វើពីរោមកន្ទុយសត្វចាមរី ប្រវែងជាង១ចំអាមបន្តិច ដងទួនស្រោមប្រាក់កាឡៃមាសស្មើចុងស្មើដើម មិនរៀវម្ខាងដូចដងលំពែងទេ នៅចុងបំផុតនៃដង មានដាក់ដែក៤ជ្រុងស្រួច សម្រាប់បញ្ឈរទៅនឹងដីបាន។ព្រះទម្រង់ទួនដងវែងមានលក្ខណៈដូចគ្នានឹងព្រះទម្រង់ទួនដងខ្លី ដែរប្លែកតែទ្រើសនិងវែងជាង និងមានលក្ខណៈល្អវិសេសជាងព្រះទម្រង់ទួនខ្លីបន្តិច គឺមៀនមានដាំត្បូងពណ៌ក្រហម។ ទួនដងវែងនេះ គេសម្គាល់ថា ជាព្រះទម្រង់អសឡីសម្រាប់អង្គព្រះករុណាប្រើប្រាស់ក្នុងវេលាស្តេចគង់ព្រះរាជរថ សេះ ឬដំរីពេលយាងចេញធ្វើសឹក ។