भेनेजुएला

भेनेजुएला औपचारिक नां बोलिभारियन गणराज्य भेनेजुएला, दक्षिण अमेरिकाया छगू देय् ख। थ्व देय्या सरकारी भाय् स्पेनिश ख, व राजधानी नगर काराकस ख।

भेनेजुएलाय् ल्हाइगु मेमेगु भासय् क्यारिब, गुआहिबो, वाराओ, वायु, पेमोन, व पियारोआ ला।

इतिहास

नामाकरण

दकलय् लोकंह्वाःगु व स्वीकृत मान्यता कथं सन् १४९९इ एलोन्सो दे ओजेदाया नेतृत्वय् छगू मालेज्या अभियानं भेनेजुएलाया तटय् थ्यन। माराकाइबो पुखुया क्षेत्रय् दूगु थां छेँ (Stilt house) खँबिले इटालियन न्याभिगेतर, अमेरिगो वेस्पुचीयात इटालीया भेनिस नगरया लुमन्ति वल, उकिं वय्कलं थ्व क्षेत्रया नां भेनेजिओला, वा "चीधंगु भेनिस" तल। भेनेजिओलाया स्पेनिश उच्चारण Venezuela ख। ।

मार्तिनन फर्नान्देज दि एन्सिसो, वेस्पुची व ओजेदाया न्हू बँ मालेज्या पुचःया छम्ह दुजलं धाःसा छगू भिन्न विवरण ब्युगु दु। वय्कःयागु च्वखँ सुम्मा दे जियोग्राफियास वय्कलं थ्व थासय् थःत भेनेसिउएला धाइपिं आदिवासी जनजातित लुइकूगु धयादीगु दु । थ्व कथं "भेनेजुएला" नां आदिवासी खँग्वलं बुयावःगु जुइफु।

थ्व देय्या पुलांगु आधिकारिक नां Estado de Venezuela (१८३०–१८५६), República de Venezuela (१८५६–१८६४), Estados Unidos de Venezuela (१८६४–१९५३), व हानं República de Venezuela (१९५३–१९९९) जुइधुंकूगु दु।

भूगोल

भेनेजुएला दक्षिण अमेरिकाया उत्तरय् ला। भूगर्भीय कथं थुकिया मू भूभाग दक्षिण अमेरिकी प्लेटय् ला। थ्व देय्‌या कुल क्षेत्रफल ९१६,४४५ वर्ग किमि (३५३,८४१ वर्ग माइल) दु व बँ क्षेत्रफल ८८२,०५० वर्ग किमि (३४०,५६० वर्ग माइल) दु। भेनेजुएला हलिमया ३३गु दक्ले तःधंगु देय् ख। थ्व भूभाग अक्षांश ०° व १६° उत्तर व देशान्तर ५९° व ७४° पश्चिमया दथुइ ला।

थ्यं-मथ्यं स्वकुंलाःगु लागा दूगु भेनेजुएलाया उत्तरय् २,८०० किमि (१,७०० माइल) हाकःगु समुद्रसिथ दु। थ्व सिथक्षेत्रय् क्यारिबियनया यक्व टापुत ला व उत्तरपूर्वय् उत्तरी एटलान्टिक महासागरया सीमा ला। आपालं पर्यवेक्षकतयेसं भेनेजुयलायात प्यताजिया बँ-लागाया रुपय् म्हसीकातःगु दु:

• उत्तरपश्चिमय् माराकाइबो तटीय भूभाग,
• उत्तरी क्यारिबियन तटय् कोलम्बियाया सीमां ब्याःगु पूर्व–पश्चिम चापय् विस्तारित उत्तरी पर्बः/गुंच्वका,
• दथु भेनेजुएलाय् च्वंगु तब्यागु ख्यः, व
• दक्षिणपूर्वया गायना पठार।

उत्तरी गुंच्वका व च्वापुगुं दक्षिण अमेरिकाया एन्डिज पर्वत झ्वःया दकलय् उत्तरपूर्वी विस्तार ख। पिको बोलिभार थ्व देय् या दकलय् तजाःगु थाय् समुद्र स्वया ४,९७९ मिटर (१६,३३५ फिट) च्वे लाः। दक्षिणय् बायाच्वंगु गुयाना पठारय् अमेजन बेसिन व हलिमया दकलय् तजाःगु झ्वाला एन्जेल फल्सया उत्तरी भाग नापं टेपुइस, तःधंगु पठार दु। भेनेजुएलाया केन्द्रया विशेषता लानो ख, गुगु सुदूर पश्चिमय् कोलम्बियाया सीमां पूर्वय् ओरिनोको खुसिया डेल्टा तक्क न्यनाच्वंगु ब्याःगु ख्यः ख। बुँज्या यायेत भिंगु अलुभियल चा दूगु ओरिनोको खुसि स्वनिगलं भेनेजुएलाया दकलय् तःधंगु व महत्त्वपूर्ण खुसिया प्रणाली दयेकातःगु दु। थ्व ल्याटिन अमेरिकाया दकलय् तःधंगु वाटरशेडय् उत्पत्ति जुइ। कारोनी व अपुरे थनया मेमेगु मू खुसि ख।