連續同離散變數

連續變數（參見英文：continuous variable）同離散變數（參見英文：discrete variable）係統計學上嘅概念。一個連續變數嘅可能數值有無限咁多個，而離散變數得若干個可能數值。例：真相得兩個可能數值（真同假），但溫度嘅可能數值嘅數量原則上有無限咁多個，攝氏 100 度、攝氏 100.01 度、攝氏 100.0001 度... 等等。

概論

睇埋：變數 (科研)

喺統計學同各科學入便，變數係指一啲可以喺唔同觀察單位之間變化嘅特徵。例：一班學生之中，每個人嘅年齡、身高、語言能力等都可能唔同，而呢啲特徵就可以叫做變數。年齡係一個變數，身高係一個變數，譬如阿明嘅年齡係十五歲而身高係 175 厘米，阿珍嘅年齡係十六歲而身高係 168 厘米... 如此類推。

變數可以按好多指標分類。一種常見做法係將變數分為連續變數同離散變數兩大類。

• 連續變數係指可以喺某個範圍內可以攞任意嘅數值，理論上有無限咁多個可能數值，而且可以無限細分，是但攞兩個可能數值嚟睇，佢哋之間嘅差異都有可能再斬細橛啲。例如身高可以係 170 cm 170.5 cm 170.55 cm，甚至更細，總之中間冇任何「跳格」。包括體重、溫度同血壓等一般都會當係連續變數。
• 離散變數係指個變數只可以取某啲特定數值，通常係整數，冇得喺中間慢慢變。例如課室入面嘅學生人數可以係 20 21 22，但唔會話可以有 20.5 個學生；又例如擲六面骰出嘅點數，只可以係 1 至 6，唔會話出現 4.3 點。啲數值之間係一格格噉「跳」住變。

兩者喺統計分析上都好重要。

轉換

睇埋：離散化

中位數分割係將連續變數變做離散變數嘅一種方法；

• 攞一個連續變數 $x$，
• 搵出 $x$ 嘅中位數 $x_{m}$，
• $x$ 數值 $<x_{m}$ 嘅個案冚唪唥設做「組 1」，而 $x$ 數值 $>x_{m}$ 嘅個案冚唪唥設做「組 2」

－得出「屬組 1 定組 2」呢個離散變數，可以將一個原本係連續嘅變數做一啲離散變數先可以做嘅推論統計分析（例如係 ANOVA）。到咗 2020 年，中位數分割呢種做法廣受評擊，好多人都唔會接受呢種做法。

睇埋

• 實驗組：某個個體「屬於實驗組定對照組」就係一個離散變數。
• 鑲嵌圖