ချင်းအမျိုးသားဒီမိုကရေစီအဖွဲ့ချုပ်ပါတီ

ချင်းအမျိုးသားဒီမိုကရေစီအဖွဲ့ချုပ်ပါတီ
ဖိုင်:Chin National League for Democracy logo.png
အင်္ဂလိပ် အမည်	Chin National League for Democracy
အလှည့်ကျ ဥက္ကဋ္ဌ	ပူးဇိုဇမ်
တည်ထောင်ခြင်း	၂၀၁၉ ခုနှစ် ဇူလိုင် ၁၁
ဖျက်သိမ်းခြင်း	၂၉ မတ် ၂၀၂၃
ယခင်	ချင်းဒီမိုကရေစီအဖွဲ့ချုပ် (CLD) ချင်းတိုးတက်ရေးပါတီ (CPP) ချင်းအမျိုးသားဒီမိုကရက်တစ်ပါတီ (CNDP)
ဌာနချုပ်	၁၀၉၇၊ ပြည်ထောင်စုလမ်းမ၊ ၄၅ ရပ်ကွက်၊ ဒဂုံမြို့သစ် (မြောက်ပိုင်း) မြို့နယ်၊ ရန်ကုန်
နိုင်ငံရေး သဘောတရား	ချင်းလူမျိုး အခွင့်အရေး
ပါတီအလံ
မြန်မာနိုင်ငံ၏ နိုင်ငံရေး နိုင်ငံရေးပါတီများ

ချင်းအမျိုးသားဒီမိုကရေစီအဖွဲ့ချုပ်ပါတီ (အင်္ဂလိပ်: Chin National League for Democracy Party; အတိုကောက် CNLD) သည် မြန်မာနိုင်ငံရှိ နိုင်ငံရေးပါတီ ဟောင်း တစ်ခုဖြစ်သည်။

သမိုင်းကြောင်း

ချင်းအမျိုးသားဒီမိုကရေစီအဖွဲ့ချုပ် အမည်ဖြင့် ၁၉၉၀ ရွေးကောက်ပွဲတွင် ဝင်ရောက်ယှဉ်ပြိုင်ခဲ့ရာ ချင်းပြည်နယ်တွင် နှစ်နေရာ အနိုင်ရရှိခဲ့သည်။ သို့သော် နဝတအစိုးရမှ အာဏာမလွှဲပဲ အမျိုးသားညီလာခံ ကျင်းပရန် စီစဉ်မှုအပေါ် ကန့်ကွက်ခဲ့သည့် ပါတီများအား ဖျက်သိမ်းရာတွင် ချင်းအမျိုးသားဒီမိုကရေစီအဖွဲ့ချုပ် အဖျက်သိမ်းခံခဲ့ရသည်။

၂၀၁၈ ခုနှစ် အောက်တိုဘာလ ၁၆ ရက်နေ့တွင် ချင်းဒီမိုကရေစီအဖွဲ့ချုပ် (CLD)၊ ချင်းတိုးတက်ရေးပါတီ (CPP)နှင့် ချင်းအမျိုးသားဒီမိုကရက်တစ်ပါတီ (CNDP) ပါတီသုံးခု ပူးပေါင်း၍ ချင်းအမျိုးသားဒီမိုကရေစီအဖွဲ့ချုပ်အမည်ဖြင့် ပြန်လည်မှတ်ပုံတင်ခဲ့သည်။

ပါတီမှတ်ပုံတင်ခြင်း

ချင်းအမျိုးသားဒီမိုကရေစီအဖွဲ့ချုပ်ပါတီကို ပြည်ထောင်စုရွေးကောက်ပွဲကော်မရှင်၏ ကြေညာချက် ၁၁၈/၂၀၁၉ အရ ၂၀၁၉ ခုနှစ်၊ ဇူလိုင် ၁၁ ရက်တွင် မှတ်ပုံတင်ခွင့်ပြုခဲ့ပြီး၊ မှတ်ပုံတင်အမှတ်မှာ ၁၁၆ ဖြစ်သည်။

ရွေးကောက်ပွဲ၊ ၂၀၂၀ ခုနှစ်

၂၀၂၀ ခုနှစ်၊ အထွေထွေ ရွေးကောက်ပွဲတွင် CNLD သည် ချင်းပြည်နယ်တွင် မဲဆန္ဒနယ် ၃၆ နေရာအတွက် ယှဉ်ပြိုင်ခဲ့သည်။ သို့ရာတွင် မဲဆန္ဒနယ်တစ်ခုတွင်သာ အောင်မြင်နိုင်ခဲ့ပြီး၊ ဟားခါးမြို့နယ် မဲဆန္ဒနယ် (၂) မှ ဦးရှန်မန်းသာ ချင်းပြည်နယ်လွှတ်တော်အတွင်း ဝင်ရောက်နိုင်ခဲ့သည်။

ပယ်ဖျက်ခြင်း

CNLD ပါတီအနေဖြင့် ရွေးကောက်ပွဲကော်မရှင်ထံ နိုင်ငံရေးပါတီအဖြစ် ပြန်လည်မှတ်ပုံတင်မည်မဟုတ်ကြောင်း ပါတီ၏ အတွင်းရေးမှူးအဖွဲ့ဝင် ဦးရှိန်းထွန်းက ပြောကြားခဲ့သည်။

ချင်းအမျိုးသားဒီမိုကရေစီအဖွဲ့ချုပ်ပါတီကို ၂၀၂၃ ခုနှစ် နိုင်ငံရေးပါတီများမှတ်ပုံတင်ခြင်းဥပဒေ ပုဒ်မ ၂၅ အရ သတ်မှတ်ကာလအတွင်း လျှောက်ထားခြင်းမရှိခဲ့သောကြောင့် ၂၀၂၃ ခုနှစ် မတ်လ ၂၉ ရက်နေ့မှစ၍ နိုင်ငံရေးပါတီအဖြစ် မှတ်ပုံတင်ထားခြင်းမှ ပြည်ထောင်စုရွေးကောက်ပွဲကော်မရှင်က ပယ်ဖျက်ခဲ့သည်။